ءاليحان سمايىلوۆ اۆتوموبيلمەن حالىقارالىق جۇك تاسىمالداۋشىلاردىڭ شاعىمدارى تۋرالى ايتتى
بۇگىن ۇكىمەت وتىرىسىندا پرەمەر-مينيستر ءاليحان سمايىلوۆ اۆتوموبيلمەن حالىقارالىق جۇك تاسىمالداۋداعى كەدەرگىلەردى اتادى، دەپ حابارلايدى Kazinform.
«اۆتوموبيل كولىگىمەن جۇك تاسىمالداۋ سالاسىنىڭ دامۋى ەكونوميكانىڭ بارلىق سەكتورلارىنا وڭ اسەرىن تيگىزەدى. قازىرگى تاڭدا قازاقستان ارقىلى 8 حالىقارالىق اۆتوموبيل ءدالىزى وتەدى. ولاردىڭ جالپى ۇزىندىعى شامامەن 13 مىڭ شاقىرىمدى قۇرايدى. نەگىزگى كۇرە جولداردىڭ قاتارىندا باتىس ەۋروپا - باتىس قىتاي، سولتۇستىك - وڭتۇستىك، تراسەكا جانە باسقالارىن ايتۋعا بولادى. سوندىقتان، اتالعان باعىتتار بويىنشا جۇك تاسىمالىن ۇلعايتۋ جانە جۇكتەردىڭ جىلدام ءوتۋىن قامتاماسىز ەتۋ ءۇشىن بۇل سالاداعى كەدەرگىلەردى بارىنشا قىسقارتۋ قاجەت»، - دەدى ۇكىمەت باسشىسى.
پرەمەر-مينيستر مۇنداي كەدەرگىلەردىڭ قاتارىندا شەكاراداعى كەپتەلىستەر مەن قۇجاتتاردىڭ ۇزاق راسىمدەلۋىن، ينفراقۇرىلىم ساپاسىن، ۇيىمداستىرۋ جۇمىستارىنىڭ ناشارلىعىن جانە كوپتەگەن باسقا دا جايتتاردى جاتقىزۋعا بولاتىندىعىن ايتتى.
«كولىك يەلەرىنەن كەلىپ تۇسەتىن شاعىمدار كوبىنە وسى ماسەلەلەرگە قاتىستى. سونىمەن قاتار، جۇكتەر مەن قۇجاتتاردىڭ تىم ۇزاق تەكسەرىلۋى دە نارازىلىق تۋعىزادى. سيفرلىق تەحنولوگيالار مەن اقپاراتتىق جۇيەلەردىڭ ينتەگراتسياسى ارقىلى بۇل ماسەلەلەردى وسى ۋاقىتقا دەيىن ءبىر جۇيەگە كەلتىرۋگە بولاتىن ەدى. ونىڭ ۇستىنە، جۇكتەردى ءبولىپ-تاراتۋدىڭ اسا ماڭىزدى ينفراقۇرىلىمدىق بۋىنى بولىپ تابىلاتىن بوند قويمالارىن دامىتۋ قاجەت. مۇنداي الەمدىك تاجىريبە بىزدەگى وتكىزۋ پۋنكتتەردىڭ جۇكتەمەسىن ازايتىپ، تاسىمال كولەمىن ۇلعايتۋعا مۇمكىندىك بەرەدى»، - دەدى ءاليحان سمايىلوۆ.
