ءاليحان بايمەنوۆ: قازاقستاندا 210 مىڭنان استام ادام توعىزقۇمالاق وينايدى

استانا. KAZINFORM - دۇنيەجۇزىلىك جانە رەسپۋبليكالىق توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ Kazinform تىلشىسىنە توعىزقۇمالاق ويىنىنىڭ دامۋ بارىسى جايىندا ايتىپ بەردى.

ونىڭ ايتۋىنشا، توعىزقۇمالاق ويىنى تەك قازاقستاندا عانا ەمەس، حالىقارالىق دەڭگەيدەدە قارقىندى دامىپ كەلەدى.

- ەل ىشىندە 210 مىڭنان استام ادام توعىزقۇمالاق سەكسياسىندا تۇراقتى اينالىسادى. ال وسى جارىسقا الەمنىڭ 41 ەلىنەن كەلگەن ويىنشىلار قاتىسۋدا. اتقارىلعان جۇمىس قاتارىندا بىرىنشىدەن الەمنىڭ تۇكپىر-تۇكپىرىندەگى زياتكەرلىك ويىن جاناشىرلارىمەن قارىم-قاتىناس ورناتىپ جاتىرمىز. ەكىنشىدەن، الەمگە كەڭ تانىمال igGameCenter جانە Playok سايتىمەن بايلانىس ورناتتىق. سونىڭ ارقاسىندا توعىزقۇمالاق وسى ەكى سايتتا ەڭ كوپ وينالاتىن ويىندار قاتارىنا ەنىپ وتىر، - دەدى فەدەراتسيا پرەزيدەنتى.

ونىڭ ايتۋىنشا، 100 دەن استام ەلدىڭ ويىنشىلارى توعىزقۇمالاقتى ونلاين وينايدى.

- IP ادرەسىن تەكسەرىپ كورگەندە، 100 دەن استام ەلدىڭ ازاماتى توعىزقۇمالاق وينايتىنى بەلگىلى بولدى. سونىمەن بىرگە بۇقارالىق سيپاتتا ناسيحاتتاۋ ءۇشىن 2028 بالا ءبىر مەزەتتە توعىزقۇمالاق ويناپ، گيننەس رەكوردىن جاسادىق. ال جاقىندا 213 مىڭ ادام ويىندى ونلاين رەجيمدە ويناسا، كۇنى كەشە عانا توعىزقۇمالاقتىڭ تاقتاسى العاش رەت ستراتوسفەرا قاباتىنا كوتەرىلدى، - دەيدى ول.

بايمەنوۆ توعىزقۇمالاق سپورتىن ناسيحاتتاۋ ءۇشىن جان-جاقتى جۇمىس اتقارىلىپ جاتقانىن ايتتى.

- بۇل رەتتە ءبىز تۋريزم جانە سپورت مينيسترلىگىمەن، ءتيىستى كوميتەتپەن جانە قالا-اۋدان اكىمدەرىمەن، سونىمەن قاتار ۇلتتىق ويىنىمىزدىڭ جاناشىر كاسىپكەلەرىمەن تىعىز ارىپتەستىك ورناتىپ، كەڭ اۋقىمدا جۇمىس جاساپ جاتىرمىز، - دەدى فەدەراتسيا باسشىسى.

ءسوز سوڭىندا ءاليحان بايمەنوۆ ب ا ق وكىلدەرىنە العىس ايتتى.

- وسى ءساتتى پايدالانا وتىرىپ، قازاقستاندىق بۇقارالىق اقپارات قۇرالدارىنا شىن جۇرەكتەن راحمەتىمدى ايتقىم كەلەدى. سىزدەر توعىزقۇمالاقتى ناسيحاتتاۋ، دارىپتەۋ ىسىندە ۇلكەن ۇلەس قوسىپ جۇرسىزدەر، - دەدى بايمەنوۆ.

ايتا كەتەيىك، V دۇنيەجۇزىلىك كوشپەندىلەر ويىندارىنىڭ توعىزقۇمالاق باسەكەسى استانا قالاسىنداعى «دۋمان» قوناق ۇيىندە ءوتىپ جاتىر.

اۆتور مۇحتار قاليموللا ۇلى