ءالىمحان ۇلىنىڭ دانياداعى جەكپە-جەگىنە بيلەتتەر 30 مينۋتتا ساتىلىپ كەتكەن
استانا. KAZINFORM - قازاقستاندىق بوكسشى جانىبەك ءالىمحان ۇلى مەن داتالىق ياكوب بانك اراسىنداعى الەم چەمپيونى اتاعى ءۇشىن جەكپە-جەككە جەرگىلىكتى جانكۇيەرلەردىڭ قىزىعۋشىلىعى جوعارى.
23-قاڭتارعا جوسپارلانعان كەزدەسۋدىڭ بيلەتتەرى ساتىلىمعا شىققان العاشقى مينۋتتاردان-اق ساتىلعان.
Primetime Boxing پروموۋتەرى كاسپەر حولگەرسەننىڭ ايتۋىنشا، العاشقى 90 سەكۋندتا 250 مىڭ دات كرونىنا بيلەت ساتىلعان. ال العاشقى 15 مينۋتتا مىڭنان استام جانكۇيەر ارەناداعى ورىندارىن ساتىپ العان. جارتى ساعات ىشىندە بيلەت ساتىلىمىنان تۇسكەن تابىس 1 ميلليون كروننان اسقان.
«ءبىز وسىنداي دەڭگەيدەگى الەم چەمپيوندىعى جەكپە-جەگىن دانياعا اكەلۋ ءۇشىن كوپ جۇمىس اتقاردىق. جەرگىلىكتى جانكۇيەرلەردىڭ مۇنداي ىقىلاسى ءبىز ءۇشىن وتە ماڭىزدى. بۇل جاي عانا بوكس كەشى ەمەس، ادامدار قاتىسقىسى كەلەتىن ۇلكەن سپورتتىق وقيعا»، - دەدى حولگەرسەن.
ونىڭ سوزىنشە، Primetime Boxing كومپانياسى دات كاسىپقوي بوكسىن ۇلكەن ارەناعا قايتارۋدى ماقسات ەتكەن. الداعى جەكپە-جەك پەن بيلەتتەر ساتىلىمىنا دەگەن سۇرانىس وسى باعىتتاعى جۇمىستىڭ ناتيجەسىن كورسەتىپ وتىر.
ايتا كەتەيىك، جانىبەك ءالىمحان ۇلى مەن ياكوب بانك اراسىنداعى كەزدەسۋ 23-قاڭتاردا دانيانىڭ حورسەنس قالاسىندا وتەدى. بۇل قازاقستاندىق بوكسشى ءۇشىن ەكىنشى ورتا سالماقتاعى العاشقى جەكپە-جەك بولماق. بۇعان دەيىن «قازاق ستيلى» ورتا سالماقتا WBO جانە IBF تۇجىرىمدارى بويىنشا چەمپيوندىق بەلبەۋلەردى يەلەنگەن.
