عالىمدار مىسىقتاردىڭ ءتورت ءتۇرلى مىنەزىن انىقتادى

زەرتتەۋ ناتيجەسى PLOS One عىلىمي جۋرنالىندا جاريالاندى، دەپ حابارلايدى Massaget.kz.

ماماندار مىسىقتاردىڭ بەيتانىس ادامدارعا، جاڭا ويىنشىقتارعا جانە توسىن جاعدايلارعا قالاي ارەكەت ەتەتىنىن زەرتتەگەن. زەرتتەۋ ناتيجەسىندە مىسىقتاردىڭ مىنەزى ءتورت توپقا ءبولىندى:

وتە كوپشىل - ادامدارمەن وڭاي ءتىل تابىسادى جانە قورقىنىشى از؛

كوپشىل - مەيىرىمدى، ءبىراق ازداپ قورقاق؛

ۇركەك - مازاسىزدانىپ، جاڭا نارسەلەردەن قاشقاقتايدى؛

ۇيالشاق - ءبىر مەزەتتە ءارى قورقادى، ءارى قىزىعۋشىلىق تانىتادى.

عىلىمي زەرتتەۋلەردە ۇيالشاقتىق پەن قورقىنىش كوبىنە جەكە قاراستىرىلمايدى. جانۋارلاردىڭ مىنەزى ادەتتە «قورقاقتان باتىلعا دەيىنگى» شكالا بويىنشا باعالانادى. سوندىقتان بۇعان دەيىن جانۋارلارعا ۇيالشاقتىق قاسيەتى ءتان ەكەنى ناقتى انىقتالماعان.

عالىمداردىڭ ايتۋىنشا، ءتورتىنشى توپتاعى مىسىقتاردىڭ مىنەزى بەيتانىس ادامدارعا قىزىعۋشىلىق تانىتقانىمەن، ولارعا جاقىنداۋعا قورقاتىن سابيلەردىڭ ارەكەتىنە ۇقسايدى ەكەن. بۇل كۇردەلى تۇلعالىق ەرەكشەلىكتەردىڭ ادامعا عانا ەمەس، جانۋارلارعا دا ءتان ەكەنىن كورسەتەدى.

«زەرتتەۋ ناتيجەسى مىسىقتارداعى ۇيالشاقتىقتىڭ ادامداردان قورقۋمەن عانا شەكتەلمەيتىن كۇردەلى قۇبىلىس ەكەنىن كورسەتتى. ءۇي جانۋارلارى الەۋمەتتىك مىنەز-قۇلىقتىڭ الۋان ءتۇرىن تانىتادى» ، - دەدى زەرتتەۋ اۆتورلارىنىڭ ءبىرى مادوكا حاتتوري.

عالىمدار مىسىقتاردىڭ مىنەزىن تەرەڭىرەك ءتۇسىنۋ ولاردىڭ قاجەتتىلىكتەرىن جىلدام انىقتاۋعا كومەكتەسەدى دەپ ەسەپتەيدى. بۇل اقپارات ءۇي جانۋارلارى يەلەرىنە دە، پاناجاي قىزمەتكەرلەرىنە دە پايدالى بولۋى مۇمكىن.