عالىمدار تانىمال تۇلعالارعا تابىنۋ مەن بيلىككە باعىنۋ اراسىندا بايلانىس بارىن انىقتادى
استانا.قازاقپارات - تانىمال ادامدارعا قاتتى تاڭداناتىن ادامدار بيلىككە باعىنۋعا جانە ءداستۇرلى الەۋمەتتىك نورمالاردى ۇستانۋعا بەيىم بولۋى مۇمكىن.
مۇنداي قورىتىندى Psychological Reports جۋرنالىندا جاريالانعان جاڭا زەرتتەۋدە ايتىلدى، دەپ حابارلايدى turkystan.kz.
زەرتتەۋگە ا ق ش-تا تۇراتىن 331 ەرەسەك ادام قاتىستى. قاتىسۋشىلاردىڭ اراسىندا ءوزىن ليبەرال، سەنتريست جانە كونسەرۆاتور دەپ سانايتىندار تەڭ ۇلەسپەن قامتىلعان. زەرتتەۋشىلەر ولاردىڭ سۇيىكتى تانىمال تۇلعاسىنا دەگەن قىزىعۋشىلىعىن جانە وڭشىل اۆتوريتاريزمنىڭ ءۇش قىرىن - بيلىككە باعىنۋ، ءداستۇرلى قۇندىلىقتاردى قولداۋ جانە ەرەجەنى بۇزعانداردى قاتاڭ جازالاۋدى قولداۋ دەڭگەيىن باعالاعان.
ناتيجەسىندە تانىمال ادامدارعا قىزىعۋشىلىقتىڭ ەكى ءتۇرى دە - ولاردىڭ ءومىرى مەن شىعارماشىلىعىن باقىلاۋ سياقتى جەڭىل قىزىعۋشىلىق جانە تۇلعاعا ەموتسيونالدى تۇردە قاتتى بايلانىپ قالۋ - بيلىككە باعىنۋ مەن داستۇرشىلدىكپەن بايلانىستى بولعان.
ەڭ ايقىن بايلانىس بيلىككە باعىنۋ كورسەتكىشىنەن بايقالعان. زەرتتەۋشىلەر ادامنىڭ جاسى، جىنىسى، ءبىلىمى، الەۋمەتتىك- ەكونوميكالىق جاعدايى جانە جالپى ساياسي كوزقاراسىن ەسەپكە العاننان كەيىن دە تانىمال ادامدارعا قىزىعۋشىلىق پەن وڭشىل داستۇرشىلدىك جانە بيلىككە مويىنسۇنۋ اراسىنداعى بايلانىس ساقتالعانىن انىقتاعان.
الايدا زەرتتەۋ تانىمال ادامدارعا قىزىعۋشىلىق ادامنىڭ اۆتوريتار بولۋىنا سەبەپ بولادى دەگەندى بىلدىرمەيدى. عالىمدار زەرتتەۋدى ءبىر ۋاقىت ارالىعىندا جۇرگىزگەندىكتەن، سەبەپ- سالدار باعىتىن انىقتاۋ مۇمكىن ەمەس. ياعني بيلىككە مويىنسۇنۋعا بەيىم ادامدار تانىمال تۇلعالارعا كوبىرەك قىزىعۋى دا ىقتيمال.
سونىمەن قاتار زەرتتەۋ اۆتوريتارلىق اگرەسسيا مەن تانىمال ادامدارعا قىزىعۋشىلىق اراسىندا تۇراقتى بايلانىس بار ەكەنىن كورسەتپەگەن. دەمەك، اتاقتى ادامدارعا قاتتى ەلىگۋ مىندەتتى تۇردە قاتاڭ جازالاۋ مەن الەۋمەتتىك باقىلاۋدى قولداۋمەن بايلانىستى ەمەس.
عالىمدار زەرتتەۋدىڭ تاعى ءبىر شەكتەۋى رەتىندە وعان تەك ا ق ش تۇرعىندارىنىڭ قاتىسقانىن اتاپ ءوتتى. سوندىقتان الىنعان ناتيجەلەردى باسقا ەلدەردەگى ادامدارعا تىكەلەي قولدانۋعا بولمايدى.
