عالىمدار ساتۋرننىڭ تابيعي سەرىگىندە تىرشىلىك بولۋى مۇمكىن ەكەنىن انىقتادى

جاڭا ەكسپەريمەنتتە جەردەگى تىرشىلىك يەلەرى ول جاقتا ءومىر سۇرە الا ما دەگەن سۇراققا جاۋاپ ىزدەدى، دەپ حابارلايدى Deutsche Welle.

ميۋنحەندەگى ليۋدۆيگ ماكسيميليان ۋنيۆەرسيتەتىنىڭ، رەگەنسبۋرگ ۋنيۆەرسيتەتىنىڭ جانە بەرليننىڭ ەركىن ۋنيۆەرسيتەتىنىڭ عالىمدار توبى جۇرگىزگەن زەرتتەۋ ناتيجەلەرى Science Advances جۋرنالىندا جاريالاندى.

زەرتحانادا عالىمدار ەنتسەلادتىڭ قويناۋىنداعى مۇحيت تۇبىنە ۇقساس جاعدايلاردى جاسادى. تابيعي سەرىكتىڭ مۇزدى قابىعىنىڭ استىندا سۇيىق كۇيدە سۋ بار، ال ونىڭ استىندا قاتتى يادرو جاتىر.

عالىمدار جاساندى تۇردە جاسالعان ورتاعا Methanothermococcus okinawensis ارحەياسىن ورنالاستىردى. جەردە بۇل ميكروورگانيزم تەڭىز تەرەڭىندەگى گيدروتەرميالىق ساڭىلاۋلاردىڭ اينالاسىن مەكەندەيدى جانە وتتەگىسىز ءومىر سۇرە الادى. ەنەرگيانى سۋتەگى مەن كومىرقىشقىل گازىنان الادى. تاجىريبە ءبىرجاسۋشالى ميكرواعزا ەنتسەلادقا ۇقساس ورتادا دا وسە بەردى ءارى مەتان گازىن شىعاردى. ميكرواعزا سۋدىڭ تاۋ جىنىستارىمەن ارەكەتتەسۋىنەن پايدا بولعان سۋتەگىن پايدالاندى جانە ءتىپتى كومىرقىشقىل گازىنىڭ وتە تومەن كونتسەنتراتسياسىنا دا بەيىمدەلە الدى.

دەگەنمەن، اۆتورلار ەكسپەريمەنت ناتيجەلەرى ەنتسەلادتا تىرشىلىكتىڭ بار ەكەنىن دالەلدەمەيتىنىن اتاپ كورسەتەدى. تەك ونىڭ گەوحيميالىق جاعدايلارى، نەگىزىنەن، قۇرلىقتىق ميكروورگانيزمدەرگە ءتان ەڭ ەجەلگى مەتابوليزم تۇرلەرىنىڭ ءبىرى ءۇشىن جەتكىلىكتى بولا الاتىنىن كورسەتەدى.

ەنتسەلاد استروبيولوگيالىق تۇرعىدان كۇن جۇيەسىندەگى ەڭ قىزىقتى نىسانداردىڭ ءبىرى بولىپ سانالدى. «كاسسيني» عارىش كەمەسىنىڭ دەرەكتەرى ەنتسەلادتا ىشكى سۇيىق مۇحيتتىڭ بار ەكەنىن راستادى، ال ونىڭ مۇزدى بەتىنىڭ استىنان اتقىلاپ شىعاتىن ماتەريالدان سۋتەگى، مەتان، كومىرقىشقىل گازى جانە ورگانيكالىق قوسىلىستار انىقتالدى. بۇرىنعى زەرتتەۋلەر مۇنداي ورتا مەتانوگەندى ميكرواعزالار ءۇشىن قولايلى بولۋى مۇمكىن ەكەنىن كورسەتكەن.

ەنتسەلاد كوپتەن بەرى عالىمداردىڭ نازارىن اۋدارىپ كەلەدى. «كاسسيني» عارىش كەمەسى ونىڭ بەتىندە كوپتەگەن جىرالاردى جانە مۇزدى قابىعىنىڭ استىندا جاسىرىن مۇحيت جاتقانىن انىقتادى.

ساتۋرننىڭ ەڭ ۇلكەن تابيعي سەرىگى تيتاننىڭ دا قويناۋىندا مۇحيت بار ەكەنى بەلگىلى.

امەريكالىقتار 2040-جىلعا قاراي تيتانعا سۇڭگۋىر قايىق جىبەرمەك.