عالىمدار ەلەكتر قۋاتىن قاجەت ەتپەيتىن العاشقى كومپيۋتەر جاساپ شىعاردى

جۇيە حيميالىق رەاكسيالار ارقىلى ەسەپتەۋلەر جۇرگىزىپ، ناتيجەنى مولەكۋلالاردىڭ قالىپتاسقان قۇرىلىمى ارقىلى انىقتايدى، دەپ حابارلايدى turkystan.kz.

زەرتتەۋشىلەر ءداستۇرلى كومپيۋتەرلەردەگى ترانزيستورلاردىڭ ورنىنا د ن ق مولەكۋلالارىن قولدانعان. ارنايى ازىرلەنگەن جۇيەدە دنق جىپشەلەرى تۇزدى جىلى ەرىتىندىدەگى نۋكلەين قىشقىلىنىڭ «قاڭقاسىمەن» ارەكەتتەسەدى. ەرىتىندى سالقىنداعان كەزدە مولەكۋلالار ەڭ تومەن ەنەرگەتيكالىق كۇيگە كەلىپ، بەلگىلى ءبىر قۇرىلىم تۇزەدى. سول قۇرىلىم ەسەپتىڭ جاۋابى رەتىندە قابىلدانادى.

«مولەكۋلالار ءوزارا ارەكەتتەسىپ، قۇرىلىم تۇزەدى، ال سول قۇرىلىمنىڭ ءوزى - جاۋاپ»، - دەيدى زەرتتەۋدىڭ اعا اۆتورى، كومپيۋتەر عالىمى دەميەن ۆۋدس.

جاڭا جۇيە قوسۋ، كوبەيتۋ جانە ءبولۋ سياقتى ماتەماتيكالىق وپەراتسيالاردى ورىنداي الادى. سىناق بارىسىندا عالىمدار 100 بيتكە دەيىنگى كولەمدەگى بىرنەشە ەسەپتى ىسكە قوسقان. مىسالى، 3 پەن 10 دى قوسۋ شامامەن 30 سەكۋند ۋاقىت العان.

د ن ق- كومپيۋتەردىڭ باستى ەرەكشەلىگى - ەسەپتەۋلەردى پاراللەل تۇردە جۇرگىزە الۋى. ياعني ءبىر تامشى ەرىتىندىنىڭ ىشىندە وتە كوپ مولەكۋلا ءبىر ۋاقىتتا ءارتۇرلى ەسەپتەۋلەرگە قاتىسا الادى. بۇل تەحنولوگيا قازىرگى كرەمني نەگىزىندەگى كومپيۋتەرلەرگە قاراعاندا الدەقايدا باياۋ بولعانىمەن، ەنەرگيانى ۇزدىكسىز تۇتىنۋدى قاجەت ەتپەيدى.

زەرتتەۋ Nature جۋرنالىندا جاريالاندى. عالىمدار مۇنداي تەحنولوگيا بولاشاقتا ەنەرگيا شىعىنى از ەسەپتەۋ جۇيەلەرى مەن د ن ق ارقىلى اقپارات ساقتاۋ سالاسىندا قولدانىلۋى مۇمكىن دەپ سانايدى.