عالىمدار: ءتاتتى سۋسىندار اسقازان وبىرىنىڭ دامۋ قاۋپىن ارتتىرادى
استانا.قازاقپارات - امەريكالىق عالىمدار ءتاتتى سۋسىنداردى جۇيەلى تۇردە تۇتىنۋ اسقازان وبىرىنىڭ قاۋپىن ارتتىراتىنىن، ال ديەتالىق بالامالارى بۇل تۇرعىدا قاۋىپسىز ەكەنىن انىقتادى.
News Medical باسىلىمىنىڭ جازۋىنشا، ا ق ش عالىمدارى Gastro Hep Advances جۋرنالىندا جاريالانعان اۋقىمدى كوگورتالىق زەرتتەۋ جۇرگىزىپ، ءتاتتى جانە ديەتالىق سۋسىنداردى تۇتىنۋ مەن اسقازان وبىرىنىڭ اراسىنداعى بايلانىستى باعالادى. ماماندار ەكى ءىرى زەرتتەۋ جوباسىنىڭ: مەدبيكەلەر دەنساۋلىعىن زەرتتەۋ (NHS) جانە دەنساۋلىق ساقتاۋ ماماندارىن باقىلاۋ زەرتتەۋىنىڭ (HPFS) 112 284 قاتىسۋشىسىنىڭ دەرەكتەرىن تالدادى. باقىلاۋ كەزەڭىندە ەرىكتىلەر اراسىندا اسقازان ادەنوكارتسينوماسىنىڭ 278 جاعدايى تىركەلدى.
ناتيجەلەر كورسەتكەندەي، كۇنىنە ءبىر پورتسيادان (شامامەن 240 م ل) ارتىق ءتاتتى سۋسىن ىشكەن ادامداردا اسقازان وبىرىنا شالدىعۋ قاۋپى ولاردى ايىنا ءبىر رەتتەن سيرەك ىشەتىندەرگە قاراعاندا جوعارى بولعان. زەرتتەۋشىلەر بۇل ساناتقا قۇرامىندا قانت بار گازدالعان سۋسىنداردى، پۋنشتەردى، ليمونادتار مەن سپورتتىق سۋسىنداردى جاتقىزدى. اۋرۋشاڭدىقتىڭ جوعارىلاۋى ەكى تاۋەلسىز زەرتتەۋدە دە تۇتىنۋدىڭ ەڭ جوعارى ساناتىندا بايقالدى. سونداي-اق فرۋكتوزانى جالپى تۇتىنۋدىڭ وسى ونكولوگيالىق اۋرۋدىڭ تۋىنداۋ جيىلىگىمەن وڭ كوررەلياتسيادا ەكەنى انىقتالدى.
سونىمەن قاتار جاساندى تاتتىلەندىرگىشتەرى بار كالورياسى تومەن سۋسىنداردىڭ اسقازان وبىرىنىڭ دامۋ قاۋپىن ارتتىرۋمەن ەشقانداي بايلانىسى جوق ەكەنى بەلگىلى بولدى. Helicobacter pylori باكتەرياسى تۋرالى دەرەكتەرى بار قاتىسۋشىلاردىڭ ىشكى توبىندا عالىمدار ونىڭ بولۋى مەن گازدالعان سۋسىنداردى تۇتىنۋ اراسىندا بايلانىس تاپپادى. اۆتورلار ناقتى بيولوگيالىق مەحانيزمدەردى انىقتاۋ ءۇشىن ودان ءارى زەرتتەۋلەر جۇرگىزۋ قاجەتتىگىن اتاپ ءوتتى.
