ءاليا يۋسۋپوۆا كوركەم گيمناستيكادان ۇلتتىق قۇرامانىڭ باس باپكەرى قىزمەتىنەن كەتتى

استانا. KAZINFORM - بەلگىلى سپورتشى ءاليا يۋسۋپوۆا كوركەم گيمناستيكادان قازاقستان ۇلتتىق قۇراماسىنىڭ باس باپكەرى قىزمەتىنەن كەتتى.

Әлия Юсупова көркем гимнастикадан ұлттық құраманың бас бапкері қызметінен кетті
Фото: kazgymfederation

بۇل تۋرالى ءا. يۋسۋپوۆا Instagram الەۋمەتتىك جەلىسىندەگى پاراقشاسىندا جاريا ەتتى.

ەكى بىردەي وليمپياداعا قاتىسقان ونىڭ مالىمدەۋىنشە، 2009-جىلى سپورتتىق مانسابىن اياقتاعان سوڭ، ءوزىن باپكەرلىك قىزمەتتە سىناپ كورگىسى كەلگەن.

- مەن ءوزىم دايىنداعان سپورتشىنى وليمپياداعا شىعارىپ، سول ويىندارعا باپكەر رەتىندە قاتىسۋدى ماقسات ەتتىم. 2012-جىلى ماعان وسىنداي مۇمكىندىك بەرىلىپ، قازاقستان قۇراماسىنىڭ باس باپكەرى قىزمەتىنە كىرىستىم. ءۇش وليمپيادادا ءبىز جاقسى ناتيجەلەر كورسەتە الدىق. ءۇش رەت گيمناستتاردى ءتورتجىلدىقتىڭ باستى دوداسىنا دايىنداعانىما وتە قۋانىشتىمىن، - دەيدى ءا. يۋسۋپوۆا.

ول جاۋاپتى قىزمەتتە وزىنە سەنىم ارتقانى ءۇشىن قازاق ەلىنە، باسشىلىققا العىسىن ءبىلدىردى.

- 2025-جىلدىڭ قاڭتارىنان باستاپ باس باپكەر قىزمەتىنەن كەتەمىن. ويتكەنى فەدەراتسياداعى جۇمىسقا تولىقتاي كوڭىل بولگىم كەلەدى. وسىلايشا، باسقا باپكەرلەرگە وزدەرىن كورسەتۋگە مۇمكىندىك بەرۋدى ءجون كوردىم. بارشاڭىزعا ساتتىلىك تىلەيمىن، - دەدى ءاليا يۋسۋپوۆا.

قازاقستان گيمناستيكا فەدەراتسياسىنان تۇسكەن مالىمەتكە قاراعاندا، يۋسۋپوۆانىڭ جەتەكشىلىگىمەن قازاقستاندىق گيمناستتار حالىقارالىق ارەنالاردا تابىسقا جەتىپ، قۇرلىقتىق چەمپيوناتتاردا، ازيا ويىندارىندا جانە الەمدىك تۋرنيرلەردە بىرنەشە مەدال جەڭىپ الدى.

ەسكە سالا كەتەيىك، بۇدان بۇرىن كوركەم گيمناسيكا شەبەرى ەلجانا تانيەۆانىڭ سپورتتىق مانسابىن اياقتاعانىن جازعان بولاتىنبىز.

سوڭعى جاڭالىقتار