ءالي اليەۆ فۋتبولدان قازاقستان قۇراماسىن جاتتىقتىرادى
استانا. KAZINFORM - قازاقستان ۇلتتىق قۇراماسى باس باپكەرىنىڭ مىندەتىن ۋاقىتشا اتقارۋشى بولىپ وتاندىق مامان ءالي اليەۆ تاعايىندالدى.

قازاقستان فۋتبول فەدەراتسياسىنىڭ باسپا ءسوز قىزمەتىنەن ءمالىم ەتكەنىندەي، ءالي حانالي ۇلى 1980-جىلى 27-قازاندا الماتى قالاسىندا دۇنيەگە كەلگەن.
فۋتبولشى مانسابىندا «تسسكا-قايرات»، «قايرات»، «ەرتىس»، «توبىل»، «شىعىس»، «ورداباسى» جانە « قىزىلجار» كلۋبتارىندا وينادى. سونداي-اق تۇركيانىڭ «اكچاابات سەباتسپور»، «كايسەري ەردجيەسپور»، «كارتالسپور» جانە «ديارباكىرسپور» كوماندالارىندا ونەر كورسەتكەن.
1999-جىلى قازاقستان جاستار قۇراماسى ساپىندا نيگەريادا وتكەن جاستار اراسىنداعى الەم چەمپيوناتىنا قاتىستى. ۇلتتىق قۇراما ساپىندا العاشقى ماتچىن 2002-جىلى ەستونياعا قارسى وتكىزدى.
باپكەرلىك مانسابىن 2014-جىلى «ورداباسى» ساپىندا ويىنشى ءارى باپكەر رەتىندە باستادى. 2018-جىلى فۋتبولشى مانسابىن اياقتاعان سوڭ پەتروپاۆلدىڭ «قىزىلجار» كلۋبىنىڭ تىزگىنىن ۇستاپ، پرەمەر-ليگاعا شىعاردى.
2021-جىلى اليەۆ قاراعاندىنىڭ «شاحتەر» كلۋبىندا باس باپكەر بولىپ جۇمىس ىستەپ، كەيىن «استانا» ف ك جاستار كومانداسىن باسقاردى.
2022-جىلى «جەڭىس» كومانداسىن جاتتىقتىرىپ، سودان كەيىن قايتادان «قىزىلجارعا» ورالدى. ءالي اليەۆتىڭ جەتەكشىلىگىمەن پەتروپاۆلدىق كلۋب ۋ ە ف ا كونفەرەنسيا ليگاسى ىرىكتەۋ كەزەڭىنىڭ ءۇشىنشى اينالىمىنا دەيىن جەتتى.
سونىمەن قاتار نۇربول جۇماسقالييەۆ پەن ەلدوس احمەتوۆ قازاقستان قۇراماسى باس باپكەرىنىڭ كومەكشىلەرى بولدى.
ورال فۋتبولىنىڭ تۇلەگى نۇربول جاردەم ۇلى - پرەمەر-ليگادا ەڭ كوپ ماتچ وتكىزگەن ويىنشى جانە ۇزدىك سۇرمەرگەنى. ول 526 كەزدەسۋدە 167 گول سوققان.
2001-2014-جىلدار ارالىعىندا قازاقستان ۇلتتىق قۇراماسىنىڭ نامىسىن قورعاپ، 58 ماتچقا قاتىستى.
2021-2023-جىلدارى قازاقستان جاستار قۇراماسى باس باپكەرىنىڭ كومەكشىسى بولدى.
قازىرگى ۋاقىتتا نۇربول جۇماسقالييەۆ قوستانايدىڭ «توبىل» كلۋبىنىڭ باس باپكەرى قىزمەتىن اتقارادى.
ەلدوس احمەتوۆ 2012-2022-جىلدار ارالىعىندا قازاقستان ۇلتتىق قۇراماسىندا ونەر كورسەتتى. 2024-جىلى جاستار قۇراماسىنىڭ باس باپكەرىنىڭ كومەكشىسى قىزمەتىن اتقارىپ، ال سول جىلدىڭ قازان ايىندا ۇلتتىق قۇرامانىڭ باپكەرلىك شتابىنا قوسىلدى.
ەسكە سالا كەتەيىك، بۇدان بۇرىن اعىلشىندىق كلۋبتىڭ 17 جاستاعى ويىنشىسى گول سوعىپ، رەكورد جاساعانىن جازعان ەدىك.