ءال-فارابي اتىنداعى قازاق ۇلتتىق ۋنيۆەرسيتەتىنە مينيسترلىكتىڭ ارنايى توبى بارادى
استانا. KAZINFORM - قازاقستان رەسپۋبليكاسى عىلىم جانە جوعارى ءبىلىم مينيسترلىگى ءال-فارابي اتىنداعى قازاق ۇلتتىق ۋنيۆەرسيتەتىندە ستۋدەنتتەردىڭ قاۋىپسىزدىگىن قامتاماسىز ەتۋ شارالارىن تەكسەرەدى. بۇل تۋرالى مينيسترلىك حابارلادى.
وسى ماقساتتا ۋنيۆەرسيتەتكە ارنايى مونيتورينگتىك توپ جىبەرىلەدى. ماماندار ستۋدەنتتەردىڭ ءومىرى مەن دەنساۋلىعىن قورعاۋعا قاتىستى زاڭ تالاپتارى مەن ىشكى ەرەجەلەردىڭ ساقتالۋىن تەكسەرەدى. سونداي-اق تاربيە، الەۋمەتتىك-پسيحولوگيالىق جانە پروفيلاكتيكالىق جۇمىستاردىڭ تيىمدىلىگىنە باعا بەرەدى.
- تەكسەرۋ كەزىندە جانجالداردىڭ الدىن الۋ، ستۋدەنتتەردىڭ وتىنىشتەرىنە ۋاقىتىلى جاۋاپ بەرۋ جانە ولارعا پسيحولوگيالىق كومەك كورسەتۋ تەتىكتەرىنە ەرەكشە نازار اۋدارىلادى، - دەلىنگەن حابارلامادا.
مونيتورينگ قورىتىندىسى بويىنشا ستۋدەنتتەر قاۋىپسىزدىگىن ارتتىرۋ جانە پروفيلاكتيكالىق جۇمىستى جەتىلدىرۋ جونىندە قوسىمشا شارالار ازىرلەنەدى.
ەسكە سالايىق، كەشە ءال-فارابي اتىنداعى قازاق ۇلتتىق ۋنيۆەرسيتەتىنىڭ گەوگرافيا جانە تابيعاتتى پايدالانۋ فاكۋلتەتىندە وقىعان ءبىرىنشى كۋرس ستۋدەنتى مەرت بولعانى بەلگىلى بولدى.
وسى وقيعادان كەيىن قاز ۇ ۋ- دا پرورەكتور مەن دەكان جۇمىسىنان كەتتى.