ءال-اۋقاتتى تەكسەرۋ: ەندى جاردەماقى ءۇشىن اجىراسۋ كومەكتەسپەيدى
استانا. KAZINFORM - ەلىمىزدە مەملەكەتتىك الەۋمەتتىك كومەك تاعايىنداۋ كەزىندە جەكە ادامنىڭ عانا ەمەس، تۇتاس ءۇي شارۋاشىلىعىنىڭ ماتەريالدىق جاعدايى ەسكەرىلەدى.
باعالاۋ كەزىندە بولەك تۇراتىن اتا-انالار دا بالانىڭ وتباسى قۇرامىنا ەنگىزىلەدى. وسىلايشا جاردەماقى ءۇشىن اجىراسۋدىڭ الدىن الۋ كوزدەلگەن.
ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆتىڭ ايتۋىنشا، 30-قىركۇيەكتە بەكىتىلگەن الەۋمەتتىك ءال-اۋقات دەڭگەيىن ايقىنداۋدىڭ جاڭا ادىستەمەسى بەكىتىلگەن. جاڭا ادىستەمەدە ەكى نەگىزگى كومپونەنت - ماتەريالدىق ءال-اۋقات جانە الەۋمەتتىك تۇراقتىلىق قارالادى.
-ءبىرىنشىسى - ماتەريالدىق ءال-اۋقات. ول التى باعىت بويىنشا 59 كورسەتكىشتى قامتيدى. ولاردىڭ قاتارىندا كىرىس جانە جۇمىسپەن قامتۋ، جىلجىمايتىن مۇلىك، كولىك، بيزنەس، اۋىل شارۋاشىلىعى اكتيۆتەرى جانە كرەديتتەر ەسەپتەلەدى، - دەدى ا. ەرتايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
مالىمەتتەر مەملەكەتتىك بازادان الىنادى. ازاماتتاردان قوسىمشا انىقتاما تالاپ ەتىلمەيدى.
باعالاۋ بارلىق وتباسى ءۇشىن ءبىرىڭعاي كريتەريلەر بويىنشا اۆتوماتتى تۇردە جۇرگىزىلەدى.
- ەكىنشى كومپونەنت - وتباسىنىڭ الەۋمەتتىك تۇراقتىلىعى. وتباسىنىڭ قۇرامى، ونىڭ ىشىندە بالالاردىڭ، قارت ادامداردىڭ جانە مۇگەدەكتىگى بار ادامداردىڭ بولۋى ەسكەرىلەدى. اسىراۋىنداعى ادامداردىڭ جۇكتەمەسى بارىنشا جوعارى بولسا، وتباسىنىڭ الەۋمەتتىك تۇراقتىلىعى تومەن بولادى، - دەيدى ەڭبەك ءمينيسترى.
وسىلايشا، تابىستىڭ بىردەي بولۋى ءال-اۋقات دەڭگەيىنىڭ بىردەي ەكەنىن بىلدىرمەيدى. الەۋمەتتىك جۇكتەمەسى جوعارى وتباسىلارعا ءتيىستى باعا بەرىلەدى.
ءبىر مەكەنجاي بويىنشا تىركەلگەن وتباسى مۇشەلەرى، تۋىستارى جانە بىرگە تۇراتىن باسقا ادامدار ەسەپكە الىنادى. ولاردىڭ تابىسى مەن مۇلكى ەسكەرىلەدى.
- جالعىز تۇراتىن اتا-انالار بولەك تۇرعان جاعدايدا دا بالالارىنىڭ وتباسى قۇرامىنا ەنگىزىلەدى، - دەدى اسقاربەك ەرتايەۆ.
بۇعان دەيىن ا. ەرتايەۆ بىردە-ءبىر مۇقتاج قازاقستاندىق قولداۋسىز قالمايتىنىن ايتقان ەدى.
قۇرىلتاي دەپۋتاتى ءلاززات قوجاحمەت جۇمىس ىستەيتىن ايەلدەردىڭ دەكرەتتىك تولەمى ساقتالاتىنىن ايتقان ەدى.
