ءاجىم، قارا داق، بەزەۋ، تەرى اۋرۋلارى: ەكراننان تۇسەتىن جارىق تەرىگە زيان كەلتىرەدى
استانا. قازاقپارات - كەي زەرتتەۋلەر كوك جارىق كوللاگەنگە، تەرى قۇرىلىمى ءۇشىن ماڭىزدى اقۋىزعا زاقىم كەلتىرىپ، اجىمدەردىڭ پايدا بولۋىن جەدەلدەتۋى مۇمكىن ەكەنىن كورسەتەدى.
ەكراننان تۇسەتىن كوك جارىق تەرىگە ءاجىم مەن قارا داق تۇسىرەدى، دەپ جازدى sciencealert.com.
سونىمەن، ەكراننىڭ جارىعى تەرىمىزگە شىنىمەن زيان تيگىزە مە؟ كوك جارىق دەگەنىمىز نە؟
كوك جارىق - جارىق سپەكترىنىڭ ءبىر بولىگى. كۇن ساۋلەسى ونىڭ ەڭ كۇشتى كوزى سانالادى. ءبىراق ەلەكتروندى قۇرىلعىلارىمىز - تەلەفون، نوۋتبۋك پەن تەلەديدار دا كوك جارىق شىعارادى، ءبىراق الدەقايدا تومەن دەڭگەيدە. ءبىز بۇل قۇرىلعىلاردى كوپ قولدانعاندىقتان، كوك جارىق دەنساۋلىعىمىزعا، سونىڭ ىشىندە كوزىمىزگە جانە ۇيقىمىزعا كەرى اسەر ەتۋى مۇمكىن ەكەنىنە بايلانىستى الاڭداۋشىلىق بار.
كوك جارىقتىڭ تەرىگە اسەرى تۋرالى دالەلدەر ءالى دە زەرتتەلىپ جاتىر. دەگەنمەن، كەيبىر قىزىق تۇجىرىمدار بار.
زەرتتەۋلەر كوك جارىق مەلانين اتتى تەرىگە ءتۇس بەرەتىن تابيعي پيگمەنت ءوندىرىسىن ىنتالاندىرۋى مۇمكىن ەكەنىن كورسەتەدى. سوندىقتان كوك جارىقتىڭ شامادان تىس اسەرى گيپەرپيگمەنتاتسياعا اكەپ سوعۋى ىقتيمال.
كەي زەرتتەۋلەر كوك جارىق كوللاگەنگە، تەرى قۇرىلىمى ءۇشىن ماڭىزدى اقۋىزعا زاقىم كەلتىرىپ، اجىمدەردىڭ پايدا بولۋىن جەدەلدەتۋى مۇمكىن ەكەنىن كورسەتەدى.
كوز اينالاسىنداعى تەرى سولعىن نەمەسە ىسىنگەن بولىپ كورىنسە، مۇنى كوك جارىقتىڭ تىكەلەي اسەرى دەپ ايىپتاۋ وڭاي. ءبىراق ءبىز كوك جارىقتىڭ ۇيقىعا اسەر ەتەتىنىن بىلەمىز. كوك جارىق مەلاتونين ءوندىرىسىن باسۋ ارقىلى بۇل تابيعي پروتسەستى بۇزادى، ۇيىقتاۋدى قيىنداتىپ، ۇيقى ساپاسىن تومەندەتۋى مۇمكىن.
ۇزاققا سوزىلعان ۇيقى پروبلەمالارى سونىمەن قاتار بەزەۋ، ەكزەما جانە روزاتسەا سياقتى تەرى اۋرۋلارىن ناشارلاتۋى مۇمكىن. ۇيقىنىڭ جەتىسپەۋشىلىگى تەرىنىڭ تابيعي قورعانىس قاباتىن السىرەتىپ، ونى قورشاعان ورتا اسەرىنە جانە قۇرعاۋعا بەيىم ەتەدى.
