عاشىقتار كۇنى: ش ق و-داعى ەڭ مەرەيلى وتباسى اتانعان ەرلى-زايىپتىنىڭ وزىندىك ەرەجەلەرى بار
وسكەمەن. قازاقپارات - 15-ءساۋىر - قوزى كورپەش - بايان سۇلۋ كۇنى. ماحابباتتىڭ سيمۆولىنا اينالعان قوس عاشىقتىڭ اتى بەرىلگەن بۇل كۇندە جاستار ءبىر-بىرىنە سەزىمىن ءبىلدىرىپ، جۇپتار سىيلىق بەرىسىپ، ەكىنشى سىڭارىن قۋانتىپ جاتادى.
تەك جاستار ەمەس، ءبىر شاڭىراقتىڭ استىندا ۇزاق جىل تۇرىپ كەلە جاتقاندار دا مەرەكەنى اتاپ وتىسەدى. سولاردىڭ ءبىرى – ش ق و بويىنشا «مەرەيلى وتباسى» كۋبوگىنىڭ جەڭىمپازى اتانعان كوپبالالى ەرلى-زايىپتى جانبولات مۇرات پەن كەنجەگۇل دۇيسەنباي قىزى.
ەكەۋىنىڭ سەرت بەرىسىپ، وتباسىن قۇرعانىنا بيىل 17 جىل تولىپ وتىر. ستۋدەنتتىك شاقتا تانىسىپ، ءبىر-بىرىنە سەزىمى ويانعان.
«رامازان ايى بولاتىن. ورتاق تانىستارىمىز اۋىزاشارعا شاقىرىپ، سول جەردە تانىستىق. قاسيەتتى ايدا جولىققانىمىزدى جاقسىلىققا بالادىق. ءسويتىپ، ەكى جارتى ءبىر ءبۇتىن بولىپ قوسىلدىق. قازىر 4 بالامىز بار. تۇڭعىشىمىز انەل 14 جاستا، ەكىنشى بالامىز ەرسۇلتان 11 دە، ءۇشىنشىمىز ماليكا 9 دا، كەنجەمىز بەكارىس 2 جارىمدا»، - دەيدى جانبولات مۇرات.
وتاعاسى وسكەمەندەگى جەكە مەنشىك كومپانيادا ماشينيست بولىپ جۇمىس ىستەيدى. ال ايەلى اباي اتىنداعى №33-ورتا مەكتەپتە مۇعالىم. بالالارىنىڭ ءبارى ءبىلىمدى، شەتىنەن ونەرلى. ءارتۇرلى سايىستارعا قاتىسىپ جۇلدەلى ورىنداردى يەلەنۋدە. ءبىلىمىن قالالىق، وبلىستىق، رەسپۋبليكالىق وليمپيادالاردا پاش ەتىپ جۇرسە، ونەر، سپورت جاعىنان دا گراموتالار مەن مەدالدارى جەتەرلىك. ودان كەيىن وتباسىنىڭ ءوزى دە سان الۋان سايىستاردان باسقالاردان وق بويى وزىق شىعىپ ءجۇر.
«ءبىز نەگىزىنەن وسىنداي سايىستارعا اۋەلدە قاتىسپادىق. بۇل بالالارىمىزدىڭ تىلەگى ەدى. ءبىر جەردەن وقىپ الادى دا، «قاتىسايىقشى» دەپ قويماي قويادى. كوڭىلىن قالدىرعىمىز كەلمەيدى. ءسويتىپ، العاش رەت «اكەم، انام جانە مەن» دەگەن سپورتتىق جارىسقا قاتىسىپ كوردىك. قارسىلاستارىمىز مىقتى بولدى. ءبىراق ويلاماعان جەردەن ءۇشىنشى ورىندى يەلەندىك. اقشالاي، زاتتاي سىيلىقتار الىپ، تاماشا كوڭىل كۇيمەن قايتتىق. سودان سوڭ «ونەگەلى ەنە، يبالى كەلىن» دەگەن بايقاۋعا قاتىسىپ باس جۇلدە الدىق. وبلىستىق دەڭگەيدە وتكەن بايقاۋدا ونەرلەرىمىزدى، سالت- ءداستۇردى قانشالىقتى بىلەتىنىمىزدى پاش ەتتىك. وعان اجەمىز دە، بالالارىمىز دا تۇگەل قاتىستى. ال بىلتىر وتباسى كۇنىندە «مەرەيلى وتباسى» كۋبوگىن جەڭىپ الدىق»، - دەيدى كەنجەگۇل دۇيسەنباي قىزى.
ەرلى-زايىپتى شاڭىراق كوتەرگەن كۇننەن باستاپ وزدەرىنىڭ ەرەجەلەرىن بەكىتكەن. بالالارى دۇنيەگە كەلگەندە سول ەرەجەلەرگە از- ماز وزگەرىس ەنگىزىلىپ وتىرىپتى. ءۇيدىڭ ەركەلەرى دە وتباسىنىڭ ىشكى زاڭدارىن جاقسى بىلەدى.
«وتباسىمىزدىڭ نەگىزگى ەرەجەلەرىن جاتقا بىلەمىز. ءبىرىنشى - ەرتە تۇرۋ. ءبىز ءتىپتى دەمالىس كۇندەرى دە ەرتە تۇرامىز. سوندا جوسپارلارىمىزدى ىسكە اسىرۋعا ۋاقىت كوپ بولادى. ەكىنشى - ءوز سۇيىكتى ىسىمىزبەن اينالىسۋ. ءۇشىنشى - ەشقاشان مويىماۋ، وزىڭە سەنۋ. ءتورتىنشى - تازالىقتى ساقتاۋ. بەسىنشى - ءبىر- بىرىمىزگە كومەكتەسۋ، قامقور بولۋ، بەرگەن ۋادەنى ورىنداۋ»، - دەيدى ەكىنشى بالالارى ەرسۇلتان.
جانبولات مۇراتتىڭ ايتۋىنشا، وتاعاسىنىڭ ەڭ نەگىزگى مىندەتى - ايەلىن، بالا-شاعاسىن اسىراۋ، كەرەك-جاراعىن الىپ بەرۋ. ودان كەيىن قورعان بولىپ، ۇل-قىزدارىنا دۇرىس تاربيە بەرۋ. ال كەنجەگۇل دۇيسەنباي قىزى ءوز سوزىندە ۇيدە مىناۋ ايەلدىڭ، وسى ەركەكتىڭ مىندەتى دەپ بەكىتىپ تاستاعان دۇرىس ەمەستىگىن جەتكىزدى.
«قازىر نازىك جاندىلار اراسىندا ۇلكەن لاۋازىمداردا قىزمەت اتقارىپ، ەل باسقارىپ جۇرگەندەر بار. اس ۇيدە تاماقتى ءدامىن ءتىل ۇيىرەتىندەي ەتىپ پىسىرەتىن ەر ادامدار دا كەزدەسەدى. سوندىقتان ەرلى-زايىپتىلار اراسىندا مىندەتتەردى بەكىتىپ تاستاماعان دۇرىس. بىزدە ۇيگە ءبىرىنشى كىم كەلسە سول تاماق پىسىرەدى. ۇنەمى ءبىر-بىرىمىزگە كومەك كورسەتەمىز. بالالارىمىزدى دا سوعان تاربيەلەپ جاتىرمىز»، - دەيدى وتاناسى.
شاتتىق ۇيالاعان وتباسى تەك مەرەكەلەردە ەمەس، بىلاي كۇندەرى دە قىدىرىپ، بىرگە ۋاقىت وتكىزگەندى ۇناتادى. باسقا قالالارعا ساپار شەگىپ، جاڭا جەرلەردى كورىپ جاڭا ەموتسيالار الىپ تۇرادى.
«وسى ءساتتى پايدالانىپ قازاقستاندىقتاردى عاشىقتار كۇنىمەن شىن جۇرەكتەن قۇتتىقتايمىز! قوزى كورپەش پەن بايان سۇلۋ جاس بۋىنعا ناعىز ماحابباتتىڭ قانداي بولۋى كەرەكتىگىنىڭ جارقىن ۇلگىسى. سوندىقتان بۇل كۇن قىز-جىگىتتەرگە ءبىر-بىرىنە ادال بولۋعا، سەزىمى ءۇشىن كۇرەسە بىلۋگە شاقىرادى»، - دەيدى كەنجەگۇل دۇيسەنباي قىزى.
اۆتور
تالعاتجان مۇحامەتبەك ۇلى
