عابيت مۇسىرەپوۆ: مەن قازاقتىڭ قازاقتىعىنا جەتەرلىك ەشتەڭە بار دەپ ويلامايمىن
استانا. Kazinform - افوريزم - شاعىن فيلوسوفيالىق وي، تاجىريبەلىك ءتۇيىن، لوگيكالىق قيسىن. افوريزمنىڭ باستى شارتتارى - ومىرلىك قۇبىلىستارعا جانە ادام مىنەزىنە دەگەن كوزقاراستاعى انىقتىق، ويدى جەتكىزۋدەگى دالدىك پەن قىسقالىق. افوريزم - وي تامىزىعى. «افوريزمدەر» ايدارىندا عابيت مۇسىرەپوۆ، باۋىرجان مومىش ۇلى ويلارىن ۇسىندىق.
1) مەن قازاقتىڭ قازاقتىعىنا جەتەرلىك ەشتەڭە بار دەپ ويلامايمىن.
2) تەك ىرىلىك قانا اڭىزعا اينالادى.
3) قازاق ەلى - ءالى دالا تابيعاتىمەن ءوزىن تۇتاس سەزىنەتىن ەل.
4) وي دا تۇتقىندالادى.
5) سوزشەڭدىك - ۋاقىت تراگەدياسى.
6) ۇلى اقىندار ءجابىر-جاپا، قورلىققا تولى قيانات جىلدار مەن زامانداردا ءبىر ايقاي سالماي قالعان ەمەس.
7) ءبىر ادامنىڭ جۇزىندە ەكى-ءۇش ءتۇرلى سەزىمنىڭ بەلگىلەرى بولا بەرەدى ەكەن-اۋ...
8) ادامنىڭ بەت تەرىسى ميى جاسالعان ماتەريادان بولسا كەرەك. سوندىقتان ميىنا (ويىنا، سەزىمىنە، كوڭىلىنە) كەلگەنى - قولما-قول بەتكە شىعا كەلەدى.
9) جامان ءتىل - مادەنيەتسىزدىكتىڭ بەلگىسى، ەلمەن بايلانىس ءۇزىلۋى.
10) كوبىكتىڭ كولەڭكەسىندەي عانا ەلەس بەرەتىن ويلار بولادى.
11) جالعىز شام ءتۇندى تۇتاس جارىققا اينالدىرا المايدى.
12) قازاقتىڭ قايعى-قۋانىشىندا بۇرقان-تارقاندىق جوق، بايسالدى سالماقتىلىق بار. قايعىسى ۇزاققا سوزىلادى، قۋانىشى تەز باسىلادى.
13) قازاقتىڭ ءبىر وقىس مىنەزى: ەموتسيا ۇستىندە كەلىپ قالعان بايلامعا توقتايدى.
14) مەنىڭ بىلەرىم: قاي جازۋشىنىڭ بولسىن سوڭعى ءسوزى ايتىلماي كەتەدى.
باۋىرجان مومىش ۇلى:
1) ادىلدىكتى مويىنداۋ - ادال كىسىنىڭ ءىسى.
2) باتىرلىق تاۋەكەل مەن اقىلدىڭ ەسەبىنەن شىعۋعا ءتيىس. تاۋەكەل كەيدە اقىلدى دا اقتاپ الادى. ال اقىلسىز تاۋەكەلدى ەشتەڭە دە اقتاپ الا المايدى.
3) ىلعي التىن ىزدەمە - شوقتىڭ ءبارى وت بولماس،
سۇلۋ سوزگە قۇل بولما - زەرلى وي وندا كوپ بولماس.
4) اقىلگويلىك كەيدە ونەگەسىزدىككە تىرەيدى.
5) اسىرە ادالدىق جالعاندىقپەن پارا-پار.
6) ءتىل تازالىعى ءۇشىن كۇرەس ەشقاشان تولاستامايتىن ماڭگىلىك كۇرەس.
ەربول شايمەردەن ۇلى قۇراستىرعان «قازاق افوريزمدەرى» كىتابىنان الىندى
