بۇزاقىلىلار ايالدامانى قيراتقان سايىن قالتامىزدان قانشا اقشا تولەپ ءجۇرمىز
استانا. KAZINFORM - بۇزاقىلىق ءۇشىن قالتامىزدان شىعاتىن شىعىن قانشا؟ «جاڭا ادامدار» جاستار قوزعالىسى ۆانداليزمگە قارسى ناۋقان باستادى.

جاڭا ادامداردىڭ «ۆانداليزمoff» ازاماتتىق ناۋقانىنىڭ بەلسەندىلەرى قوعامدىق مۇلىكتى جويۋعا قارسى كەزەكتى اكسيا وتكىزدى.
ولار جۇك كولىگىنە سىنعان ايالداما قالدىقتارىن سالىپ الىپ، استانا كوشەلەرىمەن الىپ ءجۇردى. ءسويتىپ جۇرتشىلىقتىڭ نازارىن وسى ماسەلەگە اۋداردى.
كولىكتىڭ بۇيىرىندەگى جازۋ وسىنداي ءبىر عانا نىساندى جويۋ قانشا تۇراتىنىن قاپەرىمىزگە سالادى.
«قوقىس الاڭىنا 3 ميلليون تەڭگە اپارا جاتىرمىز» - كادىمگى قالالىق قوعامدىق كولىك ايالداماسى بۇزىلعان سايىن قالتامىزدان شىعاتىن سوما كولەمى وسىنداي.
ناۋقاندا سالىق تولەۋشىلەردىڭ مەملەكەتتىك نىسانداردى قالپىنا كەلتىرۋ مەن كۇتىپ ۇستاۋعا جۇمسايتىن قوماقتى قارجىلىق شىعىنىنا نازار اۋدارىلدى.

ايالدامانىڭ ورتاشا قۇنى 3 ميلليون تەڭگەگە باعالانىپ وتىر. ناۋقانعا قاتىسۋشىلار حالىقتى قوعامدىق ينفراقۇرىلىمعا زيان كەلتىرمەۋگە شاقىرىپ، ونىڭ ازاماتتاردىڭ جايلىلىعىن قامتاماسىز ەتۋ جانە قوعام ءومىرىن جاقسارتۋداعى ماڭىزىن اتاپ ءوتتى.
«قازاقستان - ءبىزدىڭ ارەكەتتەرىمىزدىڭ جيىنتىعى، بىرلەسكەن جۇمىسىمىزدىڭ ناتيجەسى. بۇزاقىلىق مۇلىكتى عانا ەمەس، ءبىزدىڭ جۇمىسىمىزدىڭ ناتيجەسىن، بولاشاعىمىزدى قيراتادى. پاتەرىمىز بولسىن، كوشەدەگى ايالداما بولسىن، ەلىمىزدىڭ ءار بۇرىشىنا ۇقىپپەن قاراۋىمىز قاجەت. قازاقستاننىڭ بولاشاعى مەن وركەندەۋىنە ءارىبىرىمىز جاۋاپتىمىز. جاڭا ادىلەتتى قازاقستاندى بىرگە قۇرايىق»، - دەيدى «ۆانداليزمoff» ازاماتتىق ناۋقانىنىڭ كوشباسشىسى اقەركە احپانبايەۆا.