بيزنەستىڭ ورنىقتى دامۋى ماقساتتارىنا قوساتىن ۇلەسى ماڭىزدى - ماۋلەن اشىمبايەۆ
استانا. KAZINFORM - قازاقستان ورنىقتى دامۋ، وزىق قارجى قۇرالدارىن پايدالانۋ، ەكولوگيالىق جانە الەۋمەتتىك ماقساتتارعا قول جەتكىزۋ ءۇشىن ءتيىستى قاعيدالاردى دارىپتەۋگە مۇددەلى.
بۇل تۋرالى قازاقستاننىڭ ورنىقتى دامۋى سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىن مونيتورينگىلەۋ جونىندەگى پارلامەنتتىك كوميسسيا وتىرىسىندا سەنات ءتوراعاسى ماۋلەن اشىمبايەۆ ءمالىم ەتتى.
«ورنىقتى دامۋدىڭ جاھاندىق كۇنتارتىبىن جۇزەگە اسىرۋ - تەك ءتيىستى مەملەكەتتىك ساياساتقا عانا بايلانىستى ەمەس. بۇل رەتتە، ونى ىسكە اسىرۋعا بارلىق تاراپتىڭ، سونىڭ اراسىندا بيزنەس ورتانىڭ قاتىسۋى دا اسا ماڭىزدى. سول سەبەپتى پارلامەنتتىك كوميسسيانىڭ بۇگىنگى وتىرىسى بيزنەستىڭ ورنىقتى دامۋى ماقساتتارىنا قول جەتكىزۋگە قوساتىن ۇلەسىنە قاتىستى ماسەلەلەرگە ارنالىپ وتىر. حالىقارالىق تاجىريبە بيزنەستىڭ قىزمەتىندەگى ەكولوگيالىق، الەۋمەتتىك جانە باسقارۋ اسپەكتىلەرىن ناقتىلاۋ ءۇشىن ESG (ەكولوگيالىق، الەۋمەتتىك جانە كورپوراتيۆتىك باسقارۋ) قاعيدالارى ازىرلەنگەن. ولار ورنىقتى دامۋ ماقساتتارىمەن ۇندەسەتىنىن اتاپ وتكەن ءجون. جالپى، قازىر الەمدە ESG قاعيدالارىن ەنگىزۋ تۇراقتى بيزنەس قالىپتاستىرۋعا، ونى باسەكەگە قابىلەتتىگىن ارتتىرۋعا جانە ۇزاق مەرزىمدى قۇندىلىقتاردى دارىپتەۋگە ىقپال ەتەدى»، - دەدى م. اشىمبايەۆ.
ونىڭ ايتۋىنشا، ينۆەستورلار مەن تۇتىنۋشىلار كوبىنە وسىنداي ەكولوگيالىق جاۋاپكەرشىلىكتى سەزىنەتىن، قىزمەتكەرلەرى مەن قوعامعا قامقورلىقپەن قارايتىن جانە كورپوراتيۆتىك باسقارۋدىڭ جوعارى ستاندارتتارىن ۇستاناتىن كومپانيالارعا باسىمدىق بەرەدى.
«بۇل ماسەلەلەر قازاقستان ءۇشىن دە وزەكتى ەكەنى بەلگىلى. پرەزيدەنت قاسىم- جومارت كەمەل ۇلى توقايەۆ ەل ەكونوميكاسىنا ينۆەستيتسيا، اسىرەسە، «جاسىل» قارجى تارتۋعا باسا مەن بەرىپ وتىر. مەملەكەت باسشىسى ESG قاعيدالارىن ساقتاۋدىڭ ماڭىزى زور ەكەنىن دە اتاپ ءوتتى. جالپى، ورنىقتى دامۋ ءۇشىن اتالعان ستاندارتتاردىڭ وتە ماڭىزدى ەكەنى ءسوزسىز. سوندىقتان قازاقستان ورنىقتى دامۋ، وزىق قارجى قۇرالدارىن پايدالانۋ، ەكولوگيالىق جانە الەۋمەتتىك ماقساتتارعا قول جەتكىزۋ ءۇشىن ءتيىستى قاعيدالاردى دارىپتەۋگە مۇددەلى. دەگەنمەن، بۇل باعىتتا شەشىمىن كۇتكەن ماسەلەلەر دە جوق ەمەس. وسىعان وراي پارلامەنتتىك كوميسسيانىڭ بۇگىنگى وتىرىسىندا بيزنەس ورتانىڭ ەكولوگيالىق جانە الەۋمەتتىك جاۋاپكەرشىلىگىنە، سونداي-اق ەلىمىزدە ESG قاعيدالارىن ەنگىزۋگە قاتىستى ماسەلەلەردى قاراستىرامىز»، - دەدى سەنات ءتوراعاسى.
