بەيىندىك سىنىپتار 1000 مەكتەپتە اشىلادى
استانا. KAZINFORM - وقۋ-اعارتۋ ءمينيسترى عاني بەيسەمبايەۆ ۇكىمەت وتىرىسىندا جۇمىسشى ماماندىقتار جىلى اياسىندا بۇكىل وڭىرلەردە «جاڭا كاسىپتەر اتلاسى» ازىرلەنەتىنىن ايتتى.
- جوسپار اياسىندا ەلىمىزدە كاسىپتىك باعدار بەرۋدىڭ جاڭا تۇجىرىمداماسى ىسكە قوسىلادى. بۇل باعىتتاعى جۇمىستى جۇيەلى دامىتۋ ءۇشىن ايماقتارداعى كادرعا قاجەتتىلىك ەسكەرىلە وتىرىپ، بارلىق وڭىرلەردە «جاڭا كاسىپتەر اتلاسى» ازىرلەنەدى.
كاسىپتىك باعدار بەرۋدىڭ جاڭا تاسىلدەرى وقۋشىلارعا ەڭبەك نارىعىنداعى جاڭا تالاپتار تۋرالى بىلۋگە، ەكونوميكانىڭ ناقتى سەكتورلارىنداعى مانساپ پەرسپەكتيۆالارىن باعالاۋعا جانە ماماندىقتاردى دۇرىس تاڭداۋعا مۇمكىندىك بەرەدى، - دەدى ول.
عاني بەيسەمبايەۆ مەكتەپتەردە كاسىبي باعدارلاۋ قىزمەتى كۇشەيتىلەتىنىن ءمالىم ەتتى.
- وسى ارقىلى وقۋشىلار تولىعىمەن كاسىبي دياگنوستيكامەن قامتىلادى. كاسىپورىندار كوللەدجدەرمەن بىرلەسىپ 1000 مەكتەپتە بەيىندىك سىنىپتار اشادى.
جوعارى سىنىپ وقۋشىلارىن پراكتيكالىق داعدىلارعا جانە كوللەدجدەر بازاسىندا العاشقى جۇمىس كاسىبىنە وقىتۋ تاجىريبەسى ەنگىزىلەدى، - دەدى مينيستر.
