بيىلعى ەڭ قاۋىپسىز كولىكتەر ءتىزىمى جاسالدى

استانا. KAZINFORM - قىتاي كولىكتەرى ءالى دە قاۋىپتى دەپ ويلاساڭىز، ەۋروپالىق كراش-تەست اگەنتتىگى EuroNCAP- ءتىڭ زەرتتەۋىنە كوز جۇگىرتىڭىز، ويىڭىز وزگەرۋى مۇمكىن، دەپ حابارلايدى El.kz ينتەرنەت پورتالى.

Finratings.kz پورتالىنىڭ حابارلاۋىنشا، ۇيىم 2025-جىلعى ەڭ قاۋىپسىز كولىكتەر رەيتينگىن جاڭارتتى.

ۇزدىك كولىكتەر تىزىمىنە بىردەن التى قىتايلىق مودەل ەنگەن. سونىمەن قاتار بۇل قاتاردا Tesla, Audi جانە Polestar دا بار.

ابسوليۋتتى چەمپيون اتاعىن تاعى دا Tesla Model 3 جەڭىپ الدى - بۇل ەلەكتروموبيل مۇمكىن بولعان 400 ۇپايدىڭ 359 ىن جينادى. Model 3 ەرەسەكتەر مەن بالالاردى وتە جاقسى قورعايدى، جولداعى توتەنشە جاعدايلارعا سەنىمدى جاۋاپ بەرەدى جانە جاياۋ جۇرگىنشىلەرگە دە باسەكەلەستەرىنە قاراعاندا ساق قارايدى.

ەكىنشى ورىنعا Polestar 3 جايعاسسا، ءۇشىنشى ورىندى Audi A6 e-tron يەلەندى. اتالعان مودەل جۇرگىزۋشى مەن جولاۋشىلاردى قورعاۋ بويىنشا جوعارى ناتيجە كورسەتكەنىمەن، باسقا كريتەريلەر بويىنشا ازداپ ۇتىلعان.

الايدا ەڭ باستى جاڭالىق - قىتاي كولىكتەرىنىڭ سەرپىنى.

قىتايدان كەلگەن بارلىق التى مودەل EuroNCAP باعالاۋىنان بەس جۇلدىز الىپ، جوعارى قاۋىپسىزدىك دەڭگەيىن دالەلدەدى. كوشباسشى - Voyah Courage، بۇل - پرەميۋم سەگمەنتكە جاتاتىن ىقشام ءارى قولجەتىمدى كروسسوۆەر.

سونداي-اق جوعارى باعا العان مودەلدەر:

Geely EX5

BYD Sealion 7

MG S5

Hongqi EHS9

Jaecoo 7 (گيبريد)

بارلىق اتالعان كولىك الدىمەن جانە بۇيىردەن سوقتىعىسۋ سىناقتارىنان، جاياۋ جۇرگىنشىلەردى قورعاۋ جانە ەلەكتروندى كومەكشىلەردىڭ تيىمدىلىگى بويىنشا سىناقتاردان ءساتتى ءوتتى.

EuroNCAP كراش-تەستىنەن العاشقىلاردىڭ ءبىرى بولىپ بيىل Zeekr X اتتى ستيلدى شاعىن كروسسوۆەر ءوتتى. بۇل مودەل بارلىق كاتەگوريا بويىنشا جوعارى بال جيناپ، ۇزدىك ناتيجە كورسەتتى: ەرەسەكتەردى قورعاۋ - %91، بالالار - %90، جاياۋ جۇرگىنشىلەر - %84، ال ەلەكتروندى كومەكشىلەردىڭ جۇمىسى %83 دەپ باعالاندى.

جالپى ۇزدىكتەر تىزىمىنە 20 كولىك مودەلى ەنگەن. ولاردىڭ 14 ءى بەس جۇلدىز، قالعاندارى ءتورت جۇلدىز الدى.