بيىلعى جاز ادەتتەگىدەن ىستىق بولادى - پرەمەر-مينيستر ورتتەن قورعاۋ جۇمىستارىن سىنعا الدى
استانا. KAZINFORM - وتكەن جىلى 116 مىڭ گەكتاردان استام ورمان قورى ورتەنىپ كەتتى. بيىل دا اپتاپ ىستىق پەن قۇرعاقشىلىق بولجانىپ وتىر. بۇل تۋرالى ق ر پرەمەر-ءمينيسترى ولجاس بەكتەنوۆ ايتتى.
«جىل سايىن ەلىمىزدە مىڭعا جۋىق تابيعي ءورت بولادى. ءتىلسىز جاۋ ادام ومىرىنە، سول سياقتى قورشاعان ورتاعا دا وراسان ءقاۋىپ توندىرەدى. وتكەن جىلى 116 مىڭ گەكتاردان استام ورمان قورى ورتەنىپ كەتتى. ەلىمىزدەگى ورمان القاپتارى ونسىز دا وتە از، ولاردىڭ اۋماعى ءورت سالدارىنان جىل سايىن سيرەپ بارادى»، - دەدى و. بەكتەنوۆ ۇكىمەت وتىرىسىندا.
ەكولوگياعا كەلتىرىلگەن زياندى ەسەپتەمەگەندە، ماتەريالدىق شىعىن 160 ميلليارد تەڭگەدەن اسىپ ءتۇستى.
«قازگيدرومەتتىڭ بولجامىنا سايكەس، بيىل جاز ايلارى ىستىق ءارى قۇرعاقشىلىق بولادى دەپ كۇتىلۋدە. اسىرەسە، ەلىمىزدىڭ باتىسى مەن شىعىسىندا جانە وڭتۇستىگىندە اپتاپ ىستىق ۇزاق ساقتالۋى مۇمكىن. دەمەك، ءورت ءقاۋپى كۇشەيە تۇسەدى. بيىلدىڭ وزىندە 30 عا جۋىق ورمان ءورتى تىركەلدى. ماسەلەن، وتكەن جىلى ورتتەن قاتتى زارداپ شەككەن «سەمەي ورمانى» اۋماعى بيىل تاعى دا وتقا وراندى. اباي وبلىسىنىڭ اكىمدىگى باقىلاۋدى كۇشەيتۋى كەرەك»، - دەدى ۇكىمەت باسشىسى.
الماتى وبلىسىندا ىلە-بالقاش تابيعي رەزەرۆاتىنىڭ اۋماعىندا دا قامىس ورتەنىپ، ۇلكەن اۋماققا جايىلىپ كەتتى. اقتوبە، اتىراۋ، قاراعاندى، جامبىل جانە قىزىلوردا وبلىستارىندا قامىس پەن قۋراعان ءشوپ جانىپ، ورتكە ۇلاستى.
«قازىر مۇددەلى مەملەكەتتىك ورگاندار تابيعي ورتتەردىڭ الدىن الۋ جانە ولاردى جويۋ جونىندەگى ءىس-شارالار جوسپارىن ىسكە اسىرىپ جاتىر. الايدا كەيبىر سالالاردا بۇل جۇمىستار ءتيىستى دەڭگەيدە جۇرگىزىلمەي وتىر. اقمولا، الماتى، شىعىس قازاقستان، جامبىل، اباي جانە ۇلىتاۋ وبلىستارىندا مينەرالدانعان جولاقتاردى جاساۋ ەندى عانا باستالعان، قاجەتتى كولەمنىڭ ۇشتەن بىرىنە ارەڭ جەتەدى. اقتوبە، پاۆلودار، قاراعاندى، سولتۇستىك قازاقستان وبلىستارىنىڭ اۋىلدارىنداعى اۋماقتار ءالى كۇنگە دەيىن قۋراعان ءشوپ پەن قوقىستاردان تازارتىلماعان»، - دەيدى پرەمەر-مينيستر.
وسىعان بايلانىستى ءوڭىر اكىمدەرىنە وسى باعىتتاعى جۇمىستى كۇشەيتىپ، بارلىق پروبلەمالىق ماسەلەلەردى جەكە باقىلاۋعا الۋ تاپسىرىلدى.
«ەكولوگيا مينيسترلىگى وسى ۋاقىتقا دەيىن قازاۆياورمانقورعاۋ مەكەمەسىنىڭ 12 بولىمشەسىندە تىكۇشاقتار كەزەكشىلىگىن رەتتەگەن جوق. بۇل جۇمىستى تەزدەتۋ كەرەك. سونداي-اق ءورت قاۋپى جوعارى وڭىرلەردە سۋ توگەتىن قۇرىلعىسى بار مەملەكەتتىك اۆياتسيا تىكۇشاقتارىنىڭ كەزەكشىلىگىن ۇيىمداستىرۋدى پىسىقتاعان ءجون»، - دەدى و. بەكتەنوۆ.
