بيىلعى فورۋمنىڭ باستى ەرەكشەلىگى - جاساندى ينتەللەكتكە نازار اۋدارىلادى - مينيستر

الماتى. KAZINFORM - الماتىدا Digital Almaty 2025 فورۋمى باستالدى.

Жаслан Мадиев
فوتو: الەكساندر پاۆسكي/ Kazinform

ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ 31-قاڭتار مەن 1-اقپان اراسىندا وتەتىن حالىقارالىق فورۋمنىڭ باستى ەرەكشەلىگىن اتاپ ءوتتى.

- بۇگىن وتەتىن Digital Almaty حالىقارالىق تەحنولوگيالىق جەتىنشى فورۋمىنىڭ ەرەكشەلىگى - ول جاساندى ينتەللەكتىگە ارنالعان. الەمدە تەحنولوگيا قارقىندى دامىپ جاتىر. ونى ءار سالادا پايدالانۋعا مۇمكىندىكتەرىمىز بار. سوندىقتان وسىندا جاساندى ينتەللەكت جوبالارى، ونىڭ ىشىندە حالىقارالىق جاساندى ينتەللەكت ورتالىعىنىڭ پرەزەنتاتسياسى ۇسىنىلعان، - دەدى مينيستر.

سونداي-اق بريتاندىق وندىرىستىك جانە عىلىمي-زەرتتەۋ Oxford Insights كومپانياسىنىڭ ديرەكتورى ريچارد ستيرلينگ فورۋم جانە جاساندى ينتەللەكتىنىڭ بولاشاعى تۋرالى پىكىر ءبىلدىردى.

- كوپتەگەن بىلىكتى ادامداردى بىرىكتىرگەن فورۋمعا قاتىسىپ جاتقانىما قۋانىشتىمىن. وسىنداي فورۋمدار الاڭىنداعى تالقىلاۋلار ارقىلى ءبىز قوعام ءۇشىن وزەكتى ماسەلەلەردىڭ شەشىمىن تابامىز. ءبىز وسى ۋاقىتقا دەيىن جاساندى ينتەللەكت جۇمىسىن وڭتايلاندىرۋعا تىرىستىق. ال قازىرگى ج ي ءوزى ويلاپ تابا الاتىن مودەلگە اينالدى. ونىڭ جارقىن مىسالدارى: ChatGPT جانە DeepSeek. ەڭ قىزىعى - وسىنداي ج ي بار كەزدە ارى قاراي نە بولاتىنىن كورۋ، - دەدى شەتەلدىك مەيمان.

ەسكە سالايىق، بۇعان دەيىن Digital Almaty-2025 سيفرلىق فورۋمىنا 40 مىڭنان اسا ادام قاتىساتىنىن جازعانبىز.

 

سوڭعى جاڭالىقتار