بيىل وزبەكستان ەكسپورت كولەمىن 30 ميلليارد دوللاردان اسىرۋعا نيەتتى
تاشكەنت. KAZINFORM - ينۆەستيتسيا مەن ەكسپورت ماسەلەلەرى قارالعان كەڭەستە وزبەكستان پرەزيدەنتى شاۆكات ميرزيەيەۆ وسىنداي تاپسىرما بەردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

وزبەكستان باسشىسىنىڭ باسپا ءسوز قىزمەتىنەن ءمالىم ەتكەندەي، ەكسپورتتى ارتتىرۋ ءۇشىن توقىما جانە ەلەكتروتەحنيكا ونەركاسىبىنە ەكپىن جاسالادى. وسىعان بايلانىستى اتالعان سەكتورلاردى قولداۋعا باعىتتالعان شارالار قابىلدانباق.
- اتاپ ايتقاندا، ەكسپورتتاۋشىلاردى قولداۋ ماقساتىندا جەكە فاكتورينگتىك ۇيىم قۇرىلىپ، وعان $100 ميلليون بولىنەدى. ءوندىرىسىن حالىقارالىق ستاندارتقا سايكەستەندىرگەن كاسىپورىنداردىڭ 20 مىڭ دوللارعا دەيىنگى شىعىنى وتەلەدى. زەرتتەۋ ورتالىقتارىنا ارنالعان زەرتحانالىق جابدىقتارعا كەدەندىك باج سالىنبايدى. سونىمەن قاتار، جەرگىلىكتى ونىمدەردى وزگە نارىقتارعا شىعارۋ ءۇشىن 2 ميلليون دوللار باعىتتالادى، - دەپ اتاپ ءوتتى وزبەكستان پرەزيدەنتىنىڭ باسپا ءسوز قىزمەتىنەن.
بۇعان دەيىن حابارلاعانىمىزداي، وزبەكستاننىڭ دۇنيەجۇزىلىك ساۋدا ۇيىمىنا قوسىلۋ پروتسەسى اياقتالۋعا جاقىن.
ەسكە سالايىق، بيىل وزبەكستان $43 ميلليارد ينۆەستيتسيانى يگەرۋدى جوسپارلاپ وتىر.
سونىمەن قاتار وزبەكستان بيلىگى ەلدەگى كەدەيلىك دەڭگەيىن %6 دەيىن تومەندەتۋگە نيەتتى.
مۇنىمەن بىرگە وزبەكستان بيلىگى قوسىلعان قۇن سالىعىنىڭ مولشەرىن 2028-جىلعا دەيىن كوتەرمەيدى.