بيىل ومىردەن وتكەن تانىمال ادامدار كىمدەر؟
قالىڭ كوپشىلىككە ساحناداعى ونەرىمەن، انىمەن تانىلعان قازاقتىڭ كەيبىر اياۋلى ۇل-قىزدارى بيىل ومىردەن وزدى. ولاردىڭ قاتارىندا ءانشى دە، اكتەر دە، اكىم دە، اقىن دا بار. ماسساگەت ءتىلشىسى 2023 -جىلى كوز جۇمعان تانىمال ادامدار كىمدەر ەكەنىنە شولۋ جاسادى.
«قارجىنى تاۋىپ قويعاندا، باقيعا بەت بۇرىپ كەتە بەردىڭ»: اسقار نايمانتايەۆ ومىردەن ءوتتى
تانىمال اكتەر اسقار نايمانتايەۆ تا بيىل قايتىس بولدى. بۇل تۋرالى اكتەردىڭ دوستارى الەۋمەتتىك جەلىدە جازدى.
«اسقار اعامىز باقيعا اتتانىپتى. قايران اسىل ەر… اللا الدىڭنان جارىلقاسىن»، - دەپ جازدى ەرلان رىسقالي Facebook پاراقشاسىندا.
ال ونەر يەسى بۇعان دەيىن Instagram پاراقشاسىندا اۋرۋحانادا جاتقان سۋرەتتەرىن بولىسكەن ەدى.
اسقار نايمانتايەۆ - «تاماشا» ويىن-ساۋىق وتاۋى ارقىلى كوپشىلىككە تانىمال اكتەر. ول «دوماشنيە ۆوينى»، «باستىق بولامىن»، «ورىstar ۆ شىمكەنتتە»، «دەتەكتيۆ اجە»، «تۋىسقاندار»، «بۇيىمتاي»، «وسەكشىلەر» «ۆنۋكي ۆ اۋلە» كومەديالىق سەريالدارىندا، ساتىبالدى نارىمبەتوۆتىڭ «امانات»، باقىتاس سانيتاستىڭ «تەزەك» فيلمدەردىندە وينادى.
ونەردەگى، ومىردەگى دوستارى كەيىنگى كۇندەرى ونىڭ دەنساۋلىعى ناشارلاعانىن دا جازدى.
«دەنساۋلىعىڭا اراشا ءتۇسۋدىڭ قامىنا كىرىسىپ، دارىگەرلەرمەن دە كەلىسىپ، جاناشىر جاننىڭ ارقاسىندا العاشقى قاجەتكە جاراتار قارجىنى دا تاۋىپ قويعاندا باقيعا بەت بۇرىپ كەتە بەردىڭ، قۇرداسىم-وۋ… كۇيىككە تولى كۇرسىنىس، وزەك تولى وكىنىش، وكپەدە وكسىك، قابىرعام سوگىلىپ، جانىم ەزىلىپ تۇر…»، - دەدى بەكجان تۇرىس.
45 جاستا ەدى: بيىل ءانشى، اكتەر مارات ورازمەتوۆ ومىردەن ءوتتى
بيىل بەلگىلى ءانشى، اكتەر مارات ورازمەتوۆ قايتىس بولدى. بۇل تۋرالى تانىمال ونەر ادامدارى الەۋمەتتىك جەلىلەردە حابارلادى.
«مارات قۇرداسىم، ۇزەڭگىلەس باۋىرىم. اللا راحىمىنا السىن. توبەمنەن جاي تۇسكەندەي بولىپ وتىرمىن. جانىڭ ءجانناتتا بولسىن»، - دەپ جازدى التىناي جورابايەۆا.
«باقۇل بول، دوسىم. قازاق ەلى دارىندى ۇلى ورازمەت مارات ءومىرحان ۇلىىنان ايىرىلدى. وتباسىنا قايعىرا كوڭىل ايتامىز»، - دەپ جازدى اكتريسا جۇلدىزاي دۇيسەنبيەۆا.
ايتا كەتەيىك، مارات ورازمەتوۆ – ق ر «ەرەن ەڭبەگى ءۇشىن» مەدالىنىڭ يەگەرى، اكتەر جانە ءانشى.
73 جاسىندا تانىمال اقىن نەسىپبەك ايت ۇلى ومىردەن وزدى
بيىل بەلگىلى اقىن نەسىپبەك ايت ۇلى قايتىس بولدى. بۇل تۋرالى ايتىسكەر اقىن داۋلەتكەرەي كاپ ۇلى الەۋمەتتىك جەلىدەگى پاراقشاسىندا حابارلادى.
ايتا كەتەيىك، نەسىپبەك ايت ۇلى 1950 -جىلى شينجاڭنىڭ تارباعاتاي ايماعىندا تۋعان. اقىن، مەملەكەتتىك سىيلىقتىڭ لاۋرەاتى (2012 ج)، قازاقستاننىڭ ەڭبەك سىڭىرگەن قايراتكەرى (2011)، «پاراسات» وردەنىنىڭ يەگەرى (2004). تاڭدامالى جەتى تومدىعى «فوليانت» باسپاسىنان (2015 -جىلى) جارىق كورگەن ەپيك اقىن.
2001 -جىلدان باستاپ استانا قالاسىنا قونىس اۋدارىپ، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە، پرەزيدەنتتىك مادەنيەت ورتالىعىندا قىزمەت ىستەگەن.
«توي جاسايمىن» دەپ جۇرگەن»: بەردىبەك ساپاربايەۆ ومىردەن ءوتتى
بيىل مەملەكەت قايراتكەرى بەردىبەك ساپاربايەۆ 71 جاسقا قاراعان شاعىندا قايتىس بولدى.
ساپاربايەۆ - قازاقستانداعى بەس ءوڭىردىڭ ( قىزىلوردا، وڭتۇستىك قازاقستان، شىعىس قازاقستان، اقتوبە جانە جامبىل وبلىستارىنىڭ) بۇرىنعى اكىمى، پرەمەر- ءمينيستردىڭ ورىنباسارى، ەڭبەك ءمينيسترى، ەكونوميكا عىلىمدارىنىڭ دوكتورى.
بەردىبەك ساپاربايەۆپەن قوشتاسۋ راسىمىندە تۋعان تۋىستارى اتىنان مەملەكەت قايراتكەرى يكرام ادىربەكوۆ سويلەدى.
«بۇگىن ءبىزدىڭ اعايىندار ءۇشىن عانا ەمەس بۇگىن قازاق مەملەكەتى ءۇشىن وتە اۋىر قازا بولىپ وتىر. ەلىمىزدىڭ تاۋەلسىزدىگى، ەكونوميكالىق دامۋى ءۇشىن كوپتەگەن تۇلعالى ازامات قىزمەت ەتتى. سونىڭ ىشىندە بەردىبەك ماشبەك ۇلىنىڭ ورنى ەرەكشە ەدى. ول جەتپىس جىلدىق مەرەيتويىن دا تويلامادى. بار كۇشىن حالىققا ارنادى. الدىندا جوسپارى كوپ ەدى. ءبىز كوپ اڭگىمەلەستىك. سوندا ايتىپ ەدى: «كۇزدە ەگىن جينالىپ، حالىقتىڭ كوڭىلى كوتەرىلگەندە ەلگە بارىپ، بۇرىن ارالاسا الماي كەتكەن تۋىستاردىڭ، دوستاردىڭ، قۇرداستاردىڭ باسىن قوسىپ توي جاسايىن، ەلگە سالەم بەرەيىن» دەگەن بولاتىن. سونداي ءبىر ارمانى بار ەدى. ءوزىن وتە قايراتتى، جاس سەزىندى. مۇنداي جاعداي بولادى دەپ ەشكىم ويلامادى. جاتقان جەرى جايلى بولسىن»، - دەدى ول.
ايتا كەتەيىك، بەردىبەك ساپاربايەۆ 1953 -جىلى 9-اقپاندا قىزىلوردا وبلىسى، جاڭاقورعان اۋدانى، بەسارىق اۋىلىندا دۇنيەگە كەلگەن. «وتان»، «بارىس»، «پاراسات»، «قۇرمەت» جانە باسقا دا كوپتەگەن ماراپات يەگەرى.
«نەمەرە-شوبەرە ءسۇيدىڭىز». اتاقتى «دوس-مۇقاسان» توبىنىڭ مۇشەسى ومىردەن ءوتتى
اقجول مەيىربەكوۆ «دوس-مۇقاسان» انسامبلىنىڭ قۇرامىندا ءانشى بولىپ، بۇكىل وداقتىق، دۇنيەجۇزىلىك جانە حالىقارالىق فەستيۆالدەر مەن بايقاۋلارعا قاتىسىپ، لاۋرەات اتانعان.
كەيىن الماتى وبلىستىق ءسۇيىنباي اتىنداعى فيلارمونيانىڭ «ارقاس»، «سازگەن»، «ادىرنا» انسامبلدەرىنىڭ ءانشىسى بولدى. 1994-1996 -جىلدارى «گۇلدەر» ءانسامبلىنىڭ ديرەكتورى ءارى كوركەمدىك جەتەكشىسى قىزمەتتەرىن اتقارعان.
تانىمال ءانشى ماقپال ءجۇنىسوۆا ونىڭ ومىردە، ونەردە قانداي ادام بولعانى تۋرالى دا ايتقان ەدى.
«اقجول مەيىربەكوۆ اعانىڭ شاڭىراعىنداعى سوڭعى كەزدەسۋ دەپ كىم ويلاعان، ءيا، ءبارىمىز دە بۇل ومىردە قوناقپىز، قاشان كورسەڭ جايدارلى، قالجىڭى دا ەرەكشە جان ەدى، قازاق ءانشىسى رەتىندە دە ءوز تىڭدارماندارىنىڭ العىسىن الدى، ءۇش جىلدان بەرى قۇدالار بولىپ تالاي باس قوسىپ سىيلاستىعىمىز جاراسىمدى ەدى، وتباسىڭىز جاقسى بولدى، شاريپا جەڭگەمىزگە ادال بولدىڭىز، نەمەرە، شوبەرە ءسۇيدىڭىز، ءۇي سالىپ، اعاش ەكتىڭىز. ارتىڭىزدا قالعان جارىڭىزعا، ۇرپاعىڭىزعا عۇمىر بەرسىن، يمانىڭىز سالامات بولسىن، بارار جەرىڭىز جۇماقتان بولسىن»، - دەپ جازعان ول.
الەمگە ايگىلى ءانشىنىڭ اتاسى: ديماش قۇدايبەرگەننىڭ اتاسى ومىردەن ءوتتى
بەلگىلى ءانشى ديماش قۇدايبەرگەننىڭ اتاسى قايتىس بولدى. بۇل تۋرالى جۋرناليست باۋىرجان باباجان ۇلى Facebook پاراقشاسىندا جازدى.
«قازاقتى كۇللى الەمگە تانىتقان ديماشتىڭ اتاسى، قادىرلى اقساقالىمىز قۇدايبەرگەن اعا دۇنيەدەن وزدى. اللا الدىنان جارىلقاعاي»، - دەدى ول.
ايتا كەتەيىك، 2019 -جىلى مەملەكەتتىك جانە قوعامدىق قىزمەتتەردە ەڭبەك سىڭىرگەن، ەلدىڭ الەۋمەتتىك- ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا ەلەۋلى ۇلەس قوسقانى ءۇشىن ديماشتىڭ اتاسى قۇدايبەرگەن ايتبايەۆقا «ەرەن ەڭبەگى ءۇشىن» مەدالى بەرىلگەن.
«جاقىندا كەتەمىن، كوپ كوڭىل بولمەي-اق قويىڭدار» دەپتى». ارمان دۇيسەنوۆ 49 جاسىندا كوز جۇمدى
تانىمال كومپوزيتور ارمان دۇيسەنوۆ ومىردەن ءوتتى. بۇل تۋرالى ءانشى ينديرا ەلەمەس Instagram پاراقشاسىندا جازدى.
«ارمان اعاۋ. نەگە ولاي؟ يمانى سالامات بولسىن، مەكەنى ءجاننات بولسىن!» - دەپ جازدى ءانشى ينديرا ەلەمەس جەلىدە.
تىلشىگە ينديرا ەلەمەستىڭ رەسمي وكىلى بۇل اقپاراتتى راستاپ، كومپوزيتوردىڭ جۇرەگى توقتاپ قالعانىن ايتتى.
ايتا كەتەيىك، ارمان دۇيسەنوۆ 1974 -جىلى باتىس قازاقستان وبلىسى ورال قالاسىندا تۋعان. ول - كومپوزيتور، تەلەجۇرگىزۋشى، پروديۋسەر. مۋزىكانتتىڭ ەڭبەك جولى 1990 -جىلى پاۆلودار قالاسىندا وتكەن XXII رەسپۋبليكالىق جاس ورىنداۋشىلار بايقاۋىندا جەڭىسكە جەتكەننەن كەيىن باستالعان.
ال كەيىن تانىمال ونەر جۇلدىزدارى «تورلەتىڭىز» باعدارلاماسىندا سازگەر، پروديۋسەر، تەلەجۇرگىزۋشى ارمان دۇيسەنوۆتى ەسكە الدى. ءانشى مۇقاسان شاحزادايەۆ سازگەردىڭ ءومىرىنىڭ سوڭعى كەزدەرى تۋرالى ايتتى.
ونىڭ سوزىنشە، ارمان دۇيسەنوۆ كومەكشىسىنە «جاقىندا كەتەتىنىن» ايتقان.
«سوڭعى ومىرىندە ازامات كومەكشىسى بولىپ، ءىنىسى بولىپ كوپ قاسىندا ءجۇردى. ءبىر جولى مەنىڭ ستۋديامدا ازامات وتىر ەكەن. ءان جازىپ وتىر ەكەن. ەكەۋمىز كىشكەنە اڭگىمەلەسىپ قالدىق. ازاماتقا سۇراق قويدىم: «ازامات، ارمان سوڭعى ومىرىندە ەرەكشە ايتقان سوزدەرى بار ما؟ نە بولدى؟ «دەدىم. سول كەزدە ازامات ايتتى: «ارمان سوڭعى ومىرىندە «بولدى، ماعان كوپ كوڭىل بولمەي-اق قويىڭدار، جاقىندا كەتەمىن، ماعان كوڭىلدەرىڭدى كوپ بولمەڭدەر، مەن مىنا ومىردەن شارشادىم» دەپ ايتىپتى»، - دەدى مۇقاسان شاحزادايەۆ.
75 جاسقا قاراعان شاعىندا قويشىعۇل جىلقىشيەۆ كوز جۇمدى
اقىن، قازاقستاننىڭ ەڭبەك سىڭىرگەن قايراتكەرى قويشىعۇل جىلقىشيەۆ 75 جاسقا قاراعان شاعىندا دۇنيەدەن ءوتتى. قايعىلى حاباردى اقىن ءاليا داۋلەتبايەۆا Facebook جەلىسىندەگى پاراقشاسىندا جاريالادى.
«اتىراۋ مادەنيەتىنىڭ اقتاڭگەرى قويشىعۇل اعا جالعاننان ءوتتى... ءومىر دەگەن وسى ەكەن... بەتىمىزدەن قاقپادىڭىز... ەركەلىگىمىزدى كوتەردىڭىز... قامقور بولدىڭىز... دۇنيە شىن جالعان ەكەن عوي... اللا الدىڭىزدان جارىلعاسىن، اعا!»، - دەپ جازدى ول الەۋمەتتىك جەلىدە.
ايتا كەتەيىك، قويشىعۇل جىلقىشييەۆ ءومىرىنىڭ سوڭعى جىلدارىندا قازاقستان جازۋشىلار وداعىنىڭ اتىراۋ فيليالىنىڭ ديرەكتورى قىزمەتىن اتقاردى. «تۇڭعىش» (1978)، «مۇڭ كىتاپ» (1998)، «اساۋكەر» (2001) سياقتى كىتاپتاردىڭ اۆتورى.
ۇزاق ۋاقىت اۋىرعان: بولات نازاربايەۆ ومىردەن ءوتتى
بيىل تۇڭعىش پرەزيدەنت نۇرسۇلتان نازاربايەۆتىڭ ءىنىسى بولات نازاربايەۆ 71 جاسىنا قاراعان شاعىندا ومىردەن ءوتتى. ول الماتىداعى ورتالىق كلينيكالىق اۋرۋحانادا جاتقان.
4-قاراشادا بولات نازاربايەۆ اۋرۋحاناعا ءتۇستى دەگەن اقپارات تارادى. سول كەزدە بولات نازاربايەۆ ينفاركت العانى ايتىلدى. ال بىلتىر شىلدەدە «ساليقالى ۇرپاق» قورىنىڭ ديرەكتورى قاسىم قاسابەكوۆ بولات نازاربايەۆتىڭ جاعدايىن ايتقان بولاتىن.
«بولات نازاربايەۆ تۇراقتى اۋىر جاعدايدا ەكەنىن جانە 2015 -جىلدان بەرى ونكولوگيالىق اۋرۋدان ەمدەلىپ جاتقانىن حابارلايمىز»، - دەپ جاۋاپ بەرگەن ەدى ول.
ال كەيىن الماتىداعى ورتالىق كلينيكالىق اۋرۋحانا وكىلدەرى بولات نازاربايەۆ قايتىس بولعانىن رەسمي تۇردە راستادى.
«2023 -جىلعى 13-قاراشادا ساعات 09.51-دە ۇزاققا سوزىلعان سىرقاتتان بولات نازاربايەۆ قايتىس بولدى»، - دەلىنگەن جاۋاپتا.
ينسۋلت العان: تانىمال وپپوزيتسيونەر جاسارال قۋانىشالين كوز جۇمدى
18 مامىردا الماتىدا تانىمال وپپوزيتسيونەر جاسارال قۋانىشالين 75 جاسىندا قايتىس بولدى. بۇل تۋرالى نۇرسۇلتان تاستايەۆ Facebook-پاراقشاسىندا جاريالادى. 16-مامىردا جاسارال قۋانىشالين دەنساۋلىعىنىڭ كۇرت ناشارلاۋىنا بايلانىستى اۋرۋحاناعا جاتقىزىلدى. تانىستارىنىڭ ايتۋىنشا، ول ينسۋلت العان.
جاسارال ءمىناجادين ۇلى قۋانىشالين - قازاق جۋرناليسى، وپپوزيتسيونەر، قوعام جانە مەملەكەت قايراتكەرى. ول 1949 -جىلى اقتوبە وبلىسى، قارابۇتاق اۋدانىندا دۇنيەگە كەلگەن. 2022 -جىلعى ساۋىردە «العا قازاقستان» پارتياسىنىڭ نەگىزىن قالاعان.
شەتەلدە جول اپاتىنا ۇشىرادى: ءانشى Darkhan Juzz كوز جۇمدى
24-اقپاندا Darkhan Juzz لاقاپاتىمەن بەلگىلى ءانشى دارحان جۇنىسبەكوۆ قايتىس بولدى.
كەيىنىرەك سىرتقى ىستەر مينيسترلىگى وكىلدەرى ءانشى دارحان جۇنىسبەكوۆتىڭ ولىمىنە قاتىستى پىكىر ءبىلدىردى.
«تايلاند پوليتسياسىنىڭ اقپاراتى بويىنشا 24-اقپاندا پحۋكەت ارالىندا قازاقستان ازاماتى دارحان جۇنىسبەكوۆ قايتىس بولدى»، - دەدى س ءى م وكىلى ايبەك سمادياروۆ.
Darkhan Juzz (دارحان جۇنىسبەكوۆ) 1991 -جىلى 9-تامىزدا الماتىدا دۇنيەگە كەلگەن. ول رەپ ورىنداۋشىسى، ءان اۆتورى جانە دىبىستىق پروديۋسەر ەدى. دارحان ءان ايتۋدى الماتىداعى اقساي شاعىناۋدانىنداعى ءۇيىنىڭ اۋلاسىنان باستاعان.
«ءان ايتۋدى ەسىك الدىندا 14 جاسىمدا باستادىم. ۇلكەندەر، بالالار جينالادى. ادام كوپ، ال ءبىز وتىرىپ الىپ ءان ايتاتىنبىز. اقسايدا 50 دەي ادام جينايتىنبىز»، - دەدى مارقۇم 2018 -جىلى «ازاتتىق» راديوسىنا بەرگەن سۇحباتىندا.
ول 14 جاسىنان باستاپ ءان دە جازعان، الايدا اۋەلىدە ونىڭ اندەرىن كوپشىلىك تىڭداماعان، بىلمەگەن، تۇسىنبەگەن. جارقىن تالانت نەبارى 32 جاسىندا قازا تاپتى.
