بيىل سپورت سالاسىندا 39 جەمقورلىق ارەكەتى تىركەلدى - انتيكور

ҚР сыбайлас жемқорлыққа қарсы іс-қимыл агенттігі
Фото: Антикор

استانا. KAZINFORM - جىل باسىنان بەرى ق ر سىبايلاس جەمقورلىققا قارسى ءىس-قيمىل اگەنتتىگى سپورت سالاسىندا 39 جەمقورلىق قىلمىسىن تىركەگەن.

بۇل تۋرالى اگەنتتىك ءتوراعاسى ا. جۇماعالي سپورتتى قارجىلاندىرۋ سالاسىنداعى جەمقورلىق تاۋەكەلدەرىن جويۋ ماسەلەلەرى بويىنشا وتكەن ۆەدومستۆوارالىق ماجىلىستە ايتتى.

سىبايلاس جەمقورلىققا قارسى ءىس-قيمىل اگەنتتىگى باسپا ءسوز قىزمەتىنىڭ حابارلاۋىنشا، ماجىلىستە ەلىمىزدە سپورتتى دامىتۋعا بولىنەتىن مەملەكەتتىك قاراجاتتىڭ ۇتىمسىز جانە ءتيىمسىز جۇمسالۋىنا اكەپ سوقتىراتىن ەلەۋلى جەمقورلىق تاۋەكەلدەرى مەن فاكتورلارىنىڭ بولۋىن كورسەتكەن سىرتقى تالداۋ ناتيجەلەرى تالقىلاندى.

بەيىندى مينيسترلىك ىشىندەگى جەمقورلىقتىڭ اۋقىمى قازىرگى ۋاقىتتا بۇرىنعى ۆيتسە-مينيستر، سپورت جانە دەنە شىنىقتىرۋ ىستەرى كوميتەتىنىڭ ءتوراعاسى، سپورتتى دامىتۋ ديرەكسياسىنىڭ باسشىسى جانە باسقا دا لاۋازىمدى تۇلعالاردىڭ قىلمىستىق جاۋاپقا تارتىلۋىنا اكەلدى.

ۇلت دەنساۋلىعىن نىعايتۋ جانە بۇقارالىق، اسىرەسە بالالار سپورتىن دامىتۋ ماسەلەلەرىنە مەملەكەت باسشىسى ەرەكشە كوڭىل بولەدى.

تەك سوڭعى 6 جىلدا وسى سالاداعى بيۋجەت 2 ەسەگە ءوسىپ، 1,4 تريلليون تەڭگەنى قۇرادى.

الايدا، قازاقستاننىڭ الەمدىك سپورتتاعى رەيتينگى تومەندەپ بارادى.

وسى سالا بيۋجەتىنىڭ %90 جۇمسالاتىن «جوعارى جەتىستىكتەر» جانە «بۇقارالىق» سپورتتى قارجىلاندىرۋ اراسىندا تەڭگەرىمسىزدىك بايقالادى.

ال دامىعان ەلدەردە پروپورتسيالار مۇلدەم وزگەشە جانە بۇقارالىق سپورتقا قاراجات ءبولۋ باسىم.

«قارجىلاندىرۋداعى ديسپروپورتسيا جەمقورلىق سحەمالارىنا نەگىز بولدى. ەگەر بۇقارالىق سپورتتا قازىر سيفرلاندىرىلعان جان باسىنا شاققانداعى قارجىلاندىرۋ باعدارلاماسى جۇمىس ىستەپ تۇرسا، وندا جوعارى جەتىستىكتەر سپورتىندا اشىق ەمەس جانە سۋبەكتيۆتى تولەمدەر، از باقىلاۋ، اففيليرلەنگەن قاتىسۋشىلار، جالعان وقۋ-جاتتىعۋلار جانە قوسارلانعان قارجىلاندىرۋعا جاعداي جاسالعان»، - دەپ اتاپ ءوتتى اگەنتتىك ءتوراعاسى.

سپورتتىق پروتسەستەردە سيفرلاندىرۋدىڭ بولماۋى جەمقورلىق قۇقىق بۇزۋشىلىقتار مەن قاراجاتتاردىڭ جىمقىرىلۋىنا قولايلى.

ەكى جىل بۇرىن جوسپارلانعان «e-sport» اقپاراتتىق جۇيەسى وسى ۋاقىتقا دەيىن ىسكە قوسىلعان جوق. «سپورت شەبەرلەرى» جالعان اتاقتارىن بەرۋ فاكتىلەرى انىقتالدى.

ماجىلىستە قازاقستانداعى سپورتشىلاردى ناتۋراليزاتسيالاۋ، كاسىبي كلۋبتاردىڭ بيۋجەتتەرىن قالىپتاستىرۋ جانە لەگيونەرلەرگە تولەمدەردى قارجىلاندىرۋ ماسەلەلەرى تالقىلاندى.

ەل پرەزيدەنتىنىڭ بيۋدجەت پەن جالاقى مولشەرىن شەكتەۋ جونىندەگى تاپسىرماسىنا قاراماستان، ەلىمىزدىڭ فۋتبول كاسىپوداق كلۋبتارى سوڭعى 3 جىل ىشىندە 30 ميلليارد تەڭگەدەن استام ۇستەمە اقى تولەدى.

سونىمەن قاتار، ءوزىنىڭ سپورتتىق ينفراقۇرىلىمىن دامىتۋدىڭ ورنىنا بيۋجەت قاراجاتى لەگيونەرلەرگە تولەم جاساۋعا جانە سپورت نىساندارىن جالعا الۋعا جۇمسالدى.

تالداۋ قورىتىندىسى بويىنشا اگەنتتىك سالالىق مينيسترلىكتىڭ اتىنا جەمقورلىق تاۋەكەلدەرىن جويۋ بويىنشا ۇسىنىمدار ەنگىزدى.

ۆەدومستۆولىق باقىلاۋدى كۇشەيتۋ جانە ديسكرەتسيالىق وكىلەتتىكتەردى قىسقارتۋ، قاراجاتتى ءبولۋ پروتسەستەرىن ناقتى نورماتيۆتىك جانە قۇقىقتىق رەگلامەنتتەۋدى بەلگىلەۋ جانە بۇزۋشىلىقتار ءۇشىن جاۋاپكەرشىلىكتى دەربەستەندىرۋ، سونداي-اق ءبىرىڭعاي سيفرلىق پلاتفورما قۇرۋ تۋرالى سۇراقتار قويىلدى.

ءوز سوزىندە تۋريزم جانە سپورت ءمينيسترى ە. ب. مارجىقپايەۆ مەملەكەتتىك ورگاننىڭ قازىرگى ۋاقىتتا ۇيىمدىق-قۇقىقتىق شارالار كەشەنىن قابىلداعانى تۋرالى حاباردار ەتىپ، جەمقورلىق تاۋەكەلدەرىن جويۋ بويىنشا بارلىق ۇسىنىمداردىڭ مىندەتتى تۇردە ورىندالاتىندىعىن ايتتى.

ۇلتتىق وليمپيادا كوميتەتىنىڭ پرەزيدەنتى گ. گ. گولوۆكين: «مەنىڭ ۇستانىمىم ءبىرجاقتى جانە مەنىڭ سپورتتىق مانسابىم دا وزگەرىسسىز قالادى - جەمقورلىققا مۇلدەم توزبەۋشىلىكتى قالىپتاستىرىپ، ونىڭ كەز كەلگەن كورىنىستەرىنە قاتاڭ شارالار قولدانۋ قاجەت»، - دەپ اتاپ ءوتتى.

كەڭەس قورىتىندىسى بويىنشا سىبايلاس جەمقورلىققا قارسى ۆەدومستۆونىڭ باسشىسى ۋاكىلەتتى ورگانداردى ەلدەگى سپورتتى دامىتۋ جونىندەگى تىكەلەي مىندەتتەردى مۇلتىكسىز ورىنداۋعا شاقىردى جانە جەمقورلىق بۇزۋشىلىقتاردىڭ جاسالۋىنا جول بەرمەۋ تۋرالى ەسكەرتتى.

ءسوز سوڭىندا ا. جۇماعالي قازاقستاندىق سپورتشىلارعا الداعى وليمپيادادا تابىس تىلەدى.

ءماجىلىس جۇمىسىنا اگەنتتىك ءتوراعاسى ا. جۇماعاليمەن بىرگە تۋريزم جانە سپورت ءمينيسترى ە. ب. مارجىقپايەۆ، ۇلتتىق وليمپيادا كوميتەتىنىڭ پرەزيدەنتى گ. گ. گولوۆكين، استانا قالاسىنىڭ اكىمى ج. م. قاسىمبەك، قارجى جانە سيفرلاندىرۋ ۆيتسە-مينيسترلەرى، «سامۇرىق-قازىنا» ا ق باسشىلىعى، قوعام قايراتكەرلەرى، ورتالىق جانە وڭىرلىك مەملەكەتتىك ورگاندار قاتىستى.

سوڭعى جاڭالىقتار