بيىل سۋارۋ كەزەڭىندە سولتۇستىك ارال تەڭىزىنە 1 ميلليارد تەكشە مەتر سۋ جىبەرىلدى
استانا. KAZINFORM - ەلىمىزدە 1-ساۋىردە باستالعان سۋارۋ ماۋسىمى ءساتتى ءوتتى. شارۋالار ۇزدىكسىز ءارى تۇراقتى تۇردە سۋارمالى سۋمەن قامتىلدى. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ۆەگەتاتسيالىق كەزەڭنىڭ اياقتالۋىن قورىتىندىلادى.
«بيىلعى سۋارۋ كەزەڭىندە جالپى سۋ كولەمىنىڭ جارتىسىنان استامىن - 65 پايىزىن ارال- سىرداريا، 26,6 پايىزىن بالقاش-الاكول جانە 8,4 پايىزىن شۋ-تالاس باسسەيندەرى پايدالاندى. ياعني، مۇندا سۋارمالى ەگىنشىلىك ءداستۇرلى دامىعان جانە وسى باسسەيندەردىڭ سۋىنىڭ مولدىعى نەگىزىنەن ترانسشەكارالىق وزەندەرگە تاۋەلدى»، - دەدى ن. نۇرجىگىتوۆ بۇگىنگى ۇكىمەت وتىرىسىندا.
ءمينيستردىڭ ايتۋىنشا، وڭتۇستىك وڭىرلەردىڭ 1,2 ميلليون گەكتاردان استام ەگىس القابىن تۇراقتى سۋارۋعا 10,9 كۇپمەتر سۋ بەرىلدى. بۇل بارلىق سۋ تارتۋدىڭ 97 پايىزىن قۇرايدى.
«سوڭعى جىلدارى ەلدىڭ وسى وڭىرلەرىندە ۆەگەتاتسيالىق كەزەڭ از سۋمەن ءوتتى جانە شەكارالاس مەملەكەتتەرمەن ترانسشەكارالىق وزەندەر بويىنشا ءتيىمدى ءوزارا ءىس-قيمىل جاساۋ - ءبىزدىڭ مىندەتىمىز. وسىعان بايلانىستى بيىل ورتالىق ازيا مەملەكەتتەرىمەن، قىتاي جانە رەسەيمەن ترانسشەكارالىق وزەندەر بويىنشا 28 گە جۋىق وتىرىس وتكىزدىك. مىسالى، ارال-سىرداريا باسسەينى بويىنشا بيىل ءساۋىر ايىندا شىمكەنت قالاسىندا مەملەكەتارالىق سۋ شارۋاشىلىعى ۇيلەستىرۋ كوميسسياسىنىڭ 86-شى وتىرىسى ءوتتى. وندا 2024-جىلدىڭ ۆەگەتاتسيالىق كەزەڭنىڭ سۋ جيناۋ ليميتتەرى بەكىتىلدى»، - دەدى سۋ رەسۋرستارى ءمينيسترى.
كەستەگە سايكەس، سۋارۋ كەزەڭىندە شاردارا سۋ قويماسىنا 3,7 ميلليارد كۇپمەتر كولەمىندە سۋ كەلەدى دەپ كۇتىلدى، ءىس جۇزىندە 4,8 ميلليارد كۇپمەتر سۋ ءتۇستى. بۇل وتكەن جىلعى كورسەتكىشتەن ەكى ەسە كوپ جانە كەلىسىلگەن كولەمنەن 1,1 ميلليارد كۇپمەتر ارتىق.
«دوستىق» كانالى ارقىلى كەپىلدەندىرىلگەن كولەمدە سۋ الۋ ءۇشىن 2024-جىلعى 6-ماۋسىمدا «باحري-توچيك» سۋ قويماسىنىڭ جۇمىس كەستەسى بويىنشا قازاقستان-وزبەكستان-تاجىكستان تاراپتارىنان ءۇشجاقتى حاتتاماعا قول قويىلدى. حاتتاماعا سايكەس، «دوستىق» كانالىنىڭ قازاقستاندىق بولىگىنە سۋ بەرۋ كولەمى 491,14 ميلليون كۇپمەتر بولدى. ءىس جۇزىندە «دوستىق» كانالى ارقىلى 1-ماۋسىم مەن 30-تامىز ارالىعىندا 532,4 ميلليون كۇپمەتر سۋ بەرىلدى، بۇل كەلىسىلگەن كورسەتكىشتەن 41 ميلليون كۇپمەتر ارتىق.
«سۋارۋ كەزەڭىندە شارۋالاردى سۋارمالى سۋمەن قامتاماسىز ەتىپ قانا قويماي، سولتۇستىك ارال تەڭىزىنە شامامەن 1 ميلليارد كۇپمەتر سۋ جىبەرە الدىق. بۇل وتكەن جىلعى كورسەتكىشتەردەن ءۇش ەسە كوپ. سولتۇستىك ارال تەڭىزىنىڭ كولەمىن 22 ميلليارد تەكشە شاقىرىمعا دەيىن ارتتىرۋعا مۇمكىندىك بەردى»، - دەدى ن. نۇرجىگىتوۆ.
شۋ-تالاس باسسەينى بويىنشا، 26-ساۋىردە بىشكەك قالاسىندا شۋ جانە تالاس وزەندەرىندە مەملەكەتارالىق پايدالانۋداعى سۋ شارۋاشىلىعى قۇرىلىستارىن پايدالانۋ جونىندەگى قازاقستان مەن قىرعىز رەسپۋبليكالارى كوميسسياسىنىڭ 33-وتىرىسى ءوتتى. وتىرىستا 2024-جىلعى سۋارۋ كەزەڭىنە ارنالعان شۋ جانە تالاس وزەندەرىنىڭ مەملەكەتارالىق كوزدەرى بويىنشا سۋ الۋ كەستەلەرى بەكىتىلدى.
تالاس وزەنى بويىنشا بولجانعان 380 ميلليون كۇپمەتر سۋ ورنىنا 418 ميلليون كۇپمەتر سۋ الىندى، بۇل وتكەن جىلمەن سالىستىرعاندا 94,2 ميلليون كۇپمەتر ارتىق. ال شۋ وزەنى بويىنشا سۋ بەكىتىلگەن كەستەگە سايكەس الىندى، بۇل وتكەن جىلمەن سالىستىرعاندا 32 ميلليون كۇپمەتر ارتىق.
«بالقاش-الاكول باسسەينى بويىنشا دا سۋارۋ كەزەڭى ءساتتى ءوتتى، شارۋالاردى تۇراقتى سۋارمالى سۋمەن قامتۋعا 3 ميلليارد ككۇپمەتر سۋ الىندى. قالعان باسسەيندەر بويىنشا سۋارۋ كەزەڭى وتكەن جىلدار دەڭگەيىندە جانە قالىپتى جاعدايدا ءوتتى. جايىق- كاسپيي، نۇرا-سارىسۋ، توبىل-تورعاي، ەسىل، ەرتىس بويىنشا تۇراقتى سۋارۋعا شامامەن 300 ميلليون كۇپمەتر سۋ الىندى»، - دەدى مينيستر.
ەسكە سالساق، كەشە قازاقستاننىڭ بارلىق ايماعىندا سۋارۋ ماۋسىمى اياقتالعانى حابارلاندى.
بۇعان دەيىن حابارلاعانىمىزداي، وزبەكستان سۋارۋ ماۋسىمىنىڭ سوڭىنا دەيىن قازاقستانعا تاعى 500 ميلليون تەكشە مەتر سۋ جىبەرەتىنى بەلگىلى بولدى.
