بيىل سابيلەرگە قويىلعان ەڭ تانىمال ەسىمدەر بەلگىلى بولدى
استانا. KAZINFORM — ۇلتتىق ستاتيستيكا بيۋروسى 2024-جىلى سابيلەرگە قويىلعان ەڭ تانىمال ەسىمدەردى اتادى.
ۇلتتىق ستاتيستيكا بيۋروسى تانىمال سەرۆيستىڭ ءبىرى — «تانىمال ەسىمدەر» ءبولىمىنىڭ مۇمكىندىكتەرىن كەڭەيتتى. ەندى پايدالانۋشىلار سابيلەرگە ەڭ كوپ جانە از قويىلعان ەسىمدەر تۋرالى تولىققاندى اقپارات الا الادى.
بۇرىن «تانىمال ەسىمدەر» ءبولىمى تەك بەلگىلى ءبىر جىل مەن اي ىشىندە تۋعان ۇلدار مەن قىزدار اراسىنداعى تانىمال 10 ەسىم تۋرالى اقپارات بەرىپ كەلگەن. قازىرگى ۋاقىتتا كەڭەيتىلگەن فۋنكتسيونال ارقاسىندا پايدالانۋشىلار ايمەن قاتار، توقسان، جارتى جىل، جىل نەمەسە ناقتى ۋاقىت ارالىعىن تاڭداي الادى. سونداي-اق پايدالانۋشىلار ەندى تۋعان سابيلەرگە قويىلعان ەڭ تانىمال/سيرەك ەسىمدەرى بويىنشا توپ-50 ءتىزىمىن ۇلتتار مەن وڭىرلەر بويىنشا قاراي الادى.
2024-جىلى، وتكەن جىلمەن سالىستىرعاندا، ۇلدار ەسىمى اراسىندا بولماشى وزگەرىس بار. العاشقى وندىقتان نۇريسلام ەسىمى شىعىپ قالدى. ال سوڭعى 10 جىل (2014-جىلدان باستاپ) بويى ءبىرىنشى ورىندا تۇرعان اليحان ەسىمىن مۇحاممەد ەسىمى ىعىستىردى.
2024-جىلى قىزدار اراسىندا ماريام ەسىمى تىزىمنەن امينا ەسىمىن ىعىستىرىپ، العاشقى وندىققا ەندى.
قىزمەت فۋنكتسيونالىنىڭ كەڭەيۋى ارقاسىندا پايدالانۋشىلار تانىمال ەسىمدەردەگى وزگەرىستەردى زەرتتەپ، ترەندتەردى جانە قازاقستانداعى ەسىمدەردى تاڭداۋ مادەني ەرەكشەلىكتەرىن تالداي الادى. ۇلتتىق ستاتيستيكا بيۋروسى بەرىلەتىن اقپاراتتىڭ ساپاسىن جاقسارتۋ جانە قىزمەتتەردىڭ فۋنكتسيونالىن كەڭەيتۋ بويىنشا جۇمىستارىن جالعاستىرادى.
بۇعان دەيىن حابارلانعانداي، قازاقستاندا جاستار اراسىندا 735 مىڭ دارا كاسىپكەر تىركەلگەن.
