بيىل پرەزيدەنت 11 وڭىرگە بارىپ، 60 تان اسا كەزدەسۋ وتكىزدى - بەرىك ءۋالي
استانا. KAZINFORM - ق ر پرەزيدەنتىنىڭ كەڭەسشىسى - باسپا ءسوز حاتشىسى بەرىك ءۋالي مەملەكەت باسشىسى قاسىم-جومارت توقايەۆتىڭ جىل بويى اتقارعان قىزمەتىنە شولۋ جاساپ، قوعامدىق-ساياسي ومىردەگى، الەۋمەتتىك-ەكونوميكالىق دامۋداعى ىرگەلى وزگەرىستەر مەن تابىستار تۋرالى باياندادى.
ونىڭ ايتۋىنشا، پرەزيدەنت بيىل جۇمىس ساپارىمەن ەلىمىزدىڭ 11 وڭىرىنە باردى. ايماقتارداعى 60 تان اسا وندىرىستىك جانە الەۋمەتتىك- مادەني نىساندارمەن تانىسىپ، جۇرتشىلىقپەن كەزدەستى. سونداي-اق ەل ىشىندەگى 41 ءىس-شاراعا قاتىستى. ولاردىڭ قاتارىندا فورۋمدار، كەڭەستەر، وتىرىستار سەكىلدى ءتۇرلى فورماتتا وتكەن جيىندار بار. ەلىمىزدىڭ ساياسي جانە قوعام قايراتكەرلەرىمەن 137 كەزدەسۋ وتكىزدى.
- ەڭ اۋەلى، جىل باسىنداعى اقجولتاي جاڭالىقتى ايتا كەتكەن ابزال. پرەزيدەنت قاسىم-جومارت توقايەۆ 9-قاڭتاردا «الماتى وبلىسىنىڭ اكىمشىلىك- اۋماقتىق قۇرىلىسىنداعى وزگەرىستەر تۋرالى» جارلىققا قول قويدى. جەتىگەن اۋىلى الاتاۋ قالاسى بولىپ قايتا قۇرىلدى. وسىلايشا، كەلەشەكتە الماتى مەن قونايەۆتىڭ ورتاسىندا بوي كوتەرەتىن Alatau City قالاسىنىڭ ىرگەسى قالاندى. بىرنەشە جىلدان بەرى تالقىلانىپ كەلە جاتقان جاڭا ۋربانيستىك جوبانى جۇزەگە اسىرۋعا شەتەلدىك ينۆەستورلار ايرىقشا قىزىعۋشىلىق تانىتىپ وتىر. پرەزيدەنت سينگاپۋر ساپارىندا جانە ودان كەيىن دە الەۋەتتى ينۆەستورلارمەن كەزدەسىپ، الماتى اگلومەراتسياسىن وركەندەگەن ەكونوميكالىق ايماققا اينالدىرۋدى كوزدەيتىن جوبانىڭ جاي-جاپسارىن تالقىلادى، - دەپ جازدى ب. ءۋالي Egemen Qazaqstan گازەتىندەگى ماقالاسىندا.
پرەزيدەنت كەڭەسشىسى سىرتقى ساياساتتا دا جەمىستى جىل بولعانىن ايتۋدا. اتاپ ايتقاندا، قاسىم-جومارت توقايەۆ بيىل 23 رەت شەت مەملەكەتكە ساپارلادى، 19 حالىقارالىق فورۋم مەن سامميت جۇمىسىنا اتسالىستى. حالىقارالىق ءىس-شارالار اياسىندا وزگە ەلدىڭ باسشىلارىمەن 27 رەت كەزدەستى.
سونداي-اق شەت مەملەكەتتەردىڭ جانە ۇكىمەتتەردىڭ باسشىلارىمەن، باسقا دا جوعارى لاۋازىمدى تۇلعالارىمەن، حالىقارالىق جانە وڭىرلىك ۇيىمداردىڭ جەتەكشىلەرىمەن، بيزنەس- قوعامداستىق وكىلدەرىمەن 84 كەزدەسۋ وتكىزدى. 22 مەملەكەتتىڭ ەلشىسىنەن سەنىم گراموتالارىن قابىلدادى.
مەملەكەت باسشىلارىمەن 49 مارتە تەلەفون ارقىلى سويلەستى.
اۆتور
ايجان سەرىكجان قىزى
