بيىل ەۋروپادا ەڭ تومەنگى جالاقى قانداي بولادى
استانا. KAZINFORM – ە و- نىڭ جاڭا ديرەكتيۆاسى ەڭ تومەنگى جالاقى دەڭگەيىن، مىسالى، مەدياندى جالاقىنىڭ %60 ىن بەلگىلەۋگە باعىتتالعان. بريۋسسەل سونداي-اق باعانىڭ وسۋىنە قاراماستان حالىقتىڭ كىرىسىن ساقتاۋ ءۇشىن تۇراقتى يندەكستەۋ جۇرگىزۋگە شاقىردى، دەپ حابارلايدى euronews.
تولىق ايعا ارنالعان زاڭدى ەڭ تومەنگى جالاقى دەڭگەيى كەدەشىلىكپەن كۇرەستە ماڭىزدى ءرول اتقارادى.
بيىلعى جىل ە و- عا مۇشە ەلدەردە ءومىر ءسۇرۋ جانە جۇمىس جاعدايلارىن جاقسارتۋ جولىنداعى ماڭىزدى كەزەڭ بولدى، ويتكەنى بريۋسسەلدىڭ ەڭ تومەنگى جالاقى تۋرالى جاڭا ديرەكتيۆاسى بيىلعى جىلدىڭ 15- قاراشاسىنا دەيىن كۇشىنە ەنۋى ءتيىس.
ەۋروپانىڭ ءبىرقاتار ەلدەرىندە ەڭ تومەنگى جالاقى الاتىن جۇمىسشىلار ۇلەسى %10 دان اسادى.
ە و- عا مۇشە 27 ەلدىڭ 22 ءسى ەڭ تومەنگى جالاقى شەگىن ەنگىزدى. دانيا، يتاليا، اۋستريا، فينليانديا جانە شۆەتسيادا ساياساتكەرلەر بۇل شاراعا كەلىسپەي تۇر. كيپر ەڭ تومەنگى جالاقىنى وتكەن جىلدىڭ باسىندا عانا ەنگىزدى.
ە و- عا ۇمىتكەر جانە الەۋەتتى ۇمىتكەر 10 ەلدىڭ ىشىندە سەگىزى ۇلتتىق ەڭ تومەنگى جالاقىنى بەلگىلەدى. ول چەرنوگوريا، مولدوۆا، سولتۇستىك ماكەدونيا، گرۋزيا، البانيا، سەربيا، تۇركيا جانە ۋكراينادا بار، ءبىراق بوسنيا جانە گەرتسەگوۆينا مەن كوسوۆودا جوق.
ەۋروپالىق ەركىن ساۋدا قاۋىمداستىعى (ە ە س ق) ەلدەرى - نورۆەگيا، شۆەيتساريا جانە يسلانديادا ەڭ تومەنگى جالاقى بەلگىلەنگەن جوق.
ە و بويىنشا ەڭ تومەنگى جالاقى ءبىر-بىرىنەن قاتتى ەرەكشەلەنەدى. قازىرگى ۋاقىتتا ول بولگاريادا ايىنا 477 ەۋرودان ليۋكسەمبۋرگتە ايىنا 2571 ەۋروعا دەيىن تۇرلەنۋدە.
ەڭ تومەنگى جالاقى ليۋكسەمبۋرگ، يرلانديا، نيدەرلاند جانە گەرمانيادا 2000 ەۋرودان اسادى، ال فرانتسيادا بۇل كورسەتكىش 1767 ەۋرو، يسپانيادا - 1323 ەۋرو. ونىڭ ۇستىنە، ماسەلە برۋتتو-جالاقى تۋرالى بولىپ تۇر، قىزمەتكەر قولعا ودان دا از الادى.
