بيىل رەكوردتىق كولەمدە تۇرعىن ءۇي پايدالانۋعا بەرىلەدى - سەرىك جۇمانعارين
استانا. KAZINFORM - بيىل ەلىمىزدە 19 ميلليون شارشى مەتر تۇرعىن ءۇي پايدالانۋعا بەرىلەدى. بۇل تۋرالى ۇكىمەت باسشىسىنىڭ ورىنباسارى سەرىك جۇمانعارين ءمالىم ەتتى.
- بيىل رەكوردتىق كولەمدەگى كەمىندە 19 ميلليون شارشى مەتر تۇرعىن ءۇي پايدالانۋعا بەرىلەدى. بۇل ناتيجەلەرگە جاڭا ينفراقۇرىلىمدى سالۋدان جانە يپوتەكالىق كرەديت كولەمىن ۇلعايتۋدان باستاپ جالعا بەرىلەتىن تۇرعىن ۇيمەن قامتاماسىز ەتۋگە دەيىنگى بارلىق اسپەكتىلەردى قامتيتىن باستامالار ارقىلى قول جەتكىزىلەدى، - دەدى سەرىك جۇمانعارين ۇكىمەت وتىرىسىندا.
ۆيتسە- پرەمەردىڭ مالىمدەۋىنشە، ەكونوميكانىڭ ناقتى سەكتورىن قارجىلاندىرۋدى ۇلعايتۋعا باعىتتالعان باستامالار جالپى ىشكى ءونىمنىڭ ۇلعايۋىنا الىپ كەلەدى.
- جوعارىدا اتالعان شارالاردىڭ ۋاقتىلى ورىندالۋىن باقىلاۋ ءۇشىن مەنىڭ باسقارۋىممەن ەكونوميكالىق ءوسۋ جونىندەگى جەدەل شتاب قۇرىلدى جانە جۇمىس ىستەيدى. بارلىق تۋىندايتىن ماسەلە جەدەل جانە دەرەۋ شەشىلەدى، - دەيدى ول.
ايتا كەتسەك، ەلىمىزدە 2025 -جىلدىڭ قاڭتارىندا پايدالانۋعا بەرىلگەن جاڭا نىسانداردىڭ جالپى الاڭى 942,8 مىڭ شارشى مەتر. ونىڭ ىشىندە تۇرعىن ءۇيدىڭ جالپى الاڭى 2024 -جىلدىڭ قاڭتارىمەن سالىستىرعاندا %26,9 ازايىپ، 766,1 مىڭ شارشى مەتردى قۇرادى.
