بيىل قازاقستاندا 4 مىڭ شاقىرىم جول اقىلى بولادى
استانا. قازاقپارات - بيىل قوسىمشا 4 مىڭ شاقىرىم اقىلى ۋچاسكەنى ىسكە قوسۋ جوسپارلانىپ وتىر. بۇل بيۋجەت كىرىسىن 60 ميلليارد تەڭگەگە دەيىن ۇلعايتۋعا مۇمكىندىك بەرەدى.

ۇكىمەت وتىرىسىندا كولىك ءمينيسترى مارات قارابايەۆ اقىلى جولداردان تۇسەتىن تابىستىڭ ايتارلىقتاي وسكەنى تۋرالى باياندادى. 2024-جىلى ءتۇسىم سوماسى 48 ميلليارد تەڭگەگە جەتتى.
«بۇل رەتتە، وسى اقىلى جولداردان تۇسكەن قاراجاتتىڭ ءبىر بولىگىن قۇرىلىس جۇمىستارىنا الىنعان قارىزداردىڭ پايىزدىق مولشەرلەمەلەردى وتەۋگە جۇمساۋ ماسەلەسى قاراستىرىلىپ وتىر»، - دەپ اتاپ ءوتتى مينيستر.
ءمينيستردىڭ سوزىنشە، بيۋدجەتكە تۇسەتىن جۇكتەمەنى ازايتۋ ءارى ءوزىن-ءوزى اقتاۋ ماقساتىندا رەكونسترۋكتسيالاۋ جانە جوندەۋ جۇمىستارى اياقتالعان ۋچاسكەلەردە «اقىلى جول» مارتەبەسىن كەزەڭ-كەزەڭىمەن ەنگىزۋ جالعاسىپ جاتىر. قازىرگى ۋاقىتتا بۇكىل ەلىمىز بويىنشا ۇزىندىعى 3,2 مىڭ شاقىرىم اقىلى جول جۇيەسى جۇمىس ىستەيدى.
«2029-جىلعا دەيىن 60 بىرلىك كەشەندى وبەكتىلەردىڭ قۇرىلىسى جوسپارلانعان، ونىڭ ىشىندە 10 بىرلىگى وسى جىلى جۇزەگە اسىرىلادى. ينۆەستيتسيا كولەمى 120 ميلليارد تەڭگە. ولاردا جاتىن ورىن، TIR تۇراعى جانە جانارماي بەكەتتەرى قاراستىرىلعان. جول بويى سەرۆيستىك وبەكتىلەرىن دامىتۋدىڭ نەگىزىندە ەلىمىزدە ءبىرىنشى رەت وتاندىق قوناقۇيلەر جۇيەسى جانە ولاردىڭ فرانشيزاسى قالىپتاساتىن بولادى. بۇل جول بويى وبەكتىلەرىنىڭ تاسىمال پروتسەسىمەن قاتار، اۆتوتۋريزمنىڭ دە دامۋىنا سەپتىگىن تيگىزەدى»، - دەپ اتاپ ءوتتى مارات قارابايەۆ.
ايتا كەتەيىك، بۇگىندە ەلىمىزدە 1446 جول بويى سەرۆيستىك وبەكتىلەرى جۇمىس ىستەيدى. سونداي-اق ۇكىمەت وتىرىسىندا بەكتەنوۆ اكىمدەرگە جول سالۋعا ارنالعان جەر تەلىمدەرىنىڭ نىسانالى ماقساتىن وزگەرتۋگە موراتوري جاريالاۋدى تاپسىردى.