بيىل قازاقستان قارۋلى كۇشتەرىندە مىڭنان اسا جاۋىنگەرلىك دايارلىق ءىس-شارالارى وتكىزىلدى
اسكەري وقۋ-جاتتىعۋلار، جاۋىنگەرلىك اتىستار، جاتتىعۋلار مەن پراكتيكالىق ساباقتار بولىمشەلەردىڭ جاۋىنگەرلىك ازىرلىگى مەن جاۋىنگەرلىك قابىلەتىن، ارميانى جاساقتاۋ جۇيەسىن جەتىلدىرۋگە جانە اۋماقتىق اسكەرلەردى دامىتۋعا باعىتتالعان.
قازاقستان اۋماعىندا بارلىعى 6 حالىقارالىق وقۋ-جاتتىعۋ ءوتتى. سونىمەن قاتار اسكەري قىزمەتشىلەر باسقا ەلدەردەگى 24 وقۋ-جاتتىعۋعا جانە جارىستارعا قاتىستى، دەپ حابارلايدى Kazinform ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
تۇركيادا كارس ەلدىمەكەنىنىڭ «اقبالا» پوليگونىندا وتكىزىلگەن «ك ى ش-2023» كوپۇلتتى جاۋىنگەرلىك وقۋ-جاتتىعۋى بارىسىندا قازاقستاندىق اسكەري قىزمەتشىلەر تاكتيكالىق-ارنايى دايارلىق دەڭگەيىنىڭ جوعارى ەكەنىن كورسەتتى. وعان ازەربايجان، بوسنيا جانە گەرتسەگوۆينا، گرۋزيا، تۇركيا جانە وزبەكستاننىڭ اسكەري كونتينگەنتتەرى قاتىستى.
ازەربايجاندا وتكەن «حازري-2023» بىرلەسكەن تاكتيكالىق وقۋ-جاتتىعۋلارىنا «سارىارقا»، «ورال» زىمىراندى-ارتيللەريالىق كورابلدەرى جانە «جايىق» گيدروگرافيالىق كەمەسى جۇمىلدىرىلدى. كاسپي تەڭىزىنىڭ ازەربايجان سەكتورىنداعى جاتتىعۋلار ەكى ەلدىڭ اسكەري قىزمەتشىلەرى اراسىندا ءوزارا تاجىريبە الماسۋعا ىقپال ەتتى.
وزبەكستانداعى «انگرەن» تاۋ پوليگونىنداعى «قالقان-2023» تاكتيكالىق-ارنايى وقۋ-جاتتىعۋىنا قازاقستان تاراپىنان ارميالىق، اسكەري-كولىكتىك اۆياتسيا بولىمشەلەرى، سونداي-اق پاراشيۋتتىك دايارلاۋ ورتالىعىنىڭ ماماندارى قاتىستى. قورعانىس ءمينيسترى گەنەرال-پولكوۆنيك رۋسلان جاقسىلىقوۆ وقۋ-جاتتىعۋدىڭ بەلسەندى كەزەڭىن باقىلادى.
حالىقارالىق اسكەري ىنتىماقتاستىق جوسپارىنا سايكەس بەلارۋس اۋماعىندا ۇ ق ش ۇ- عا مۇشە مەملەكەتتەردىڭ اسكەري كونتينگەنتتەرىمەن ء«وزارا ءىس-قيمىل-2023» بىرلەسكەن وقۋ-جاتتىعۋى جانە «ىزدەۋ-2023» ارنايى وقۋ-جاتتىعۋى وتكىزىلدى.
ەكى ەلدىڭ اسكەري ۇشقىشتارى مەن قازاقستاننىڭ دەسانتتىق-شابۋىلداۋ اسكەرلەرى اسكەري قىزمەتشىلەرىنىڭ قاتىسۋىمەن قازاقستان مەن ءۇندىستاننىڭ «قاز ۇندى-2023» بىرلەسكەن وقۋ-جاتتىعۋى ءوتتى.
مەملەكەت باسشىسى قاسىم-جومارت توقايەۆتىڭ جەتىسۋ وبلىسىنداعى پوليگونىندا ۆەدومستۆوارالىق ۇيلەستىرۋدى قامتاماسىز ەتۋ، كۇش قۇرىلىمدارىنىڭ جەدەل جانە اسكەري-تەحنيكالىق ۇيلەسىمدىلىگىن جولعا قويۋ جونىندەگى تاپسىرماسىن ىسكە اسىرۋ ءۇشىن دەسانتتىق-شابۋىلداۋ اسكەرلەرىنىڭ بولىمشەلەرىمەن تاكتيكالىق وقۋ-جاتتىعۋلار جانە «بەكەت-2023» وقۋ-جاتتىعۋى ءوتتى.
شىعىس قازاقستان، الماتى جانە قاراعاندى وبلىستارىنداعى «شىعىس»، «نوۆو-احميروۆو»، «يزەندى» جانە «سپاسسك» پوليگوندارىندا «شىعىس-2023» جەدەل-تاكتيكالىق كوماندالىق-شتابتىق وقۋ-جاتتىعۋى ءوتتى. وعان 5 مىڭعا جۋىق اسكەري قىزمەتشى جانە 1,5 مىڭ قارۋ-جاراق پەن اسكەري تەحنيكا جۇمىلدىرىلدى.
«جاعالاۋ» وقۋ-جاتتىعۋ پوليگونىندا وتكەن «باتىل تويتارىس-2023» ستراتەگيالىق كوماندالىق-شتابتىق وقۋ-جاتتىعۋلارىنىڭ بارىسىن ق ر پرەزيدەنتى - قارۋلى كۇشتەردىڭ جوعارعى باس قولباسشىسى قاسىم-جومارت توقايەۆ باقىلادى. ونىمەن ءبىر مەزگىلدە كاسپي تەڭىزىنىڭ اكۆاتورياسىندا اسكەري-تەڭىز كۇشتەرى اۆياتسيا مەن ارنايى وپەراتسيالار كۇشتەرىنىڭ قولداۋىمەن ماڭىزدى وبەكتىلەردىڭ قاۋىپسىزدىگىن قامتاماسىز ەتتى. بىرلەسكەن وقۋ-جاۋىنگەرلىك مىندەتتەر الماتى، قاراعاندى، سولتۇستىك قازاقستان جانە اباي وبلىستارىنداعى پوليگونداردا دا ورىندالدى.
جۇمىلدىرۋ دايىندىعى شارالارى شەڭبەرىندە «وڭتۇستىك» ءو ڭ ق اسكەري بولىمدەرىمەن جانە جامبىل وبلىسىنىڭ قورعانىس ىستەرى جونىندەگى دەپارتامەنتىمەن وقۋ-جاتتىعۋلار، پاۆلودار، ماڭعىستاۋ وبلىستارى مەن الماتى قالاسى اۋماقتىق قورعانىس بريگادالارى باسقارماسىمەن كوماندالىق-شتابتىق جۇمىلدىرۋ وقۋ-جاتتىعۋلارى وتكىزىلدى.
جالپى قارۋلى كۇشتەردە مىڭعا جۋىق جاۋىنگەرلىك دايارلىق شارالارى، جاۋىنگەرلىك ماشينالاردى جۇرگىزۋدەن 16 مىڭنان اسا ساباق جانە 40 مىڭنان استام جاۋىنگەرلىك اتىس وتكىزىلدى. ولاردىڭ بارلىعى جەكە قۇرامنىڭ دالالىق ماشىعىن جەتىلدىرۋگە جانە بولىمشەلەردى جاۋىنگەرلىك ۇيلەستىرۋگە باعىتتالدى.
