بيىل قازاقستان بانكتەرى قانشا تابىس تاپتى
قازاقستاندا ەكىنشى دەڭگەيدەگى 21 بانك جۇمىس ىستەيدى. جىل باسىنان بەرى ولاردىڭ اكتيۆتەرى 48,4 تريلليون تەڭگەنى قۇرادى. بۇل جونىندە ق ر قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ولجاس قيزاتوۆ ايتتى، دەپ حابارلايدى Kazinform ءتىلشىسى.
«قازىرگى ۋاقىتتا بانك سەكتورى تۇراقتى دامۋدا. بانك سەكتورىن كاپيتالداندىرۋ كورسەتكىشتەرى جوعارى، بۇل اعىمداعى كۇيزەلىستەردى ەڭسەرۋگە مۇمكىندىك بەرەدى. بانك سەكتورىندا 21 ەكىنشى دەڭگەيلى بانك بار. ونىڭ ىشىندە شەتەلدىڭ قاتىسۋىمەن 11، مەملەكەتتىڭ 100 پايىز قاتىسۋىمەن 2 بانك جۇمىس ىستەيدى. 2023-جىلعى 10 ايدىڭ قورىتىندىسى بويىنشا بانكتەردىڭ اكتيۆتەرى 8,6 پايىزعا ۇلعايىپ، 48,4 تريلليون تەڭگەنى قۇرادى. بانك جۇيەسىندەگى كليەنتتەردىڭ سالىمدارى 4,8 پايىزعا ءوسىپ، 33,1 تريلليون تەڭگەنى قۇرادى»، - دەدى سپيكەر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
و. قيزاتوۆ حالىق پەن بيزنەس دەپوزيتتەرىنىڭ تۇراقتى ءوسىپ كەلە جاتقانىن اتاپ ءوتتى. ولار 5 جىل ىشىندە ەكى ەسەگە ۇلعايعان.
«جىل باسىنان بەرگى ۇلعايۋ 4,8 پايىزدى قۇرايدى، بۇل بانك جۇيەسىنە دەگەن سەنىمنىڭ جوعارى دەڭگەيىن راستاپ وتىر. دەپوزيتتىك بازانى دوللارلاندىرۋ دەڭگەيى جىل باسىنان بەرى 36,7 پايىزدان 29,5 پايىزعا دەيىن تومەندەدى. بانك سەكتورىنىڭ قازىرگى سىن-تاۋەكەلدەردى وتەۋ ءۇشىن جەتكىلىكتى كاپيتال قورى بار. نەگىزگى كاپيتالدىڭ جەتكىلىكتىلىك كوەففيتسيەنتى - 19,3 پايىز، مەنشىكتى كاپيتالدىڭ جەتكىلىكتىلىك كوەففيتسيەنتى - 21,8 پايىز، بۇل زاڭنامادا بەلگىلەنگەن نورماتيۆتەردەن ەداۋىر اسادى»، - دەيدى و. قيزاتوۆ.
بانك سەكتورىنىڭ مەنشىكتى كاپيتالى 6,4 تريلليون تەڭگەگە جەتكەن، ول بولىنبەگەن پايدانى ۇلعايتۋ ەسەبىنەن جىل باسىنان بەرى 22,7 پايىزعا ۇلعايدى.
«2023-جىلعى 10 ايدا بانكتەر 1,8 تريلليون تەڭگە مولشەرىندە پايدا الدى، بۇل 2022-جىلعى وسىنداي كەزەڭمەن سالىستىرعاندا 53,7 پايىزعا كوپ. ول كوپ جاعدايدا بانكتەردىڭ پايىزدىق كىرىستەرىنىڭ ۇلعايۋىنا بايلانىستى بولدى. بانك اكتيۆتەرى رەنتابەلدىلىگىنىڭ كورسەتكىشى 4,6 پايىز، كاپيتال رەنتابەلدىلىگى 36,2 پايىزدى قۇرادى. 1- قاراشاداعى جاعداي بويىنشا بانكتەردىڭ وتىمدىلىگى جوعارى اكتيۆتەرى 14,6 تريلليون تەڭگەنى نەمەسە اكتيۆتەردىڭ 30 پايىزىن قۇرادى. بۇل بانكتەردىڭ كليەنتتەر الدىنداعى مىندەتتەمەلەرىنە تولىق كولەمدە قىزمەت كورسەتۋىنە مۇمكىندىك بەرەدى»، - دەدى ءتوراعانىڭ ورىنباسارى.
سونىمەن بىرگە، پورتفەل ساپاسىنىڭ كورسەتكىشتەرى دە ايتارلىقتاي جاقسارعان.
«جۇمىس ىستەمەيتىن كرەديتتەر كوەففيتسيەنتى تاريحي تۇرعىدان ەڭ تومەن مانگە جەتىپ، 2022-جىلدىڭ باسىنان بەرى 3,3 پايىز دەڭگەيىندە ساقتالىپ وتىر. بۇل كولەمنىڭ 73,1 پايىزى پروۆيزيالارمەن، قارىزداردىڭ قالعان بولىگى تۇراقتى كەپىل تۇرلەرىمەن وتەلدى»، - دەيدى ولجاس قيزاتوۆ.
