بيىل قانشا ەتنيكالىق قازاق تاريحي وتانىنا ورالدى؟
استانا. قازاقپارات - 2025-جىلدىڭ باسىنان بەرى 4,4 مىڭنان اسا ەتنيكالىق قازاق قانداس مارتەبەسىن الدى.
1991-جىلدان بەرى رەسپۋبليكاعا 1 ميلليون 152 مىڭنان اسا ەتنيكالىق قازاق ورالدى.
جىل باسىنان قازاقستانعا قانداستاردىڭ 45,8 پايىزى قىتايدان، 40,9 پايىزى وزبەكستاننان، 5,4 پايىزى تۇرىكمەنستاننان، 3 پايىزى مونعوليادان، 2,3 پايىزى رەسەيدەن جانە 2,6 پايىزى باسقا ەلدەردەن كەلگەن.
ەڭبەككە قابىلەتتىلەر سانى
«1-مامىرداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 59,7 پايىزى، ەڭبەككە قابىلەتتى جاستان كىشىلەر سانى 31,9 پايىزى جانە زەينەتكەرلەر سانى 8,4 پايىزى بولادى»، - دەپ جازىلعان حابارلامادا.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 17,4 پايىزى جوعارى ءبىلىمدى، 26,8 پايىزى ورتا كاسىبي ءبىلىمدى، 53,6 پايىزى جالپى ورتا ءبىلىمدى جانە 2,2 پايىزىنىڭ ءبىلىمى جوق.
قاي وڭىرلەرگە قونىستانىپ جاتىر؟
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستانعان. قانداستاردى قونىستاندىرۋ ءۇشىن مىناداي ەڭبەك كۇشى تاپشى وڭىرلەر انىقتالعان: اقمولا، اباي، قوستاناي، پاۆلودار، اتىراۋ، باتىس، شىعىس جانە سولتۇستىك قازاقستان وبلىستارى.
