بيىل قانشا مىڭ تۇلەك مەكتەپ بىتىرەدى
استانا. KAZINFORM - بيىل 11-سىنىپتى 186 مىڭنان استام تۇلەك بىتىرەدى. بۇل تۋرالى وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلدايەۆا ايتتى.
«22 مىڭنان استام مەكتەپكە دەيىنگى، ورتا ءبىلىم، تەحنيكالىق جانە كاسىپتىك ءبىلىم وشاقتارى بيىلعى وقۋ جىلىن اياقتاۋعا ازىرلىك ۇستىندە. بۇل ۇيىمداردا بيىلعى وقۋ جىلىندا 5 ميلليوننان استام بالا ءبىلىم مەن تاربيە الدى. وسى جىلى 341 مىڭنان استام تۇلەك 9-سىنىپتى اياقتايدى، ولار الداعى ۋاقىتتا 10-سىنىپتى جالعاستىرۋ نەمەسە كوللەدجگە ءتۇسۋ تۋرالى شەشىم قابىلدايتىن بولادى. 11-سىنىپتى 186 مىڭنان استام تۇلەك بىتىرۋدە. ولار ەندى بولاشاق ماماندىقتارىن تاڭدايدى»، - دەدى ول ورتالىق كوممۋنيكاتسيالار قىزمەتىندەگى بريفينگتە.
ونىڭ ايتۋىنشا، وقۋ-اعارتۋ ءمينيسترىنىڭ بۇيرىعىنا سايكەس مەكتەپتەردە وقۋ مەرزىمى 2024-جىلدىڭ 25-مامىرىندا اياقتالادى. 24-مامىردا رەسپۋبليكانىڭ بارلىق مەكتەپتەرىندە 1-10 سىنىپتار وقۋشىلارىنا «ءبىلىمىم - وتانىما!» تاقىرىبىندا ءبىرىڭعاي سىنىپ ساعاتى وتەدى. سىنىپ ساعاتىنىڭ ماقساتى: بالالاردى جىل بويى العان ءبىلىمىنىڭ ناتيجەسىن قورىتىندىلاي بىلۋگە تاربيەلەۋ. سونداي-اق 25-مامىر كۇنى مەكتەپ تۇلەكتەرىنىڭ قاتىسۋىمەن «مەكتەبىم، ساعان مىڭ العىس!» اتتى سالتاناتتى ءىس-شارا مەكتەپ قابىرعاسىندا وتكىزىلەدى. سالتاناتتى ءىس-شارانى وتكىزۋ فورماتىن، قاتىسۋشىلار قۇرامىن ءبىلىم بەرۋ ۇيىمدارى وزدەرى انىقتايدى.
«باستاۋىش سىنىپ وقۋشىلارى مامىر ايىنىڭ سوڭعى كۇندەرىنەن ءداستۇرلى تۇردە جازعى دەمالىسقا شىعادى. ال 5-11-سىنىپ وقۋشىلارىنا 27-مامىردان باستاپ ەمتيحاندار وتكىزىلەتىن بولادى. ەمتيحاندار اياقتالعان سوڭ ولار دا جازعى دەمالىسقا شىعادى. بيىلعى جىلى العاش رەت ءبىلىم الۋشىلاردىڭ باعدارلامالار مازمۇنىن مەڭگەرۋىن باعالاۋ ماقساتىندا 5-8، 10-سىنىپتار ارالىعىندا قازاق ءتىلى مەن ادەبيەتى پاندەرىنەن ارالىق ەمتيحاندار وتكىزىلەدى»، - دەدى ناتاليا جۇمادىلدايەۆا.
