بيىل قانشا ادامعا راقىمشىلىق جاسالدى - باس پروكۋراتۋرا ستاتيستيكاسى

استانا. KAZINFORM - جىل بويى قانشا ادامعا راقىمشىلىق جاسالدى جانە قانشا ادام شارتتى تۇردە مەرزىمىنەن بۇرىن بوساپ شىقتى؟

اگەنتتىكتىڭ رەسمي ساۋالدارىنا باس پروكۋراتۋرادان كەلەسىدەي جاۋاپ الدىق.

— وتكەن جىلى 728 ادامعا قاتىستى سوتپەن راقىمشىلىق بويىنشا قىلمىستىق قۋدالاۋ قىسقارتىلدى، بيىل 9 ايدىڭ ىشىندە 497 ادامعا قۋدالاۋ قىسقاردى. سونىمەن قاتار بىلتىر 119 سوتتالعان ادام، ال بيىل 9 ايدا 15 سوتتالعان ادام راقىمشىلىق بويىنشا جاۋاپكەرشىلىكتەن ۇكىم نەگىزىندە بوساتىلدى، — دەلىنگەن جاۋاپتا.

سونداي-اق، باس پروكۋراتۋرا قۇرامىنداعى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەت اگەنتتىك جولداعان ءبىراز ساۋالدىڭ جاۋابىنا قاتىستى مالىمەتتىڭ جوق ەكەنىن حابارلادى.

ونىڭ ىشىندە راقىمشىلىق جاسالعان مەملەكەتتىك قىزمەتكەرلەر تۋرالى ستاتيستيكالىق مالىمەتتەر بولماي شىقتى.

سول سياقتى كوميتەتتە جازاسىن تولىق وتەمەي، مەرزىمىنەن بۇرىن بوساپ شىققاندار تۋرالى دا ستاتيستيكا جوق.

ەسكە سالساق، ىشكى ىستەر مينيسترلىگىنىڭ جىل بويى قانشا قازاقستاندىق جازاسىن وتەۋ مەرزىمىنەن بۇرىن بوساپ شىققانى تۋرالى مالىمەتىن جاريالاعان ەدىك.