بيىل ۋنيۆەرسيتەتتەردىڭ ءبىرىنشى كۋرسىنا 140 مىڭنان استام ستۋدەنت بارادى

استانا. KAZINFORM - وسى جىلدىڭ سوڭىندا جيناقتاۋشى «كەلەشەك» باعدارلاماسى دا ىسكە قوسىلادى. بۇل تۋرالى ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى.

«بيىل مەكتەپتى 188000 استام تۇلەك ءبىتىردى. ولاردىڭ 140 مىڭنان استامى جوعارى وقۋ ورىندارىنا ءبىرىنشى كۋرسقا كەلۋى مۇمكىن. وسىلايشا، وسى وقۋ جىلىنداعى ستۋدەنتتەردىڭ جالپى سانى 650 مىڭعا جۋىق ادامدى قۇرايدى. وزدەرىڭىز كورىپ وتىرعانداي، 2020 -جىلدان باستاپ مەكتەپ تۇلەكتەرىنىڭ سانى جىل سايىن ۇلعايىپ كەلەدى. سوندىقتان ءبىز گرانت سانىن كوبەيتتىك»، - دەدى ساياسات نۇربەك.

بۇل تۇرعىدا ول قوسىمشا جوعارى ءبىلىمنىڭ قولجەتىمدىلىگىن ارتتىرۋ تەتىكتەرى بار ەكەنىن ايتتى. اتاپ ايتقاندا، ديففەرەنسيالدى گرانتتار، جەڭىلدەتىلگەن كرەديتتەر، «ۇلتتىق قور - بالالارعا» جانە «كەلەشەك» باعدارلاماسى ەسكەرىلگەن.

«بيىل ۇلتتىق قور - بالالارعا» جۇيەسى ىسكە قوسىلدى. ءار بالاعا ارنايى ەسەپ-شوت اشىلدى. وسى جىلدىڭ سوڭىندا جيناقتاۋشى «كەلەشەك» باعدارلاماسى دا ىسكە قوسىلادى. ءقازىر ءتيىستى زاڭنامالىق وزگەرىستەر پارلامەنت ءماجىلىسىنىڭ قاراۋىندا جاتىر»، - دەدى مينيستر

ۆەدومستۆو مالىمەتىنە قاراعاندا، قازىرگى كەزدە ەلىمىزدە 120 جوعارى وقۋ ورنى جۇمىس ىستەپ جاتىر (11 ۇلتتىق، 29 مەملەكەتتىك، 14 ازاماتتىق ەمەس، 1 دەربەس ءبىلىم بەرۋ ۇيىمى، 1 حالىقارالىق، 16 اكسيونەرلىك جانە 48 جەكەمەنشىك).

اۆتور

رۋسلان عابباسوۆ