بيىل ەلىمىزدە وزبەكستاننىڭ مادەنيەت كۇندەرى ۇيىمداستىرىلادى

 استانا. KAZINFORM -بيىل ەلىمىزدە وزبەكستاننىڭ مادەنيەت كۇندەرى ۇيىمداستىرىلادى.

بۇل تۋرالى ەلوردادا پرەمەر- ءمينيستردىڭ ورىنباسارى - سىرتقى ىستەر ءمينيسترى مۇرات نۇرتىلەۋمەن كەڭەيتىلگەن قۇرامداعى كەلىسسوزدەردەن كەيىنگى بريفينگتە وزبەكستان سىرتقى ىستەر ءمينيسترى باحتيەر سايدوۆ ايتتى.

«ەكونوميكالىق جانە ساۋدا قاتىناستارى ءبىزدىڭ قارىم-قاتىناسىمىزدىڭ ماڭىزدى باعىتتارى سانالادى. قازاقستان - ءبىزدىڭ ورتالىق ازياداعى ەڭ ءىرى ساۋدا سەرىكتەسىمىز. سوڭعى جىلدارى ءوزارا تاۋار اينالىمى ەكى ەسە ءوستى. كوپ ۇزاماي ءبىز بۇل كورسەتكىشتى تاعى 2-3 ەسە ارتتىرۋ جولدارىن تالقىلادىق. وتكەن جىلدىڭ قاراشا ايىندا حالىقارالىق ونەركاسىپتىك ىنتىماقتاستىق ورتالىعىن قۇرۋ تۋرالى ۇكىمەتارالىق كەلىسىمگە قول قويىلدى. بۇل، ءوز كەزەگىندە، قوسىلعان قۇن تىزبەگىن قۇرۋ ارقىلى جاڭا نارىقتاردى بىرلەسىپ اشۋعا جانە ولارعا باسەكەگە قابىلەتتى ءونىمدى ەكسپورتتاۋعا مۇمكىندىك بەرەدى»، - دەدى ول.

ونىڭ اتاپ وتۋىنشە، ەكى ەلدىڭ كولىك جانە ترانزيتتىك الەۋەتىن ارتتىرۋ -الدىدا تۇرعان وزەكتى مىندەتتەردىڭ ءبىرى. سونداي- اق، شەكارالاس وڭىرلەردە ورنالاسقان وتكىزۋ پۋنكتتەرىن جاڭعىرتۋ، ولاردىڭ وتكىزۋ مۇمكىندىكتەرىن كەڭەيتۋ، كەدەندىك جانە باسقا دا قىزمەتتەردى سيفرلاندىرۋ ماسەلەلەرى دە بار.

«بارشاڭىزعا بەلگىلى، كليماتتىڭ وزگەرۋى اياسىندا سۋ رەسۋرستارىن پايدالانۋ ماسەلەلەرى باسىمدىققا يە بولۋدا. سوندىقتان ورتالىق ازياداعى ترانسشەكارالىق وزەن سۋلارىن ۇتىمدى باسقارۋدا زاماناۋي تەحنولوگيالاردى ەنگىزۋگە، حالىقارالىق ارالدى قۇتقارۋ قورىنىڭ قۇقىقتىق جانە قۇرىلىمدىق نەگىزدەرىن نىعايتۋعا باسا نازار اۋداردىق»، - دەدى وزبەك ءمينيسترى.

سونىمەن قاتار ول مادەني- گۋمانيتارلىق بايلانىس وزبەك- قازاق قاتىناستارىنىڭ نەگىزى سانالاتىندىعىن، وتكەن جىلدىڭ ماۋسىم ايىندا وزبەكستاندا قازاق مادەنيەتىنىڭ كۇندەرى سالتاناتتى تۇردە اتالىپ وتكەنىن ايتتى.

«2024-جىلى قازاقستاندا وزبەكستاننىڭ مادەنيەت كۇندەرىن ۇيىمداستىرامىز»، - دەدى باحتيەر سايدوۆ.

اۆتور

مارلان جيەمباي