بيىل ەلىمىزدە سۋپەركومپيۋتەرلەر ىسكە قوسىلادى
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى يننوۆاتسيالار دامىتۋ دەپارتامەنتىنىڭ ديرەكتورى دارحان مىرزابايەۆ ەلىمىزدە جىل سوڭىنا دەيىن سۋپەكومپتەرلەردىڭ ىسكە قوسىلاتىنىن جانە ونىڭ ارتىقشىلىعى تۋرالى ايتىپ بەردى.
«مەملەكەت باسشىسىنىڭ تاپسىرماسى بويىنشا 2024 -جىلدىڭ سوڭىنا دەيىن «سامۇرىق- قازىنا» ۇلتتىق ءال- اۋقات قورى جانە Group42 كومپانياسىمەن بىرلەسىپ نەعۇرلىم زاماناۋي تەحنولوگيالاردى پايدالانا وتىرىپ، سۋپەركومپيۋتەر ىسكە قوسىلاتىن بولادى. وسى ورايدا ءبىزدىڭ مينيسترلىكتىڭ پايىمى - مامانداندىرىلعان دەرەكتەر ورتالىقتارىندا ورنالاستىرا وتىرىپ، ەسەپتەۋ قۋاتىن جالعا الۋ جانە ساتىپ الۋ تۇرىندە تەحنولوگيالىق ينفراقۇرىلىمدى (سۋپەركومپيۋتەر) قۇرۋدى كوزدەيدى. جاساندى ينتەللەكت ءۇشىن قاجەتتى ەسەپتەۋ رەسۋرستارىنىڭ كولەمى مەملەكەتتىك ورگانداردىڭ، جوعارى وقۋ ورىندارىنىڭ، عىلىمي قوعامداستىقتىڭ جانە جەكە سەكتوردىڭ قاجەتتىلىكتەرىنە سايكەس ايقىندالاتىن بولادى»، - دەدى دارحان مىرزابايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
دەپارتامەنت ديرەكتورىنىڭ ايتۋىنشا، ەكونوميكا سەكتورلارى، اقپاراتتىق تەحنولوگيالار، قارجىلىق قىزمەتتەر، دەنساۋلىق ساقتاۋ، ەنەرگەتيكا جانە ءوندىرىستى قوسا العاندا، جاساندى ينتەللەكتىدەن ايتارلىقتاي پايدا كورەدى.
«سۋپەركومپيۋتەر - جاساندى ينتەللەكت مودەلدەرىن قۇرۋعا قىزمەت ەتەدى جانە عىلىمي، اكادەميالىق ورتاعا، سونداي-اق جاساندى ينتەللەكت ونىمدەرىن جاساۋدا كوممەرتسيالىق ماقساتتا قول جەتىمدى بولادى. بۇل جاساندى ينتەللەكت سالاسىنداعى ەسەپتەۋ رەسۋرستارىنا سۇرانىستىڭ ارتۋىن قاناعاتتاندىرادى. ودان بولەك، تەحنولوگيالىق ينفراقۇرىلىمدى (سۋپەركومپيۋتەر) ىسكە قوسۋ قازاقستاننىڭ ورتالىق ازياداعى جاساندى ينتەللەكتىنى دامىتۋ سالاسىنداعى كوشباسشىلىعىن ايقىندايدى جانە وتاندىق كومپانيالار مەن كورشىلەس ەلدەر ءۇشىن ەسەپتەۋ قۋاتتارىن (سۋپەركومپيۋتەر) جالعا الۋعا مۇمكىندىك بەرەدى»، - دەيدى ول.
بۇعان دەيىن حابارلاعانىمىزداي ەلىمىزدە سيفرلىق كودەكس جانە جاساندى ينتتەلەكت تۋرالى زاڭ جوباسى ازىرلەنىپ جاتىر.
