بيىل ەلىمىزدە العاش رەت تاقتاتاس مۇنايى وندىرىلەدى
استانا. KAZINFORM - پرەمەر- مينيستر ولجاس بەكتەنوۆ ۇكىمەتتىڭ كەڭەيتىلگەن وتىرىسىندا مۇناي- گاز سالاسىنداعى الەۋەتتى جوبالارعا توقتالدى.

- 2024 - جىلى قازمۇنايگاز قىزىلوردا، اتىراۋ جانە اقتوبە وبلىستارىندا ءتورت جوبا بويىنشا بۇرعىلاۋ جۇمىستارىن باستادى. بۇل جوبالاردىڭ جيىنتىق گەولوگيالىق رەسۋرستارى مۇناي ەكۆيۆالەنتى بويىنشا 800 ميلليون توننادان اسادى. بيىل العاشقى قازاقستاندىق تاقتاتاس مۇنايى وندىرىلەدى دەپ كۇتىلۋدە. بۇل مۇناي مەن گاز سالاسىنا ينۆەستيتسيالار تارتۋ ءۇشىن قوسىمشا سەرپىن بەرەدى، - دەدى ۇكىمەت باسشىسى.
پرەمەر- مينيستر «باتىس پرورۆا» جانە «بارحاننايا» كەن ورىندارىندا شامامەن 19 ميلليارد تەكشە مەتر گازدىڭ قورىن يگەرۋ باستالاتىنىن ءمالىم ەتتى.
- قاراعاندى وبلىسىندا جەردە سيرەك كەزدەسەتىن مەتالداردىڭ 17 ءتۇرى بار ءىرى كەن ورنى تابىلدى. سونىمەن قاتار وسى قاراعاندى وبلىسىندا ەلەكتروموبيلدەرگە ارنالعان باتارەيالار وندىرىسىندە قولدانىلاتىن گرافيت كونتسەنتراتىن ءوندىرۋ بويىنشا تەحنيكالىق-ەكونوميكالىق نەگىزدەمە ازىرلەنىپ جاتىر. قاشاعان مەن جاڭاوزەندە گاز وڭدەۋ زاۋىتتارىنىڭ قۇرىلىسى جالعاسۋدا. قاشاعانداعى ەكىنشى گاز وڭدەۋ زاۋىتى مەن قاراشىعاناقتاعى گاز وڭدەۋ زاۋىتىنىڭ جوبالاۋ جۇمىستارىن باستاۋ ءۇشىن ينۆەستيتسيالىق شەشىمدەردىڭ قابىلدانۋىن كۇتىپ وتىرمىز، - دەدى ولجاس بەكتەنوۆ.
ايتا كەتەيىك، ەلوردادا پرەزيدەنت قاسىم - جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتىپ جاتىر.