بيىل ەلىمىزگە شەتەلدەن قانشا كولىك اكەلىندى؟

بيىل 11 ايدا ەلىمىزگە سىرت ەلدەن 136,5 مىڭ اۆتوكولىك اكەلىندى. ونىڭ سوماسى - 2,7 ميلليارد دوللار، - دەپ حابارلايدى Massaget.kz ءتىلشىسى.

358,1 ميلليارد تەڭگە كەدەندىك باجدار مەن سالىقتار تولەندى، بۇل وتكەن جىلدىڭ سايكەس كەزەڭىنەن 2 ەسە كوپ. وتكەن جىلى وسى ايدا 1,355 ميلليون دوللار سوماسىنا 46,2 مىڭ اۆتوكولىك كەلگەن. سونىمەن قاتار، 183,6 ميلليارد تەڭگە كەدەندىك باجدار مەن سالىقتار تولەندى.

«كەدەندىك قۇن باقىلاۋىنىڭ قورىتىندىسى بويىنشا قوسىمشا - 49,4 ميلليارد تەڭگە ءوندىرىلدى. رەسپۋبليكادا كەدەندىك راسىمدەۋ ەلەكتروندىق تۇردە مەملەكەتتىك كىرىستەر ورگاندارىنىڭ اقپاراتتىق جۇيەلەرى ارقىلى جۇزەگە اسىرىلادى. وسىعان بايلانىستى سىرتقى ەكونوميكالىق قىزمەتكە قاتىسۋشىسىمەن ولاردىڭ تسيفرلىك قولتانباسى ارقىلى تاۋارلارعا دەكلاراتسيانى ءوز بەتىنشە كەز كەلگەن جەردەن ۇسىنۋ جانە قول قويۋ مۇمكىندىگى بار»، - دەپ مالىمدەدى كىرىستەر كوميتەتى.

اكەلىنەتىن اۆتوكولىكتەردى كەدەندىك راسىمدەۋ ەرەجەلەرى وتە قاراپايىم دەيدى كوميتەت وكىلدەرى.

«يمپورتاۋشى تاۋارلاردى كەدەندىك دەكلاراتسيالاۋ كەزىندە ونىڭ كەدەندىك قۇنىڭ كولىك قۇرالىن ساتىپ الۋعا جۇمساعان شىعىنداردى، سونداي- اق ونى قازاقستانعا جەتكىزۋمەن بايلانىستى شىعىندار رەتىندە انىقتاۋعا مىندەتتى. سوندىقتان كولىك قۇرالىن كەدەندىك قۇندى قابىلداۋ ءۇشىن ونىڭ قۇنى سەنىمدى، ساندىق جانە قۇجاتتالعان اقپاراتقا نەگىزدەلۋى كەرەك. قۇجاتتار رەتىندە: جونەلتۋشى ەلدىڭ ەكسپورتتىق دەكلاراتسياسى، شوت-فاكتۋرا، تاۋاردى جەتكىزۋگە ارنالعان كولىك شىعىندارى، ساتىپ الۋشى مەن ساتۋشى اراسىنداعى ساتىپ الۋ-ساتۋ شارتى، بانكتىك اۋدارىم، اۋكسيوندىق بەت جانە ت. ب. قولدانىلا الادى»، - دەپ جازىلعان حابارلامادا.