بيىل جەتىم جانە اتا-اناسىنىڭ قامقورلىعىنسىز قالعان 1599 بالا باسپانالى بولدى

استانا. KAZINFORM - بيىل جەتىم جانە اتا-اناسىنىڭ قامقورلىعىنسىز قالعان 1599 بالا باسپانالى بولدى. بۇل جايىندا سەنات دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.

- «تۇرعىن ءۇي قاتىناستارى تۋرالى» زاڭعا سايكەس، جەتىم بالالار مەن اتا-اناسىنىڭ قامقورلىعىنسىز قالعان بالالارعا كوممۋنالدىق تۇرعىن ءۇي قورىنان نەمەسە جەكە تۇرعىن ءۇي قورىنان جەرگىلىكتى اتقارۋشى ورگان جالداعان تۇرعىن ۇيلەردىڭ جالپى سانىنىڭ كەمىندە 20 پايىزى بولىنەدى. جەتىم بالالارعا جانە اقق بالالارعا جىلىنا بەرىلەتىن تۇرعىن ءۇي سانى 2 ەسەگە (2020 -جىلى 847 پاتەردەن 2024 -جىلدىڭ 9 ايىندا 1599 پاتەرگە دەيىن.) ارتتى. جەرگىلىكتى اتقارۋشى ورگانداردىڭ اقپاراتى بويىنشا 2015 -جىلدان باستاپ جالعا بەرىلەتىن تۇرعىن ۇيمەن 83373 ادام قامتاماسىز ەتىلدى، ونىڭ ىشىندە جەتىم بالالار مەن اتا-اناسىنىڭ قامقورلىعىنسىز قالعان بالالار - 10529. 2024 -جىلدىڭ 9 ايىنىڭ قورىتىندىسى بويىنشا 8113 جالدامالى پاتەر، ونىڭ 1599 بىرلىگى جەتىم بالالار مەن ا ق ق بالالارعا بەرىلدى، - دەدى ۇكىمەت باسشىسى جاۋابىندا.

ونىڭ اتاپ وتۋىنشە، تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2026 -جىلعا دەيىنگى تۇجىرىمداماسى اياسىندا تۇرعىن ۇيگە مۇقتاجدار ەسەبىندە تۇرعان ازاماتتار، ونىڭ ىشىندە جەتىم بالالار مەن اتا-اناسىنىڭ قامقورلىعىنسىز قالعان بالالار ءۇشىن «2-10-20» جانە «5-10-20» جەڭىلدىكتى يپوتەكالىق باعدارلامالارى كوزدەلگەن.

- سونداي-اق 2022 -جىلى مەملەكەت باسشىسىنىڭ تاپسىرماسى بويىنشا جەكە تۇرعىن ءۇي قورىنان جالعا الىنعان تۇرعىن ءۇي ءۇشىن جالداۋ اقىسىنىڭ ءبىر بولىگىن (50/50) سۋبسيديالاۋ تەتىگى ىسكە قوسىلدى. باعدارلامانى سوڭعى 6 ايداعى تابىسى 1 كۇنكورىس دەڭگەيىنەن تومەن، مۇقتاجدار ەسەبىندە تۇرعان جەتىم بالالار مەن اتا-اناسىنىڭ قامقورلىعىنسىز قالعان بالالار پايدالانۋىنا بولادى، - دەدى پرەمەر-مينيستر.

مارلان جيەمباي