بيىل داڭقتى باتىرلار اتىنداعى وردەندەردى ساربازدارعا تابىستاۋ كەرەك - ەدىل جاڭبىرشين
استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات ەدىل جاڭبىرشين ەكىنشى دۇنيەجۇزىلىك سوعىسقا قاتىستى عىلىمي-زەرتتەۋ جۇمىستارىن جۇيەلى تۇردە جۇرگىزۋدى قايتا جاڭعىرتۋدى ۇسىندى.
«جاقىندا عانا ۇلتتىق قۇرىلتايدا ەلىمىزگە ارنالعان كەلەلى ساياسي- يدەولوگيالىق، ادامي قۇندىلىقتار، ازاماتتاردىڭ قۇقىقتارى تۋرالى، الەۋمەتتىك جانە ەكونوميكالىق باعىتتاعى ماسەلەلەر ناقتى كوتەرىلدى. مەملەكەت باسشىسى ءبارىمىز كوتەرىپ جۇرگەن ۇلكەندى- كىشىلى وزەكتى ويلاردى ناقتىلاپ، ولاردى ىسكە اسىرۋ باعىتتارىنا توقتالدى. قۇرىلتايدا ءوز تاراپىمنان سۇراپىل سوعىستا قاسىق قانى قالعانشا ەرلىك كورسەتكەن مايدانگەرلەرىمىزدىڭ «ادال ادام» قاعيداتىنا ساي تاريحي تۇرعىدان ءادىل باعالانۋى ءتيىس ەكەنىن كوتەردىم. ويتكەنى، الەمدەگى بارشا ۇلتتاردى جويىپ، وزدەرىنىڭ ناتسيستىك يدەولوگياسىن ورناتقىسى كەلگەن فاشيستەرگە اتالارىمىز قاسقايىپ قارسى تۇردى. ءبىراق، بۇگىن تەك بەيبىت قوعامدا ءومىر ءسۇرىپ، وق- ءدارىنىڭ ءيىسىن سەزبەگەن، وتان ءۇشىن كۇرەستەگى شايقاستارمەن تەرەڭ تانىسپاعان ۇرپاعىمىزدىڭ كەيبىر وكىلدەرى تاريحي وقيعالارىمىز بەن ايبىندى تۇلعالارىمىزدى جوققا شىعارعىسى كەلەدى. بۇل - تاريحىمىزعا جاسالعان قيانات، باتىرلاردىڭ رۋحىنا دەگەن قۇرمەتسىزدىك»، - دەدى ە. جاڭبىرشين ۇكىمەت باسشىسىنىڭ ورىنباسارى تامارا دۇيسەنوۆانىڭ اتىنا جولداعان ساۋالىندا.
ونىڭ پايىمىنشا، ءاربىر تاريحي وقيعانى، سول وقيعالاردىڭ بەل ورتاسىندا جۇرگەن تۇلعالاردىڭ ەسىمىن جاس ۇرپاقتىڭ جادىندا تاسقا قاشاعانداي ەتىپ تاڭبالاۋ كەرەك.
«ماسەلەن، الەمنىڭ كوپتەگەن ەلدەرى ءوز تاريحىن تۇعىرلى تۇلعالارمەن تىعىز بايلانىستىرادى، ءتىپتى ولاردىڭ ەسىمدەرىمەن ارنايى داۋىرلەردى مەن كەزەڭدەردى اتايدى. وعان قوسا، مەملەكەتتەرىنىڭ وردەندەرى مەن مەدالدارىنا ۇلى كوسەمدەرىنىڭ، داڭقتى قولباسشىلارىنىڭ ەسىمدەرىن بەرگەن. بۇل ۇلتتىڭ ۇلىلىعىن جانە ساياسي مادەنيەتىنىڭ بيىكتىگىن بىلدىرەدى. وسى رەتتە، كەشەگى ۇلتتىق قۇرىلتايدا قاسىم- جومارت توقايەۆ تاريحي ادىلدىكتى ورناتۋ ءۇشىن ەلىمىزدەگى اتى اڭىزعا اينالعان قاھارماندارىمىز - باۋىرجان مومىش ۇلى، راقىمجان قوشقاربايەۆ، ساعادات نۇرماعامبەتوۆتىڭ ەسىمدەرىمەن اتالاتىن ارنايى وردەندەردى تاعايىنداۋدى ۇسىندى. پرەزيدەنتتىڭ بۇل ۇسىنىسى - ادامزات وركەنيەتىندە زاردابى جونىنەن بۇرىن-سوڭدى بولماعان، ميلليونداعان ادامنىڭ ءومىرىن جالماعان، تاعدىرلارىن تالقان ەتكەن، ەكىنشى دۇنيەجۇزىلىك سوعىستا وت كەشكەن 1,4 ميلليون قازاقستاندىق مايدانگەردىڭ رۋحىنا دەگەن ناعىز قۇرمەت. بۇل وتانشىلدىقتى، ۇلتتىق بىرەگەيلىكتى نىعايتۋعا زور ىقپال ەتەدى. ءبىراق باتىر بابالارىمىزدىڭ رۋحىنا كورسەتىلگەن قۇرىلتايداعى يگى باستاما اقپاراتتىق تۇرعىدان جان- جاقتى تاراتىلماي، قوعامدا لايىق دەڭگەيدە ناسيحاتتالمادى. سوندىقتان، ءبىرىنشى كەزەكتە، ءبىز ءماجىلىس دەپۋتاتتارى وسى تىڭ يدەياعا ارنايى توقتالۋدى ءجون كوردىك جانە اتالعان ۇسىنىستى زاڭدى تۇردە بەكىتۋىمىز قاجەت. بۇل شەشىمدى تەز ارادا الداعى ماڭىزدى مەرەكەلەرگە دەيىن قابىلداپ، العاشقى ساربازدارىمىزدى ەلىمىزدىڭ ءبىرتۋار پەرزەنتتەرىنىڭ اتىنداعى مارتەبەلى وردەندەرمەن ماراپاتتاۋىمىز كەرەك. بۇگىنگى ءبىزدىڭ دەپۋتاتتىق ساۋالىمىز - قۇرىلتايدا كوتەرىلگەن ماسەلەلەردى پارلامەنت مىنبەرىنەن ۇكىمەتكە رەسمي تۇردە جولداۋ»، - دەدى دەپۋتات.
بۇل تۇرعىدا ە. جاڭبىرشين ءتيىستى ۇسىنىستاردى جاريالادى.
«بىرىنشىدەن، ۇكىمەت قازىردەن باستاپ مايدانگەرلەرىمىزدىڭ اتىن ماڭگى ەستە ساقتاۋ شارالارىن قولعا السىن. ەكىنشىدەن، ەكىنشى دۇنيەجۇزىلىك سوعىسقا قاتىستى عىلىمي-زەرتتەۋ جۇمىستارىن جۇيەلى تۇردە جۇرگىزۋدى قايتا جاڭعىرتىپ، مايدانگەرلەردىڭ دەرەكتەرى تسيفرلاندىرىلعان ارنايى ۇلتتىق پورتالدى جاساۋ قاجەت. ۇشىنشىدەن، بۇل جۇمىستارعا كوپ جىلدىق تاجىريبەسى بار قوعامدىق ۇيىمداردى تارتىپ، اتالعان جوبالارعا بارلىق كوزدەردەن قارجىلاندىرۋ قاراستىرىلۋى ءتيىس»، - دەدى دەپۋتات.
ەسكە سالساق، جاقىندا پرەزيدەنت قاسىم-جومارت توقايەۆ «ايبىن» وردەنىنىڭ ءتۇرلى دارەجەسىن داڭقتى باتىرلاردىڭ اتىمەن اتاۋدى ۇسىنعان ەدى.
اۆتور
رۋسلان عابباسوۆ
