بيىل دا قۇرعاقشىلىق بولۋى مۇمكىن، سۋ مينيسترلىگى ويداعىداي ناتيجە بەرمەدى - پرەزيدەنت

استانا. KAZINFORM - پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسىندا قۇرعاقشىلىق پەن سۋ تاپشىلىعى ماسەلەسىن كوتەرىپ، سۋ ۇنەمدەۋ تەحنولوگياسىن كەڭ اۋقىمدا ەنگىزۋدى تاپسىردى.

«بىلتىر جامبىل وبلىسىنىڭ ديقاندارى سۋ تاپشىلىعىنان قاتتى زارداپ شەكتى. بيىل دا قۇرعاقشىلىق بولۋى مۇمكىن. ارنايى قۇرىلعان سۋ رەسۋرستارى جانە يرريگاتسيا مينيسترلىگىنىڭ جۇمىسى ازىرگە ويداعىداي ناتيجە بەرگەن جوق. ال، كورشى مەملەكەتتەر سۋ تاپشىلىعىن جويۋ ءۇشىن ناقتى ماقسات قويىپ، بەلسەندى جۇمىس ىستەپ جاتىر. ال بىزدە سۋ رەسۋرستارىن باسقارۋ جۇيەسىن دامىتۋ تۇجىرىمداماسى جاقىندا عانا قابىلداندى. بۇل قۇجات تىم ۇزاق تالقىلاندى»، - دەدى پرەزيدەنت. 
مەملەكەت باسشىسى جاعدايدىڭ وتە كۇردەلى ەكەنىن اشىق ايتتى.
«مىسالى، ەلىمىزدەگى سۋارمالى جەردىڭ 13 پايىزىندا عانا سۋ ۇنەمدەۋ تەحنولوگياسى بار. اسىرەسە، تۇركىستان جانە قىزىلوردا وبلىستارىنداعى جاعداي مۇشكىل، قۇرعاقشىلىق قاۋپى اسا جوعارى. سوعان قاراماستان، وسى ايماقتاردا ءتيىستى جۇمىس جۇرگىزىلىپ جاتقان جوق. سوندىقتان، سۋدى كوپ قاجەت ەتەتىن داقىلداردى ازايتىپ، قۇرعاقشىلىققا ءتوزىمدى داقىلداردى كوبەيتۋ كەرەك، سۋ ۇنەمدەيتىن تەحنولوگيانى ەنگىزۋ قاجەت. احۋالدى جاقسارتۋ ءۇشىن باتىل ارەكەت جاساۋ كەرەك»، - دەدى ق. توقايەۆ.

پرەزيدەنتتىڭ پىكىرىنشە، ەڭ الدىمەن، سۋ ۇنەمدەۋ تەحنولوگياسىن كەڭ اۋقىمدا ەنگىزگەن ءجون.
«شىنى كەرەك، ءبىز سۋدى تىم ورىنسىز جۇمسايمىز. «سۋدىڭ دا سۇراۋى بار». بۇكىل ەل بولىپ سۋدى ۇنەمدەپ پايدالانۋ مادەنيەتىن قالىپتاستىرۋىمىز كەرەك. كورشى مەملەكەتتەردىڭ تاجىريبەسىن زەرتتەپ، ءتيىمدى تۇستارىن الۋ قاجەت. ەلدى سۋمەن قامتاماسىز ەتۋ - اسا ماڭىزدى مىندەت، ۇلتتىق قاۋىپسىزدىك ماسەلەسى دەۋگە بولادى. ونەركاسىپتە، اگروسەكتوردا، كوممۋنالدىق شارۋاشىلىقتا، جالپى، بارلىق سالادا سۋدى ءتيىمدى پايدالانۋ ماسەلەسىنە ەرەكشە ءمان بەرۋ قاجەت»، - دەدى ول.

 

اۆتور
ايجان سەرىكجان قىزى