بيىل ءدارى-دارمەككە بيۋدجەتتەن 500 ميلليارد تەڭگە ءبولىندى

استانا. KAZINFORM - امبۋلاتوريالىق دەڭگەيدە 251 ميلليارد تەڭگەگە 3,5 ميلليون پاتسيەنت تەگىن ءدارى-دارمەكپەن قامتاماسىز ەتىلدى. بۇل تۋرالى ۇكىمەت وتىرىسىندا ق ر دەنساۋلىق ساقتاۋ مينيستر اقمارال ءالنازاروۆا ءمالىم ەتتى.

«بيىل امبۋلاتوريالىق جانە ستاتسيونارلىق دەڭگەيدە ءدارى-دارمەكپەن قامتاماسىز ەتۋگە رەسپۋبليكالىق بيۋدجەتتەن 474 ميلليارد تەڭگە، ال جەرگىلىكتى بيۋدجەتتەن 26,7 ميلليارد تەڭگە قاراجات جۇمسالدى. امبۋلاتوريالىق دەڭگەيدە 251 ميلليارد تەڭگەگە 3,5 ميلليون پاتسيەنت 120 نوزولوگيا بويىنشا تەگىن ءدارى-دارمەكپەن قامتاماسىز ەتىلدى. اۋىل تۇرعىندارى دارىلىك زاتتاردى ەمىن-ەركىن الۋى ءۇشىن مەديتسينالىق ۇيىمدار بازاسىندا 172 ءدارىحانا جانە 694 جەكە ءدارىحانا، سونداي-اق 15 جىلجىمالى ءدارىحانا پۋنكتتەرى ۇيىمداستىرىلدى. پاتسيەنتتەردىڭ ستاتسيونارلىق دەڭگەيدەگى ءدارى-دارمەكپەن قامتاماسىز ەتىلۋى قازاقستاندىق ۇلتتىق دارىلىك فورمۋليارعا سايكەس ورتالىقتاندىرىلعان جانە دەربەس ساتىپ الۋ ارقىلى جۇزەگە اسىرىلادى»، - دەدى ا. ءالنازاروۆا.

ونىڭ ايتۋىنشا، وسى جىلى ورتالىقتاندىرىلعان ساتىپ الۋ كولەمى 241 ميلليارد تەڭگەنى قۇرادى.

«الايدا ستاتسيونارلىق دەڭگەيدە دارىلىك زاتتاردى جانە مەديتسينالىق قۇرالداردى وزدىگىنەن ساتىپ الۋ پروتسەستەرى قاعاز جۇزىندە جۇرگىزىلەتىندىكتەن، ولاردىڭ شىعىندارىنا تالداۋ جۇرگىزۋ مۇمكىن ەمەس. سوندىقتان دەنساۋلىق ساقتاۋ سالاسىن سيفرلاندىرۋ اياسىندا 2025 -جىلدىڭ 1-قاڭتارىنان باستاپ مەديتسينالىق ۇيىمداردىڭ ءدارى-دارمەك پەن مەديتسينالىق قۇرالداردى ساتىپ الۋى قارجى مينيسترلىگىنىڭ ەلەكتروندىق قارجىلاندىرۋ ورتالىعىنىڭ ۆەب-پورتالىندا جۇزەگە اسىرىلادى»، - دەدى مينيستر.

بۇدان بۇرىن حابارلانعانداي، جىل باسىنان بەرى نارىققا 145 دارىلىك زاتتى وتكىزۋگە رۇقسات بەرىلمەدى.