بيىل بيزنەسكە نەسيە بەرۋدە ەلەۋلى وزگەرىس بولدى - پرەمەر-ءمينيستردىڭ ورىنباسارى

بۇل تۋرالى مەملەكەتتىك اكتيۆتەردى باسقارۋ كومپانيالارىنىڭ حالىقارالىق فورۋمىنىڭ (IPAF) سامميتىندە پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ءمالىم ەتتى.

- مەملەكەتتىك كومپانيالاردىڭ باسشىلارى ءۇشىن نەگىزگى تيىمدىلىك كورسەتكىشتەرى (KPI) تۇبەگەيلى قايتا قارالدى. وندا بيۋدجەتكە جانە ۇلتتىق قورعا قايتارىلعان قاراجات كولەمى، وڭالتىلعان كاسىپورىنداردىڭ سانى، تارتىلعان جەكە ينۆەستيتسيالار كولەمى جانە ەڭبەك ۇجىمدارىن ساقتاپ قالۋ كورسەتكىشتەرى ەسكەرىلدى. پروبلەمالىق اكتيۆتەر جۇكتەمەسىن ازايتۋ بيزنەسكە كرەديت بەرۋگە تىكەلەي سەرپىن بەرەدى. 2026-جىلدىڭ العاشقى 5 ايىندا كورپوراتيۆتىك سەكتورعا جاڭا بەرىلگەن كرەديتتەر كولەمى %14,8 عا ءوسىپ، 8,9 تريلليون تەڭگەگە جەتتى، ال بيزنەستىڭ جيىنتىق پورتفەلى 19 تريلليون تەڭگەدەن استى. مەملەكەتتىك «ورلەۋ» سياقتى باعدارلامالاردىڭ قولداۋىمەن وڭدەۋ ونەركاسىبى مەن مەتاللۋرگيا سالالارىندا ايتارلىقتاي ءوسىم بايقالدى،- دەدى س. جۇمانعارين.

بۇعان دەيىن حابارلانعانداي، پرەمەر- ءمينيستردىڭ ورىنباسارى قازاقستان حالىقارالىق قارجى ينستيتۋتتارىمەن ىنتىماقتاستىقتىڭ بەرىك جۇيەسىن قالىپتاستىرعانىن اتاپ ءوتتى.

ايتا كەتەيىك، ءىس-شارانى ق ر قارجى مينيسترلىگى، «پروبلەمالىق كرەديتتەر قورى» اق جانە ازيا دامۋ بانكى بىرلەسىپ ۇيىمداستىرىپ وتىر. بۇل سامميتكە 19 ەلدەن 200 گە جۋىق وكىل جانە 60 قا جۋىق ۇيىم قاتىسىپ جاتىر. IPAF ازيا وڭىرىندەگى پروبلەمالىق اكتيۆتەردى باسقارۋ سالاسىنداعى مەملەكەتتىك ۇيىمداردى بىرىكتىرەتىن جەتەكشى حالىقارالىق الاڭ. ءسامميتتىڭ قازاقستاندا وتكىزىلۋى ەلىمىزدىڭ قارجى سەكتورىن ساۋىقتىرۋ جانە سترەسستىك اكتيۆتەردى ءتيىمدى باسقارۋ باعىتىنداعى تاجىريبەسىن حالىقارالىق دەڭگەيدە تانىتۋعا مۇمكىندىك بەرەدى.

رۋسلان عابباسوۆ