بيىل بيداي القابى 429 مىڭ گەكتارعا قىسقاردى
استانا. KAZINFORM - بيىل بيداي القابى 429 مىڭ گەكتارعا قىسقارتىلدى. بۇل تۋرالى ۇكىمەت وتىرىسىندا اۋىل شارۋاشىلىعى ءمينيسترى ايداربەك ساپاروۆ ايتتى.
«وزدەرىڭىز بىلەتىندەي، 2023 -جىلى تابيعاتتىڭ اۋىر كليماتتىق جاعدايى شارۋالاردىڭ قارجىلىق جاي-كۇيىنە اسەر ەتتى. مەملەكەت باسشىسىنىڭ تاپسىرماسى بويىنشا زارداپ شەككەن فەرمەرلەردى قولداۋ ءۇشىن ۇكىمەت تاراپىنان بارلىق قاجەتتى شارالار قابىلداندى. بۇگىنگى تاڭدا 2024 -جىلعا ارنالعان باستى مىندەت - كوكتەمگى ەگىس جۇمىستارىن ۋاقتىلى جانە ساپالى جۇرگىزۋ. ول ءۇشىن مينيسترلىك بارلىق قاجەتتى شارالاردى قابىلداپ جاتىر. كەرەكتى مەملەكەتتىك ورگاندار مەن ۇيىمداردى، سونداي-اق وبلىستار مەن قالالار اكىمدەرىنىڭ ورىنباسارلارىن تارتا وتىرىپ، وڭىرلەردە كوكتەمگى ەگىس ناۋقانىن جۇرگىزۋ جۇمىستارىن ۇيلەستىرۋ جونىندەگى جەدەل شتاب قۇرىلدى»، - دەدى مينيستر.
ايداربەك ساپاروۆتىڭ اتاپ وتۋىنشە، مينيسترلىك سالادا اۋقىمدى تالداۋ جۇرگىزگەن. ناتيجەسىندە ورىن الىپ وتىرعان پروبلەمالار جانە ولاردىڭ پايدا بولۋ سەبەپتەرى انىقتالدى. جۇمىستىڭ ناتيجەلەرى بويىنشا ءبىرقاتار جۇيەلىك پروبلەم بەلگىلى بولدى.
«ايتالىق، اگروونەركاسىپتىك كەشەننىڭ قارقىندى دامۋىن تەجەپ تۇرعان ماسەلەلەردىڭ ءبىرى - وسىمدىك شارۋاشىلىعىندا ءارتاراپتاندىرۋدىڭ دۇرىس جۇرگىزىلمەۋى. ول ءۇشىن مينيسترلىك بۇعان دەيىن وبلىستار اكىمدىكتەرىنە ءارتاراپتاندىرۋ بويىنشا ينديكاتورلاردى بەرگەن بولاتىن، ولار باقىلاۋدا بولۋى كەرەك. وسى جۇمىستى ەسكەرە وتىرىپ، وبلىستار اكىمدىكتەرىنىڭ دەرەكتەرى بويىنشا وسى جىلى 23,8 ميلليون گەكتار الاڭدا اۋىل شارۋاشىلىعى داقىلدارىن ءوسىرۋ جوسپارلانعان. بۇل 2023 -جىلعى كورسەتكىشتەن 209,6 مىڭ گەكتارعا از»، - دەدى ول.
ماسەلەن، ونىڭ دەرەگىنشە، بيدايدىڭ ەگىستىك الاڭدارى وتكەن جىل 13,7 ميلليون گەكتەر بولسا، بيىل 13,3 ميلليون گەكتار بولادى. ياعني، 429,2 مىڭ گەكتارعا قىسقارتىلدى. قىسقارتىلعان الاڭداردا الەۋمەتتىك ماڭىزى بار جانە جوعارى رەنتابەلدى داقىلدار الاڭدارىن ۇلعايتۋ كوزدەلگەن.
«وبلىستار اكىمدىكتەرىنىڭ جەدەل دەرەكتەرى بويىنشا مايلى داقىلدار الاڭىن 385,7 مىڭ گەكتارعا ۇلعايتۋ جوسپارلانعان. بۇل جالپى ەگىس الاڭىن 3,2 ميلليون گەكتارعا دەيىن جەتكىزۋگە مۇمكىندىك بەرەدى. ونىڭ ىشىندە كۇنباعىس سياقتى الەۋمەتتىك ماڭىزى بار داقىل الاڭىن 60 مىڭ گەكتارعا ۇلعايتۋ جانە ولاردى 1,2 ميلليون گەكتارعا دەيىن جەتكىزۋ كۇتىلەدى. بۇدان باسقا، قانت قىزىلشاسى سياقتى الەۋمەتتىك ماڭىزى بار داقىل الاڭىن 12 مىڭ گەكتارعا ۇلعايتۋ كوزدەلگەن. بيىل قانت قىزىلشاسىنىڭ اۋدانى 25 مىڭ گەكتاردى قۇرايدى. سونىمەن قاتار وڭىرلەردە بەرىك ازىقتىق بازانى قۇرۋ بويىنشا جۇمىستار جۇرگىزىلۋدە، بۇل ءۇشىن اعىمداعى جىلى ازىقتىق داقىلدار الاڭىن 68,3 مىڭ گەكتارعا ۇلعايتىپ، ولاردى 3,2 ملن گا دەيىن جەتكىزۋ جوسپارلانعان» ، - دەدى ايداربەك ساپاروۆ.
