بيىل بيدايدىڭ ءبىر تونناسى قانشا تەڭگە بولادى - ۇكىمەت شەشىمى

- نارىق كونيۋنكتۋراسىن، سونداي-اق نارىققا قاتىسۋشىلاردىڭ ۇسىنىسىن ەسكەرە كەلىپ، ۇكىمەت 2026 -جىلعى استىقتىڭ ساتىپ الۋ باعاسىن ايقىندادى. اتاپ ايتقاندا، 3-سىنىپتى بيداي باعاسىن ساپالىق كورسەتكىشىنە بايلانىستى 92 دەن 115 مىڭ تەڭگەگە دەيىن بەلگىلەۋ جوسپارلانۋدا. وسىلايشا، باعا وتكەن جىلعى دەڭگەيدە قالادى، - دەدى سەرىك جۇمانعارين.

ازىق-تۇلىك كورپوراتسياسىنىڭ ساتىپ الۋ باعاسى نارىق ءۇشىن ەتالون رەتىندە قىزمەت ەتەدى. شارۋالاردى قارجىلىق قولداۋ استىقتى فورۆاردتىق جانە تىكەلەي ساتىپ الۋ تەتىكتەرى ارقىلى جۇزەگە اسىرىلادى. بۇل اۋىل شارۋاشىلىعى وندىرۋشىلەرىنە وندىرىستىك شىعىنداردى جابۋعا جانە كەلەسى ماۋسىمعا دايىندالۋعا مۇمكىندىك بەرەدى.

تاعى ءبىر قولداۋ شاراسى - استىق ترەيدەرلەرىنە ق ق س-تى قايتارۋ. ءتيىستى شەشىم سالىق كودەكسىن ەنگىزۋ بويىنشا جوبالىق كەڭسە وتىرىستارىنىڭ بىرىندە قابىلداندى. اۋىل شارۋاشىلىعى ونىمدەرىن ەكسپورتتاۋشىلار ءۇشىن ەسەپكە جاتقىزىلاتىن ق ق س سوماسىن تۇزەتۋ قولدانىلمايدى. ق ق س-تى قايتارۋعا قويىلاتىن تالاپتاردىڭ نەگىزدىلىگى تاۋار قوزعالىسىنىڭ جانە سالىق تولەۋدىڭ بۇكىل تىزبەگىن - اۋىل شارۋاشىلىعى وندىرۋشىسىنەن ەكسپورتتاۋشىعا دەيىن قاداعالاۋعا مۇمكىندىك بەرەتىن «پيراميدا ءادىسى» دەپ اتالاتىن ءتاسىلدى قولدانا وتىرىپ، سالىقتىق تەكسەرۋمەن راستالاتىن بولادى. تەكسەرۋدىڭ وڭ ناتيجەلەرى بولعان جاعدايدا ەكسپورتتاۋشى بۇرىن تولەنگەن ق ق س-تى تولىق كولەمدە قايتارىپ الا الادى.

سەرىك جۇمانعارين سونداي- اق استىق ەكسپورتتاۋشىلارعا مەملەكەتتىك شىعىنداردى وتەۋ باعدارلاماسى 2026-2027 ماركەتينگتىك جىلعا ۇزارتىلاتىنىن حابارلادى.

وتكەن جىلدارى استىق جونەلتۋشىلەردىڭ كولىك شىعىندارىن سۋبسيديالاۋ قازاقستاندىق استىقتى جەتكىزۋ گەوگرافياسىن كەڭەيتۋگە مۇمكىندىك بەردى. ءداستۇرلى نارىقتاردان باسقا قازاقستاندىق بيدايدى العاش رەت بەلگيا، پولشا، پورتۋگاليا، نورۆەگيا، ۇلى بريتانيا، سونداي-اق ماروككو، الجير جانە مىسىر سىندى سولتۇستىك افريكا ەلدەرى ساتىپ الدى. ازىق-تۇلىك كورپوراتسياسى سونىمەن قاتار قىتاي ارقىلى مۋلتيمودالدى مارشرۋت بويىنشا ۆەتنامعا استىق جەتكىزۋدى سىناپ كوردى.

بۇل شارالاردى جۇزەگە اسىرۋ استىق باعاسىن تۇراقتاندىرۋعا جانە دەمپينگ تاۋەكەلدەرىن تومەندەتۋگە ىقپال ەتتى. لوگيستيكا، قايتا وڭدەۋ، ماشينا جاساۋ جانە سەرۆيستىك قىزمەتتەر سىندى ساباقتاس سالالارعا دا قوسىمشا اسەر بەردى.

كەزدەسۋدىڭ تاعى ءبىر تاقىرىبى مال شارۋاشىلىعىن دامىتۋعا ارنالدى. قوستاناي وبلىسىنىڭ ءۇش وڭتۇستىك ءوڭىرى - ارقالىق، امانگەلدى جانە جانگەلدى اۋداندارىندا بۇگىندە 1132 فەرمەرلىك شارۋاشىلىق جۇمىس ىستەيدى. جالپى ەگىس القابى 581,1 مىڭ گەكتار. ونىڭ ىشىندە ءداندى داقىل 501,4 مىڭ گەكتار، مايلى داقىل 65,9 مىڭ گەكتار. سوڭعى ءۇش جىلدا مايلى داقىل القابى 1,3 ەسەگە ۇلعايدى. نەگىزگى داقىل - ماقسارى: ول 51,2 مىڭ گەكتارعا نەمەسە وبلىستاعى وسى داقىلدىڭ بارلىق اۋدانىنىڭ 47 پايىزىنا ەگىلدى.

فەرمەرلەر كەزىندە قوستاناي وبلىسى باستاماشى بولعان «جايلاۋ» باعدارلاماسىن قايتا جۇزەگە اسىرۋ ماسەلەسىن كوتەردى. اتاپ ايتقاندا، جايىلىمداردى مىندەتتى تۇردە سۋلاندىرۋ جانە مال شارۋاشىلىعى بازالارىن سالۋ جونىندەگى تالاپتار تۋرالى ءسوز بولدى. وڭتۇستىك اۋدانداردىڭ شارۋاشىلىقتارى نەگىزىنەن تابيعي سۋ كوزدەرى بار وزەندەر مەن كولدەردىڭ جايىلمالارىندا ورنالاسقان، كوپتەگەن فەرمەرلەردە مال شارۋاشىلىعىنا قاجەتتى ينفراقۇرىلىم بار. وسىعان بايلانىستى باعدارلاما تالاپتارىن ورىنداۋ كەزىندە بۇرىننان بار وبەكتىلەردى ەسەپكە الۋ مۇمكىندىگىن قاراستىرۋ ۇسىنىلدى.

سونداي-اق، مال وسىرۋشىلەر اسىل تۇقىمدى ءىرى قارا مالدىڭ شەكتى قۇنىن ونى ساتىپ الۋدى جەڭىلدەتىلگەن نەسيەلەۋ كەزىندە قايتا قاراۋدى ۇسىندى. ويتكەنى ولاردىڭ باعالاۋى بويىنشا باعدارلامادا بەلگىلەنگەن باعا نارىقتىق باعادان تومەن.

سەرىك جۇمانعارين اۋىل شارۋاشىلىعى مينيسترلىگىنە قولدانىستاعى قۇجاتتارعا قاجەتتى وزگەرىستەردى پىسىقتاۋدى، سونداي-اق اسىل تۇقىمدى مال قۇنىنىڭ انىقتامالىعىن ازىرلەۋدى تاپسىردى.

«Zengi Group» ج ش س ديرەكتورى جانىبەك كەنجەبايەۆ ارقالىقتا ەمبريوندار ءوندىرۋ بويىنشا گەنەتيكالىق ورتالىق قۇرۋ جوسپارىن ۇسىندى. جوبانى جۇزەگە اسىرۋ ءۇشىن ينۆەستيتسيا تارتىلدى.

- بۇل جوبا - اسىل تۇقىمدى مال شارۋاشىلىعىن دامىتۋ ءۇشىن قازاقستاندا اسىل تۇقىمدى مال باسىن كوبەيتۋ مۇمكىندىگى. ەمبريونداردى قولدانۋ ارقىلى ءبىز اسىل تۇقىمدى مال الا الامىز. سونىمەن قاتار ارقالىقتا مال تاسىمالداۋ بويىنشا لوگيستيكالىق حاب قۇرۋ بويىنشا جۇمىس ىستەيمىز. ءبىز اسىل تۇقىمدى مالدى ءوندىرۋ مەن ساتۋدى كاسىبي دەڭگەيگە شىعارۋدى جوسپارلاپ وتىرمىز، - دەپ اتاپ ءوتتى جانىبەك كەنجەبايەۆ.