بيىل اينالىمى 60 ميلليارد تەڭگەنى قۇرايتىن 36 زاڭسىز كريپتوايىرباستاۋ پۋنكتى جويىلدى

استانا. KAZINFORM - سوڭعى جىلدارى قىلمىستىق جولمەن الىنعان تابىستاردى زاڭداستىرۋ سحەمالارىندا زاڭسىز كريپتوايىرباستاۋشىلار ماڭىزدى ءرول اتقارادى، ولار كريپتوۆاليۋتانى فياتتىق ۆاليۋتالارعا جانە كەرىسىنشە كونۆەرتاتسيالاۋعا مۇمكىندىك بەرەدى.

قارجىلىق مونيتورينگ اگەنتتىگىنىڭ دەرەگىنشە، مۇنداي قۇرىلىمدار ءوز كليەنتتەرىن سايكەستەندىرمەيدى جانە كۇدىكتى وپەراتسيالاردى انىقتامايدى. سوندىقتان، ولاردىڭ قىزمەتتەرىن كوبىنە كيبەرالاياقتار مەن ەسىرتكى زاتتارىن وتكىزۋشىلەر پايدالانادى.

- 2024-جىلى جالپى اينالىمى 60 ميلليارد تەڭگەنى قۇرايتىن 36 زاڭسىز كريپتوايىرباستاۋ پۋنكتى جويىلدى. 4,8 ميلليون USDT (شامامەن 2,5 ميلليارد تەڭگە) سوماسىنا اكتيۆتەر بۇعاتتالىپ، تاركىلەندى.

ۇلتتىق قاۋىپسىزدىك كوميتەتىمەن، مادەنيەت جانە اقپارات مينيسترلىگىمەن بىرلەسىپ جۇرگىزگەن جۇمىس ناتيجەسىندە 3,5 مىڭنان استام زاڭسىز ونلاين كريپتوايىرباستاۋ قىزمەتى بۇعاتتالدى، - دەپ جازدى اگەنتتىكتەن.

دەرەككە قاراعاندا، ينۆەستيتسيالار تارتۋ ءۇشىن كريپتوۆاليۋتانى پايدالانعان ەكى قارجىلىق پيراميدا اشكەرەلەندى. 545 مىڭ USDT قايتارىلدى جانە 120 مىڭ USDT بۇعاتتالدى.

قارجىلىق مونيتورينگ اگەنتتىگى كريپتوترانزاكتسيالارعا باقىلاۋدى كۇشەيتۋ جانە ولاردىڭ قىلمىستىق ماقساتتاردا قولدانىلۋىنا قارسى كۇرەس جۇرگىزۋدە حالىقارالىق ارىپتەستەرمەن جۇمىستى جالعاستىرۋدا.

اقشا جىمقىرۋ سالاسىنداعى بۇزۋشىلىقتار ءۇشىن سيفرلىق اكتيۆتەر پروۆايدەرلەرىنە جاۋاپكەرشىلىك جۇكتەيتىن زاڭنامالىق تۇزەتۋلەر ازىرلەندى.

قارجى ۇيىمدارىنداعى كريپتوۆاليۋتا وپەراتسيالارىن تەكسەرۋ كۇشەيتىلدى.

قارجىلىق مونيتورينگ اگەنتتىگى قىلمىستىق سحەمالارعا قارسى كۇرەسۋ ماقساتىندا قارجىلىق وپەراتسيالارعا ءتيىمدى باقىلاۋ قۇرالدارىن جەتىلدىرۋدى جالعاستىراتىن بولادى.

بۇعان دەيىن وزبەكستاندا $2,6 ميلليون كريپتواكتيۆىنە زاڭسىز يەلىك ەتكەن جاس ءوسپىرىم ۇستالدى.