بيىل «اۋىل اماناتى» باعدارلاماسىنا 100 ميلليارد تەڭگە بولىنەدى

بيىل «اۋىل اماناتى» باعدارلاماسىنا 100 ميلليارد تەڭگە بولىنەدى
Фото: Kazinform

 استانا. KAZINFORM - بيىل «اۋىل اماناتى» باعدارلاماسى اياسىندا 17 مىڭنان استام جاڭا جۇمىس ورنى قۇرىلادى.

بۇل تۋرالى سەنات دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.

«ۇكىمەت «جايلى مەكتەپ»، «اۋىلدا دەنساۋلىق ساقتاۋدى جاڭعىرتۋ»، تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029 -جىلدارعا ارنالعان تۇجىرىمداماسى، قازاقستان رەسپۋبليكاسىنىڭ اگروونەركاسىپتىك كەشەنىن دامىتۋدىڭ 2021-2030 -جىلدارعا ارنالعان تۇجىرىمداماسى، ء«بىر اۋىل - ءبىر ءونىم»، «اۋىل - ەل بەسىگى» جانە تاعى باسقا باعدارلامالىق قۇجاتتاردىڭ ەرەجەلەرى ينتەگراتسيالانعان قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 -جىلدارعا ارنالعان تۇجىرىمداماسىن قابىلداپ، ىسكە اسىرۋدا. اۋىل حالقىنىڭ تابىسىن ارتتىرۋ ءۇشىن «اۋىل اماناتى» باعدارلاماسى جۇزەگە اسىرىلۋدا. باعدارلاما اياسىندا اۋىل شارۋاشىلىعى كووپەراتيۆتەرىن دامىتۋ ءۇشىن كرەديت بەرۋ (8 مىڭ اەك- كە دەيىن) كوزدەلگەن. بۇل اۋىل شارۋاشىلىق تەحنيكاسىن، قاجەتتى جابدىقتاردى ساتىپ الۋ، وسىمدىك جانە مال شارۋاشىلىعى ونىمدەرىن قايتا وڭدەۋ جونىندەگى شاعىن تسەحتاردى اشۋ بويىنشا ىنتالاندىرۋ بولادى»، - دەدى ۇكىمەت باسشىسى جاۋابىندا.

پرەمەر- ءمينيستردىڭ دەرەگىنشە، باعدارلاما بويىنشا 2023 -جىلى 74,8 ميلليارد تەڭگە سوماسىنا 12,1 مىڭ ميكروكرەديت بەرىلدى. ونىڭ 5,8 ميلليارد تەڭگە كرەديت قاراجاتىن 287 اۋىل شارۋاشىلىعى كووپەراتيۆى الدى. 2024 -جىلعا 16,7 مىڭ ميكروكرەديت بەرۋ جوسپارىمەن 100 ميلليارد تەڭگە ءبولۋ كوزدەلگەن. بۇل اۋىلدا 17 مىڭنان استام جاڭا جۇمىس ورنىن قۇرۋعا مۇمكىندىك بەرەدى. بۇدان باسقا، اگرو ونەركاسىپتىك كەشەن سالاسىنا، ونىڭ ىشىندە اۋىل شارۋاشىلىعى ونىمدەرىن قايتا وڭدەۋگە ينۆەستيتسيالار تارتۋ بويىنشا جۇمىستار جۇرگىزىلۋدە.

«ماسەلەن، 2023-2026 -جىلدارعا ارنالعان اگروونەركاسىپتىك كەشەن ينۆەستيتسيالىق جوبالارىن ىسكە اسىرۋ جونىندەگى جول كارتاسى اياسىندا 2023 -جىلى 3856 جاڭا جۇمىس ورنىن قۇرا وتىرىپ، 275,6 ميلليارد تەڭگە سوماسىنا 289 ينۆەستيتسيالىق جوبا پايدالانۋعا بەرىلدى. ونىڭ ىشىندە ەلدىڭ شەكارالاس وڭىرلەرىندە 224,8 ميلليارد تەڭگە سوماسىنا 3 مىڭ جۇمىس ورنىن قۇرا وتىرىپ، 222 ينۆەستيتسيالىق جوبا ىسكە اسىرىلدى. بۇل ينۆەستيتسيالىق جوبالار جەڭىلدەتىلگەن كرەديتتەۋ، سۋبسيديالاۋ، جەر رەسۋرستارى جانە قاجەتتى ينفراقۇرىلىممەن قامتاماسىز ەتىلگەن. سونىمەن قاتار «مەن كاسىپكەر» قۇرالى اياسىندا «ءبىر اۋىل - ءبىر ءونىم» جوباسى ىسكە اسىرىلۋدا. بۇل جوبا قولدانىستاعى قوسىلعان قۇن وندىرىستىك تىزبەكتەرىنە ەكسپورتتاۋ نەمەسە ءوندىرۋ ءۇشىن نارىقتىق الەۋەتى بار وڭىرلەردەگى پەرسپەكتيۆالى تاۋارلاردى انىقتاۋعا مۇمكىندىك بەرەدى. بۇدان باسقا، تۇجىرىمدامانى ىسكە اسىرۋ اياسىندا دامۋ الەۋەتى جوعارى اۋىلدىق ەلدى مەكەن (تىرەك، سپۋتنيكتىك اەم) تىزبەلەرى وزەكتەندىرىلىپ، ءاربىر ءوڭىر بويىنشا اۋىلدىق اۋماقتاردى دامىتۋ جول كارتالارى بەكىتىلدى»، - دەدى ولجاس بەكتەنوۆ.

سوڭعى جاڭالىقتار