بيىل استىق قويمالارى جاڭا ءونىمدى قابىلداۋعا دايىن با

قازاقستانداعى استىق قويمالارى 30 ميلليون توننا ءونىم ساقتاي الادى. بۇل تۋرالى پارلامەنت ماجىلىسىندە ەگىن وراعىن تالقىلاۋ كەزىندە اۋىل شارۋاشىلىعى ۆيتسە-ءمينيسترى ءابىلحايىر تامابەك ءمالىم ەتتى، دەپ حابارلايدى قازاقپارات ءتىلشىسى.

بيىل ەگىن جيناۋ ناۋقانىندا اۋا رايى جايسىز بولۋىنا قاتىستى فەرمەرلەر كەيبىر كەدەرگىلەرگە تاپ بولعانىنا توقتالعان ۆيتسە-مينيستر: «جامبىل جانە پاۆلودار وبلىستارىندا بولعان قاتتى ىستىق پەن سۋدىڭ ازدىعى سولتۇستىكتەگى ۇزاق جاڭبىرعا ۇلاستى. ايتا كەتسەك، ەگىن ەگۋ ناۋقانى ساپالى تۇقىمداردى پايدالانا وتىرىپ، وڭتايلى ۋاقىتتا جۇرگىزىلدى. فەرمەرلەر تىڭايتقىشتاردى ۋاقىتىندا سەپتى، داقىلداردى ارامشوپتەر مەن اۋرۋلارعا قارسى حيميامەن ۋاقىتىندا وڭدەلدى. جاپپاي ەگىن جيناۋ جۇمىستارىنىڭ باستالۋىنا اۋىل شارۋاشىلىعى تاۋارىن وندىرۋشىلەر بارلىق قاجەت تەحنيكانى دايىندادى»، - دەدى.

ونىڭ ايتۋىنشا، اۋىل شارۋاشىلىعى تاۋارىن وندىرۋشىلەر ەگىن جيناۋ جۇمىستارىن ۋاقتىلى جۇرگىزۋ ءۇشىن 426 مىڭ توننا جەڭىلدەتىلگەن باعاداعى ديزەل وتىنى، ونىڭ ىشىندە 58 مىڭ توننا جەم-ءشوپ دايىنداۋ جۇمىستارىنا ءبولىندى. ديزەل وتىنىنىڭ بۇل كولەمى ەنەرگەتيكا مينيسترلىگىمەن بىرلەسىپ كەلىسىلدى جانە كەستەمەن بەكىتىلدى. بارلىق شىعىندى ەسكەرە وتىرىپ، اۋىل شارۋاشىلىعى تاۋارىن وندىرۋشىلەر ءۇشىن ورتاشا باعا ليترىنە 250 تەڭگە بولادى. بۇل نارىقتاعى باعادان 15 پايىز تومەن.

«رەسپۋبليكادا استىق ساقتايتىن نىسانداردىڭ جالپى سىيىمدىلىعى - 29,9 ميلليون توننا. ونىڭ ىشىندە استىق قابىلداۋ كاسىپورىندارىندا 13,1 ميلليون توننانى، ال اۋىل شارۋاشىلىعى تاۋارىن وندىرۋشىلەردە 16,8 ميلليون توننانى ساقتاۋ مۇمكىندىگى بار. وبلىس اكىمدىكتەرى استىق قويمالارىنىڭ جاڭا ءونىمدى قابىلداۋعا دايىندىعىن قامتاماسىز ەتتى»، - دەدى ۆيتسە-مينيستر.